Dual PanelUkumen nandangi kalak si nembah berhala
1Piga-piga kalak peminpin Israel reh nungkun Aku kerna kai peraten TUHAN.
2Kenca bage seh kata TUHAN man bangku nina,
3"O manusia si ermasap-masap, kalak enda kerina nggo ngendesken pusuhna man berhala-berhala janah ipelepasna berhala-berhala mabai ia kempak dosa. Akapna kin nggit Aku ngaloi penungkunenna e?
4Genduari kataken man bana katangKu, Aku TUHAN si Erdolat. Kasa kalak Israel si nggo ngendesken pusuhna man berhala-berhala janah iberena dirina ibabai berhala e lako erbahan dosa, jenari reh ia nungkun kempak sekalak nabi, idatca me jabapna i bas Aku nari, eme jabap si patut ialokenna i bas berhala-berhala e nari.
5Kerina berhala-berhala e erbanca nilah kalak Israel i bas Aku nari, tapi alu jabapKu e mbera-mbera bangsangKu banci mulihi patuh man bangKu.
6Dage genduari turikenlah man kalak Israel kai katangKu, Aku TUHAN si Erdolat. Jeralah janah tadingken berhalandu si ciga ateKu e.
7Adi lit kalak Israel tah bangsa si deban si ringan i tengah-tengah bangsa Israel nadingken Aku jenari isembahna berhala, janah kenca bage reh ia nungkun sekalak nabi, maka Aku jine me si njabapsa.
8Kulawan ia janah Kubahan ia jadi usihen man kalak si deban. Kupeserap ia i bas bangsangKu nari, gelah ieteh bangsangKu maka Aku kap TUHAN.
9Adi sekalak nabi erguak seh maka iberekenna jabap si salah, si e jadi erkiteken Aku, TUHAN, nggo erguak man bana. Emaka Kupeserap ia i bas bangsa Israel nari.
10Subuk nabi bage pe kalak si nungkun nabi e duana ndatken ukumen si seri.
11Si e Kulakoken gelah kalak Israel ula nadingken Aku, janah gelah ula icemarkenna bana alu dosana. Alu bage bangsa Israel tetap jadi bangsangKu janah Aku Dibatana." Bagenda me nina TUHAN si Erdolat.
Nuah, Daniel ras Jop
12Kata TUHAN seh man bangku nina,
13"O manusia si ermasap-masap, adi lit sada negeri erdosa janah lanai patuh man bangKu, emaka Kuukum negeri e. Kukernepken persedian panganna, Kutamaken ku je kelihen, janah Kubunuh subuk manusia bage pe asuh-asuhenna.
14Aminna pe Nuah, Daniel, ras Jop ringan i je, kiniulin kalak si telu e erguna lako ngkelini geluhna saja ngenca. Bagenda me nina TUHAN si Erdolat.
15Banci ka nge Kusuruh ku je rubia-rubia si merawa njerngem rayatna, seh maka negeri e dem alu kebiaren janah ise pe la pang mentas arah e.
16Aminna pe Nuah, Daniel, ras Jop ringan i je maka erkiteken Aku, Dibata si nggeluh, TUHAN si Erdolat, teluna ia labo ngasup ngkelini anak-anakna jine pe. Geluhna jine ngenca terkelinisa, janah negeri e salih me jadi taneh si terulang.
17Banci ka pe Kubaba perang ku negeri e, janah Kutamaken ka je pedang si ntelap lako ngkernepken subuk manusia bage pe asuh-asuhen.
18Aminna pe Nuah, Daniel, ras Jop ringan i je, maka erkiteken Aku, Dibata si nggeluh, TUHAN si Erdolat, tehna ia labo ngasup ngkelini anakna jine pe, tapi geluhna saja ngenca terkelinisa.
19Banci ka pe Kutamaken ku negeri e penakit laya-laya, janah erkiteken nembehna ateKu, melala mate subuk manusia bage pe asuh-asuhen.
20Aminna pe Nuah, Daniel, ras Jop ringan i je, maka erkiteken Aku, Dibata si nggeluh, TUHAN si Erdolat teluna ia labo ngasup ngkelini anakna jine pe. Kiniulin kalak e, ngasup ngkelini geluhna saja nge ngenca."
21Enda me kai si ikataken TUHAN si Erdolat, "Kudabuhken me empat ukumen si mberatna kal ku Jerusalem lako ngkernepken subuk manusia bage pe asuh-asuhen. Ukumen e, eme: kelihen, perang, rubia-rubia si merawa, ras penakit laya-laya.
22Kune lit kalak si pulah janah ngasup ngekelini anak-anakna, perdiatekenlah ia tupung reh ku kam. Nehenlah uga jahatna ia, janah teklah kam maka ukumen si Kudabuhken ku Jerusalem e, bujur kap.
23Jenari iertindu ka pe maka cukup nge alasen kerna kai si nggo Kulakoken e." Bagenda me nina TUHAN si Erdolat.