Dual PanelDibata ngangkat Esekiel jadi si erjaga (Yeh 3:16-21)
1Kata TUHAN seh man bangku nina,
2"O manusia si ermasap-masap kataken man bangsandu maka enda me si jadi adi Kubahan perang i bas sada negeri. Rayat negeri milih sekalak jelma jadi si erjaga.
3Kenca idahna musuh reh, ibahanna tanda bahaya gelah kerina kalak metenget.
4Adi ibegi kalak sora ndai tapi la diatena pe, jenari reh musuh e ibunuhna ia, adi bage ia nge si salah kerna kematenna.
5Kematenna erdandanken kesalahenna jine, sabap la diatena persinget ndai. Adi iperdiatekenna, tentu pulah nge min ndai ia.
6Tapi adi penjaga ndai ngidah musuh reh, tapi la ibahanna tanda bahaya, reh musuh e jenari ibunuhna kalak perdosa e kerina, si erjaga e Kubahan ertanggung jawab kerna kematen kalak ndai.
7Dage, o manusia si ermasap-masap, Kuangkat kam jadi si erjaga i bas bangsa Israel. La banci lang isehkenndu man bana kata pertenget si Kubereken man bandu.
8Adi Kupebetehken man sekalak kalak jahat mate me ia, tapi la ipersingetindu ia gelah iperobahina lagu langkahna maka terkelin, jenari mate ia i bas dosana, kam arus ertanggung jawab kerna kematenna.
9Tapi adi ipersingetindu, janah la ingadikenna erbahan dosa, mate me ia i bas dosana, tapi kam terkelin."
Tep-tep kalak ertanggung jawab
10Kata TUHAN seh man bangku nina, "O manusia si ermasap-masap, kataken mulihi man kalak Israel cakap si belaskenna, eme, 'Mberat akap kami nahanken dosa ras kesalahen kami. Daging kami reh kertangna. Uga banci kami nggeluh?'
11Kataken man bana maka asa tuhu Aku nggeluh, Aku TUHAN si Erdolat, la ukurKu meriah ngidah sekalak perdosa mate. Riahen ukurKu ngidahsa ia ngadi erbahan dosa gelah ia nggeluh. "O Israel, ngadikenlah kejahatenndu. Ngkai maka nggiten kam mate?"
12Dage, o manusia si ermasap-masap, kataken man kalak Israel maka adi lit sekalak bujur erbahan dosa, si mehuli si nggo ibahanna labo banci engkelini ia. Adi kalak jahat ngadi erbahan si jahat, la ia iukum, tapi kalak bujur ibenakenna erbahan dosa, la banci ia pulah i bas ukumen nari.
13Banci jadi Aku nggo erpadan mereken kegeluhen man kalak bujur, tapi adi mulai ia rukur maka kiniulinna i bas paksa-paksa si nggo lepas nggo bias jenari ibenakenna erbahan dosa, la Kuinget sada pe kiniulinna si nggo lepas. La banci lang mate ia erkiteken dosa-dosana.
14Banci jadi nggo Kukataken man kalak jahat maka nandangi mate me ia, tapi adi ingadikenna erdosa, jenari ilakokenna kai si benar dingen bujur,
15umpama: iulihkenna barang jaminen kalak si ngeraih duit man bana, tah pe iulihkenna barang si itangkona, adi ingadikenna erbahan dosa jenari ikutkenna undang-undang si mereken kegeluhen, emaka la ia mate, tapi nggeluh.
16Kualemi dosa si ibahanna, janah nggeluh me ia sabap nggo benar dingen bujur perbahanenna.
17Tentu ikataken bangsandu maka perbahanenKu e la bujur! Lang, perbahanenna e nge si la bujur.
18Katawari kalak bujur ngadi erbahan si bujur, jenari ibenakenna erbahan jahat, mate ia erkiteken kejahatenna.
19Katawari kalak jahat ngadi erbahan dosa, jenari ibahanna kai si benar dingen bujur, nggo ikelinina kesahna.
20Tapi ikataken kalak Israel maka kai si Kulakoken e la bujur. Kai gia nina, Kuukum nge ia rikutken perbahanenna."
Berita kerna ndabuhna Jerusalem
21I bas wari pelimaken, bulan si pesepuluhken, tahun si pesepuluh duaken, sanga kami i pembuangen, lit sekalak dilaki lompat i Jerusalem nari, jenari iturikenna man bangKu maka kuta e nggo ndabuh.
22Karabenna ope denga ia reh, nggo kugejapken kuasa TUHAN rembak ras aku. Kenca kalak ndai reh, lanai aku pekak, tapi nggo banci ngerana.
Dosa-dosa bangsa e
23Kata TUHAN seh man bangku nina,
24"O manusia si ermasap-masap; kalak si ringan i bas kuta-kuta Israel si nggo runtuh ngerana nina, 'Abraham nai sekalak ngenca, tapi kerina taneh e ibereken man bana. Kita genduari nggo nterem, emaka taneh e kita empuna.'
25Erdandanken si e turikenlah man bangsa e katangKu, Aku TUHAN si Erdolat, bagenda: Ipanndu daging si lit denga darehna. Isembahndu berhala; munuh kam. Kai sabapna maka iakapndu taneh e kam empuna?
26Ernalem kam man pedangndu. Lagu langkahndu ciga ate. Kerina kam erlua-lua. Ngkai maka pang kam ngatakenca maka taneh e kam empuna?
27Asa tuhu Aku nggeluh, TUHAN si Erdolat, kerina kalak si ringan i daraten kuta ipan rubia-rubia kerangen. Kalak si cebuni i das deleng ras i bas gua-gua, mate iban penakit.
28Kubahan negeri e jadi ingan si terulang, janah kuasa si iagahkenna masap me. Deleng-deleng Israel terulang seh maka la ise pe ngasup mentas arah e.
29Kenca Kuukum bangsa e erdandanken dosa-dosana janah Kubahan negeri e terulang, jenari ietehna maka Aku kap TUHAN."
Ulih kata si ibelasken nabi
30Nina TUHAN, "O manusia si ermasap-masap, kam nggo jadi percakapen i tengah-tengah bangsandu, asum ia pulung deherken tembok-tembok kota tah i bas kerabangen rumahna. Nina sapih-sapih ia, 'Ota si dengkehken kai nina TUHAN sendah.'
31Emaka pulung bangsangKu ndengkehken kata si man katakenndu, tapi la idalankenna kai si isuruhndu. I bas biberna nari luar kata kekelengen, tapi i bas pusuhna untungna saja ngenca iturikenna.
32Kam bali akapna ras sekalak perkolong-kolong si mejile sorana rende, ngendeken ende-enden ate ngena, janah beluh ka pe ngkuit kulcapi. Ibegina kerina katandu, tapi sada kal pe la iikutkenna.
33Tapi kenca jadi pagi kerina si ikatakenndu e, sabap ugapa pe jadi nge, kenca bage ietehna me maka pernah lit sekalak nabi i tengah-tengahna."