Dual Panel1Nina Dibata, "O manusia si ermasap-masap, pan gulungen enda; kenca bage to ngeranalah kempak bangsa Israel."
2Emaka kungangaken babahku, jenari IberekenNa gulungen surat ndai, maka kupan.
3Nina, "O anak manusia si ermasap-masap, panlah gulungen surat si Kubereken enda; isi beltekndu alu e." Kupan gulungen surat e, janah nanamna entebu bagi tengguli.
4Kenca bage nina Dibata, "O manusia si ermasap-masap, to lawes ku bangsa Israel, jenari kataken man bana kai si Kusuruh kam ngatakenca.
5La kap kam Kusuruh kempak bangsa si deban simesera akapndu ngantusi cakapna, tapi kempak kalak Israel jine nge.
6Adi Kusuruh kam kempak bangsa-bangsa si mbelin si cakapna mesera dingen la iangkandu, tentu ibegikenna nge kam.
7Tapi la lit sada pe kalak Israel si nggit megiken; Aku pe labo ia nggit megikenca. Kerina ia mekeng dingen nimbak.
8Genduari Kubahan kam mekeng dingen mersik lako ngelawan bangsa e.
9Kubahan kam paguh bagi lingling batu, piherna bagi batu intan. Dage ula kam mbiar ngenehen pemberontak e."
10Tole nina Dibata, "O manusia si ermasap-masap, perdiatekenlah alu tutus kai si Kukataken man bandu, janah tetaplah inget.
11Kenca bage laweslah ndahi senina-seninandu si sada bangsa, si sangana i bas pembuangen, jenari turiken man bana kai si Kukataken man bana, Aku TUHAN si Erdolat, subuk iperdiatekenna kam tah lang."
12Kenca bage Kesah Dibata ngangkat aku, jenari kubegi arah pudingku sada sora ergeruhguh si megang nina, "Pujilah kemulian TUHAN i Surga i das!"
13Kubegi sora kabang rubia-rubia ndai engkepak-kepak i awang-awang, bage pe sora roda-roda ndai si bali gangna ras linur.
14Kuasa TUHAN reh ku aku alu megegeh, janah tupung KesahNa mabaken aku, ngilas kuakap janah merawa ateku.
15Emaka seh aku i Tel Abib i tepi Lau Kebar, i ja kalak si ibuang e sangana ringan. Pitu wari dekahna aku i je, janah kidekah si e, jengang aku ngukuri kai si nggo kuidah ras si kubegi.
TUHAN ngangkat Esekiel jadi si erjaga (Yeh 33:1-9)
16Kenca lepas si pitu wari e, ngerana TUHAN man bangku nina,
17"O kam manusia si ermasap-masap Kubahan kam jadi si njaga i bas bangsa Israel. Kam nehkenca man bana kai persinget si Kubereken man bandu.
18Adi Kukataken maka sekalak kalak jahat nandangi mate me, tapi la ipersingetindu gelah ia jera i bas dalanna nari maka ia terkelin, la banci lang mate me ia i bas dosana, janah Kuidoi kam kerna kematenna.
19Tapi adi ipersingetindu kalak jahat, janah la ingadikenna erbahan dosa, la banci lang mate me ia i bas dosana, tapi kam terkelin.
20Adi lit sekalak bujur ibenakenna erbahan jahat, janah Kutamaken bahaya i lebe-lebena, emaka la banci lang mate ia adi la ipersingetindu. Mate ia erkiteken dosa-dosana la Kuinget kai si mehuli si nggo ilakokenna janah Kuidoi kam kerna kematenna.
21Adi ipersingetindu kalak bujur gelah ula erdosa, jenari ibegikenna kam janah la ia erbahan dosa, emaka terus me ia nggeluh, janah kam pe terkelin ka."
Esekiel jadi pekak
22Kugejap kuasa TUHAN erdahin i babongku, janah kubegi Ia ngerana nina, "Kekeken, laweslah ku baluren e. Ngerana ateKu man bandu i je."
23Emaka berkat aku ku baluren e, janah i je kuidah kemulian TUHAN bali ras si kuidah mbarenda i tepi Lau Kebar. Minter aku langkem i babo taneh,
24tapi Kesah Dibata mengketi aku, jenari IpetedisNa aku. Nina TUHAN man bangku, "Mulihlah ku rumah, janah erukilah bandu i rumah.
25O manusia si ermasap-masap, itambat me kam alu tinali, janah la kam banci ndarat ku tengah-tengah jelma si nterem.
26Kubahan maka leket dilahndu ku langit-langit babahndu, seh maka kam pekak, lanai ngasup ngerana mpersingeti bangsa pemberontak e.
27Emaka kenca Aku ngerana ka mulihi man bandu, janah Kubereken mulihi man bandu kuasa ngerana, i bas gelarKu, TUHAN si Erdolat arus ikatakenndu man bangsa e kai si Kukataken. Deba nggit megikenca, tapi deba la kam diatena pe, sabap bangsa pemberontak kap ia."