Dual PanelPasu-pasu man kalak si ngikutken Dibata (Im 26:3-13; Ul 7:12-24)
1"Adi iikutkenndu TUHAN Dibatandu dingen alu tutus ipakendu kerina perentah-PerentahNa si kubereken sendah man bandu, IbanNa kam jadi bangsa si belinen asang bangsa-bangsa si deban i babo doni enda.
2Ikutkenlah TUHAN Dibatandu maka kerina pasu-pasu enda jadi sikerajangenndu:
3TUHAN masu-masu kota ras jumandu.
4TUHAN masu-masu kam maka kam ertuah, bayak, maka nterem pupusndu, melala pagendu, melala lembundu ras biri-birindu.
5TUHAN masu-masu sinuan-sinuanndu ras pangan si ibahan i bas sinuan-sinuan e nari.
6TUHAN masu-masu kerina pendahinndu.
7TUHAN naluken musuhndu adi iperangna kam. Iperang musuhndu kam arah sada dalan, tapi kiam ia nadingken kam alu marpar-merap.
8TUHAN Dibatandu masu-masu pendahinndu, ras ndemi lumbung-lumbungndu alu gandum. Ipasu-PasuNa kam i bas negeri si IberekenNa man bandu.
9Adi iikutkenndu TUHAN Dibatandu, dingen ilakokenndu kerina PerentahNa, IjadikenNa kam jadi BangsaNa jine sue ras si nggo IpadankenNa.
10Emaka kerina bangsa-bangsa i babo doni enda ngidah maka TUHAN nggo milih kam jadi BangsaNa, janah mbiar bangsa-bangsa e man bandu.
11TUHAN mereken man bandu nterem pupusndu, lembu ras page i negeri si IpadankenNa man nini-ninindu maka iberekenna e man bandu.
12I bas paksana, IpesusurNa udan i bas perbendaharan KinibayakenNa i langit nari, dingen ipasu-PasuNa kerina pendahinndu, maka banci kam minjamken man bangsa-bangsa si deban, tapi la kam perlu minjam i bas bangsa si apai nari pe.
13TUHAN Dibatandu mahan kam jadi ikuten bangsa-bangsa si deban, labo jadi bangsa si ngikut-ngikut. Lalap kam menang, la penah talu, adi iikutkenndu alu tutus kerina PerentahNa si kubereken man bandu i bas wari enda.
14Tapi ula ndigan pe ilanggarndu perentah-perentah e alu dalan si apai pe, ntah nembah dingen erdahin guna dibata-dibata si deban."
Ukumen adi la patuh (Im 26:14-46)
15"Tapi adi la iikutkenndu TUHAN Dibatandu ras la atendu tutus make kerina perentah-perentah ras undang-UndangNa si kubereken man bandu wari enda, kerina sumpah-sumpah si la mehuli enda jadi me man bandu:
16TUHAN numpahi kota ras jumandu.
17TUHAN numpahi sinuan-sinuan ras pangan si ibahan i bas sinuan-sinuan e nari.
18TUHAN numpahi kam seh maka la IbereNa man bandu nterem anak, pagenndu la mbuah ras asuh-asuhenndu la merih.
19TUHAN numpahi kerina pendahindu.
20Adi ibahanndu si jahat dingen itulakndu TUHAN, IberekenNa man bandu mara, keguluten, ras kiniseran i bas kerina pendahinndu, seh maka erpedasna kam kernep kerina.
21La erngadi-ngadi IberekenNa penakit man bandu, seh maka sada pe lanai kam lit tading i negeri si nandangi iinganindu e.
22Ipekpek TUHAN kam alu penakit sinanahen, besar ras penakit marun. IbahanNa wari lego, ras angin si melas IsuruhNa rembus ncedaken sinuan-sinuanndu. Kerina mara enda la erleka ras kam seh kam mate.
23Udan pe la reh, erbanca tanehndu bali piherna ras besi.
24Gancih udan ipesusur TUHAN man bandu udan abu ras kersik seh maka kam kernep.
25Iban TUHAN maka italuken musuh-musuhndu kam. Ilawanndu musuhndu arah sada dalan, tapi marpar merap kam kiam nadingken ia. Kerina bangsa i babo doni enda mbiar ngidah si jadi man bandu.
26Adi kam mate badanndu ipangani perik-perik ras rubia-rubia si meliar, janah la lit si nggurbasa.
27Ibereken TUHAN bareh man bandu bali ras si IbahanNa man bangsa Mesir. IbahanNa maka badanndu dem alu cuit ugah, ras si megatel-gatel, tapi la lit tambarna.
28Iban TUHAN maka kam adon, IpentangkenNa kam ras gulut ukurndu IbahanNa.
29Suari pe kam dadap-dadap bali ras kalak pentang, tapi lalap la datndu dalan. Amin kai pe idahikenndu lalap la lit asilna. Tetap kam idedeh ras irampasi kalak, janah ise pe la lit si nampati kam.
30Ertunangen kam ras sekalak si nguda-nguda, tapi kalak si deban ngempoisa. Ipajekkenndu rumah tapi la penah iinganindu. Isuanindu kebun anggur tapi la penah ipanndu buahna.
31Lembundu igeleh i lebe-lebe matandu tapi la ipanndu sitik pe jukutna. Kaldendu idahndu itegu kalak tapi lanai iulihkenna man bandu. Biri-birindu ibereken man imbang-imbangndu, janah la lit ise pe si nampati kam.
32Iidahndu anak-anakndu ibereken jadi budak bangsa si deban. Tep-tep wari matandu tertulih-tulih nimai anak-anakndu mulih man bandu, tapi sia-sia, sabap lanai kap ia mulihken.
33Sada bangsa si deban muat kerina ulih sinuan-sinuan si latih kal akapndu nuankenca, tapi kai pe la lit ialokenndu, seakatan pendedeh ras penggombang-gombangi kalak si la erngadi-ngadi.
34Kiniseranndu erbanca kam adon.
35Nahendu idemi TUHAN alu ugah si mesui si la ermalem-malem; badanndu dem alu bareh, mulai i bas tapak-tapak nahendu nari seh ku takalndu.
36Itamaken TUHAN kam ras rajandu ku negeri si deban, si lenga penah iinganindu tah nini-ninindu. I jah isembahndu dibata-dibata si ibahan i bas kayu ras batu nari.
37I negeri inganndu ipemerap TUHAN e, sengget kalak kerina ngidah si jadi man bandu. Kam igombang-gombangi ras ipelingling kalak.
38Mbue benih ierdangkenndu tapi sitik ngenca buahna, erkiteken ipangani labang sinuan-sinuanndu e.
39Isuanindu kebun anggur ras ipekena-kenandu, tapi la iperanindu buah anggur e ntah pe minem launa, erkiteken ipangani nipe-nipe batang anggur e.
40I ja pe turah batang saitun i negerindu e, tapi la lit minak saitunndu, erkiteken mis naktaken mutikna pe.
41Lit anakndu dilaki ras diberu, tapi kebenen me kam, erkiteken ibaba kalak ia jadi tabanen perang.
42Kerina batang kayu ras sinuan-sinuanndu keri ipan labang.
43Bangsa si deban si tading i negerindu erdekahna ertambahna kuasana, sedangken kam erdekahna reh urakna kuasandu.
44Melala senna si man pinjamenndu, tapi senndu la lit sada pe man pinjamenna. Dungna ikuasaina kam, janah kam ngikut-ngikut nari.
45Kerina mara enda jadi sikerajangenndu, janah lalap la erleka ras kam ngayak kam kernep kerina, erkiteken la iikutkenndu TUHAN Dibatandu ras la icikepndu kerina undang-undang si IberekenNa man bandu.
46Mara enda ndai jadi tanda ukumen Dibata man bandu ras man sinursurndu asa lalap seh asa lalap.
47Ipasu-pasu TUHAN kerina si ibahanndu, tapi la kam nggit ngelakoken si ngena AteNa alu meriah ras ukur menahang.
48Emaka ibere TUHAN kam iperbudak musuh-musuhndu. Muas, melihe, ras manjang-anjang me kam, janah i bas kai pe kam kekurangen. Idedeh musuhndu kam alu mesangat, seh kernep kam.
49Ibaba TUHAN sada bangsa i tampuk doni nari ngelawan kam, bangsa si la iangkandu cakapna. Itangkisna kam bali ras penangkis rajawali.
50Ia kejam janah la ncidahken perkuah ate man kalak si nguda ntah metua.
51Ipanna asuh-asuhen ras sinuan-sinuanndu, emaka mate kelihen me kam. La sitik pe itadingkenna man bandu gandum, anggur, minak saitun, lembu ntah biri-biri, seh maka mate kam.
52Iperangna tep-tep kota i bas negeri si ibereken TUHAN Dibatandu man bandu, janah itembok bentengndu si meganjang si ipenalemndu ngampang-ngampangi kam, runtuh.
53Sanga ikepung musuh-musuhndu kam, bage susahna ras sulit iakapndu muat nakan seh maka ipanndu anak-anakndu si ibereken TUHAN Dibatandu man bandu.
54Sedangken kalak si tuhu-tuhu pe ia kesusuren kalak bayak, sulit kal akapna i bas paksa ikepung musuh e, seh maka ipanna nge piga-piga anakna perban lanai lit pangan si deban. Anak si ipanna e sitik pe la iberena man seninana, tah man ndehara si ikelengina, ntah pe man anak-anakna si tading denga.
55(Ul 28:54)
56Diberu si tuhu-tuhu pe ia sinursur kalak bayak, si la penah ndedeh taneh pe perban bayakna, bage ka nge perbahanenna. Sanga ikepung musuh kotana, bage sulitna akapna muat nakan, seh maka alu erbuni-buni ipanna anakna si mbaru tubuh ras kerina si ndarat i bas beltekna nari kenca anak e tubuh. Sitik pe la ibagikenna man perbulangen si ikelengina ntah pe man anakna si deban.
57(Ul 28:56)
58Adi la iikutkenndu alu tutus kerina pengajaren Dibata si isuratken i bas kitap enda, adi la ipehagandu gelar TUHAN Dibatandu si mulia dingen si mejin e,
59IberekenNa man bandu ras man sinursurndu penakit si la banci malem, ras penakit langket-langket si la erpeltep-peltep.
60IberekenNa sekali nari man bandu kerina penakit si man kebiaren si ialamindu i Mesir mbarenda, janah la ndigan pe kam malem-malem.
61IberekenNa pe erbage-bage penakit ras penakit langket-langket, si la isingetken i bas kitap undang-undang ras pengajaren Dibata enda, maka kam kernep.
62Aminna pe beliganndu nggo seri ras bintang-bintang i langit tapi piga-piga kalak ngenca kam si tading nggeluh, erkiteken la iikutkenndu TUHAN Dibatandu.
63Bagi riahna ukur TUHAN mereken kesangapen ras nambahi beliganndu jadi nterem, bage ka me pe riahna UkurNa ngkernepken ras masapken kam. IruahNa kam i negeri si nandangi iinganindu e nari.
64Ipemerap TUHAN kam ku tengah-tengah bangsa si deban, i bas tampuk doni nari ku tampuk doni. I je isembahndu dibata-dibata si ibahan i bas kayu ras batu nari, dibata-dibata si lenga penah isembahndu tah isembah nini-ninindu.
65I japa pe la datndu dame. La lit ingan si banci ikataken inganndu. Idemi TUHAN kam alu kearun ate, la lit ketenangen, la lit pengarapen.
66Geluhndu lalap i bas bahaya ras kebiaren. Suari ras berngi kam irimrimi kebiaren, kam nggeluh tetap mbiar mate.
67Pusuhndu debet-debet dem kebiaren ngenehen kai saja si idahndu. Adi erpagi-pagi ben min atendu; adi nggo ben erpagi-pagi min atendu.
68Ibaba TUHAN kam mulih ku Mesir tare kapal, aminna pe penah IkatakenNa maka lanai ndigan pe kam mulihken ku jah. I jah icubakenndu ndayaken bandu jadi budak musuh-musuhndu, tapi ise pe la nggit nukur kam."