Dual PanelBangsa Israel si seratus empat pulu empat ribu kalak
1Kenca bage kuidah empat malekat tedis i empat penjuru doni. Iambangna empatna angin i doni enda gelah ula rembus kempak daraten, kempak lawit ntah kempak batang kayu apai pe.
2Janah kuidah ka malekat si deban nangkih i Timur nari mbaba meterai Dibata e me Dibata si nggeluh. Alu sora megang erlebuh ia man malekat si empat, si man bana nggo ibereken Dibata kuasa ncedaken daraten ras lawit.
3Nina malekat e, "Ula lebe cedaken daraten, lawit ntah batang kayu, adi langa dung sitamaken meterai i bas perdempaken suruh-suruhen Dibatanta."
4Janah man bangku ipebetehken lit 144.000 kalak si itamaken meterai Dibata i bas perdempakenna. Kalak e ibuat i bas suku bangsa Israel si sepuludua;
512.000 kalak i bas tep-tep suku nari eme: i bas suku Juda, Ruben, Gad,
6Aser, Naptali, Manase
7Simeon, Lewi, Isasar,
8Sebulon, Jusup, ras Benyamin.
Kalak si nterem si lanai terbeligai
9Kenca bage kunehen ka, janah kuidah i je nterem kal jelma. Ise pe la ngasup meligaisa! Kalak si nterem e rehna i bas kerina bangsa, suku, negara ras i bas kerina cakap nari, janah kerina ia tedis i lebe-lebe kursi kinirajan dingen i lebe-lebe Anak Biri-biri e. Kerina ia make jubah mbentar janahna njemak lambe.
10Kerina ia ngerana alu sora megang, "Keselamatenta reh i bas Dibatanta nari, e me si kundul i kursi kinirajan e dingen i bas Anak Biri-biri e nari!"
11Kerina malekat tedis ngkeleweti kursi kinirajan, pertua-pertua ras mahluk si empat e. Jenari erjimpuh ia i lebe-lebe kursi kinirajan e ayona seh ku taneh janahna nembah man Dibata
12nina, "Amin! Pujin ras kemulian, kepentaren ras pengataken bujur, kehamaten, gegeh, ras kuasa man Dibatanta seh rasa lalap. Amin!"
13Jenari sekalak i bas pertua-pertua e nungkun man bangku nina, "Ise kerina kalak si erjubah mbentar enda, janah i ja nari kin ia?"
14Erjabap aku, "La kueteh Pa! Kam me metehsa." Nina pertua e man bangku, "Enda me kalak si nggo selamat mentasi kiniseran si mbelin nari. Nggo ibersihkenna jubahna dingen ipebentarina alu Dareh Anak Biri-biri e.
15Erkiteken si emaka tedis ia kerina i lebe-lebe kursi kinirajan Dibata, janah suari ras berngi isembahna Dibata i bas Rumah Pertoton. Ia, Si kundul i kursi kinirajan e, tetap ngampang-ngampangi ia.
16Lanai ia muas ntah melihe bage pe lanai ia iparpari matawari ntah las;
17sabap Anak Biri-biri si i tengah-tengah kursi kinirajan e jadi permakanna, janah Anak Biri-biri e si mbabai ia ku ulu lau kegeluhen. Janah Dibata me ngapusi iluhna si mambur."