Dual PanelJosua jadi gancih Musa
1Iterusken Musa ngerana man bangsa Israel,
2nina, "Nggo seratus dua puluh tahun umurku, emaka lanai bo aku ngasup jadi peminpinndu. Tambah si e TUHAN pe nggo ngataken man bangku, maka labo banci kukepari Lau Jordan enda.
3TUHAN Dibatandu jine erdalan arah lebendu ngkernepken bangsa-bangsa si tading i jah, maka kam banci ngiani negeri e. Josua me jadi peminpinndu sue ras si ikataken TUHAN.
4TUHAN ngkernepken kerina bangsa-bangsa e bali ras PenalukenNa Sihon ras Og, raja bangsa Amori, dingen ngkernepken negerina.
5TUHAN ngendesken bangsa-bangsa e ku bas tanndu, ras arus maka payo kal bagi si nggo kukataken man bandu e perbahanenndu man bangsa-bangsa e.
6Tetapken lah ukurndu janah tek lah. Ula kam mbiar man bana. TUHAN Dibatandu kap si ngarak-ngarak kam. La kam juru IbahanNa ras la kam ItadingkenNa."
7Kenca bage idilo Musa si Josua nina man bana i lebe-lebe bangsa Israel, "Tetapkenlah ukurndu janah tek lah; kam me si mabai bangsa enda guna ndatken negeri si ipadanken TUHAN man nini-ninina.
8TUHAN kap si mabai kam ras si nemani kam. La kam juru IbahanNa la kam ItadingkenNa. Emaka ula bene ukurndu, ula mbiar."
Undang-undang e arus ioge pitu tahun sekali
9Emaka isuratken Musa undang-undang Dibata, iberekenna man imam-imam Lewi, eme kalak si ertugas njagai Peti Perpadanen TUHAN ras man peminpin-peminpin bangsa Israel.
10Iperentahken Musa bagenda man bangsa Israel, "Tiap ujung tahun pepituken, adi tahun nasapken utang nggo ka seh, ogeken undang-undang e alu sora megang i bas Wari Raya Sapo-sapo.
11Ogeken undang-undang e man bangsa Israel sanga ia reh ersembah man Dibata i bas ingan ersembah si sada e.
12Pepulung kerina, dilaki ras diberu, anak-anak, bangsa si deban si tading i kotandu maka kerina banci megiken undang-undang e, ras erlajar mehamat man TUHAN Dibatandu, dingen ngikutken PengajarenNa alu tutus.
13Alu dalan bage sinursurndu si lenga penah megi undang-undang TUHAN Dibatandu banci megisa. Dage banci ipelajarina ngikutken TUHAN kidekah ia nggeluh i negeri si nandangi iinganindu i kepar Lau Jordan."
Perentah TUHAN si perpudina man Musa
14Kenca bage nina TUHAN man Musa, "Lanai kam ndekah nggeluh. Lebuhken Josua, baba ku Kemah Perjumpan maka banci Kubereken man bana perentah-perentahKu." Lawes Musa ras Josua ku Kemah e,
15emaka teridah TUHAN man Musa ras Josua i je, i bas binangun embun si pajek deher pintun Kemah e.
16Nina TUHAN man Musa, "Lanai ndekah mate me kam. Kenca kam mate, bangsa enda lanai setia man bangKu janah ilanggarna perpadanen si Kubahan ras ia. Itadingkenna Aku, isembahna dibata-dibata kalak perbegu si ngiani negeri si nandangi ibengketina e.
17Adi jadi si e, tentu merawa Aku man bana. Kutadingken ia, emaka kernep ia. Melala mara si mesangat jadi man bana, jenari maka ietehna maka si e kerina jadi man bana erkiteken Aku TUHAN Dibatana lanai ras ia.
18Emaka la Aku nggit nampati ia i bas paksa si e, erkiteken nggo ibanna si jahat dingen nembah ku dibata-dibata si deban.
19Genduari suratkenlah ende-enden enda, ajarken man bangsa Israel, maka ende-enden e jadi saksingKu man bana.
20Kutamaken ia ku negeri si dem kebayaken dingen mehumur e, sue ras si nggo Kupadanken man nini-ninina. I jah banci ia ndatken nakan bagi ate-atena, janah ia nggeluh i bas kesenangen. Tapi nilah me ia, isembahna dibata-dibata si deban. Itulakna Aku, ilanggarna perpadanenKu,
21emaka melala mara jadi man bana. Tapi ende-enden enda tetap iendeken sinursurna, jadi saksi ngelawan ia. Sabap genduari pe ope denga Kutamaken ia ku negeri si Kupadanken merekenca man bana, nggo Kueteh perukurenna."
22I bas wari e ka isuratken Musa ende-enden e, janah iajarkenna man bangsa Israel.
23Kenca bage, ngerana TUHAN man Josua anak Nun nina, "Teklah janah tetapkenlah ukurndu. Kam me mabai bangsa Israel mengketi negeri si Kupadanken man bana. Aku nemani kam."
24Isuratken Musa Undang-undang Dibata i bas sada kitap, ijagana kal maka sada pe la lit si tading.
25Kenca nggo dung nina man imam-imam suku Lewi si njagai Peti Perpadanen TUHAN,
26"Aloken kitap Undang-undang Dibata enda, tamaken deherken Peti Perpadanen TUHAN Dibatandu, gelah i je undang-undang e jadi saksi nandangi bangsa TUHAN.
27Kueteh uga kengna ras uga ngelawanna bangsa enda. Kidekah aku nggeluh la erngadi-ngadi ia ngelawan TUHAN, janah ersangatna denga ka kenca aku mate.
28Pepulunglah kerina peminpin-peminpin ras pegawe-pegawe suku-sukundu ku lebe-lebengku, maka banci kuturiken perkara-perkara si enda. Kulebuh langit ras doni jadi saksingku nandangi ia.
29Kueteh maka kenca aku mate, bangsa enda jadi jahat, itulakna kai si nggo kuajarken man bana. Janah i bas paksa si reh enda jumpa mara me ia, erkiteken ibanna TUHAN nembeh alu ngelakoken kai si IlarangNa."
Ende-enden Musa
30Kenca bage ibelasken Musa ende-enden e ngadi-ngadi dung, janah kerina kalak Israel megi-megi.