Dual PanelUkumen Dibata man Edom
1Kata TUHAN seh man bangku nina,
2"O manusia si ermasap-masap, sumpahilah negeri Edom.
3Kempak rayatna kataken katangKu, Aku TUHAN si Erdolat, bagenda: Aku kap musuhndu, o deleng-deleng Edom! Kubahan me kam jadi taneh si terulang.
4Kubahan kuta-kutandu jadi meruntuh, janah tanehndu jadi melungen. Kenca bage ietehndu maka Aku kap TUHAN.
5Nai nari imusuhindu kap lalap Israel, janah ipelepasndu ia ibunuhi tupung ia jumpa cilaka, i bas paksa ia ndatken ukumen si perpudina erkiteken dosa-dosana.
6Erdandanken si e, asa tuhu Aku nggeluh, Aku TUHAN si Erdolat, kematen me jadi sikerajangenndu, janah la banci kam pulah i jenari. Kam nggo ersalah munuh, emaka pemunuh lalap ngayak-ngayak kam.
7Kubahan taneh deleng-deleng Edom terulang, janah kasa kalak si mentas arah e Kubunuh.
8Deleng-deleng Kutamburi alu mait, janah mait kalak si mate i bas pertempuren namburi deleng-deleng ras baluren-baluren.
9Kubahan maka rasa lalap kam jadi taneh si melungen janah asa ndigan pe lanai lit kalak ringan i bas kuta-kutandu. Kenca bage itehndu me maka Aku kap TUHAN.
10Juda ras Israel rikut ras tanehna, ikatakenndu kam empuna, janah nindu ibuatndu e man bandu, aminna gia Aku, TUHAN kap Dibatana.
11Erdandanken si e, asa tuhu Aku enggeluh, Aku TUHAN si Erdolat, Kubalas me man bandu pernembeh atendu, cian atendu, bage pe elem-elem atendu nandangi bangsangKu. Ieteh bangsangKu maka kam Kuukum erkiteken perbahanenndu man bana.
12Emaka ietehndu me maka Aku, TUHAN, nggo megi kata-kata megombang si ibelaskenndu nindu, "Deleng-deleng Israel nggo melungen, janah nggo ibereken jadi sikerajangenta."
13O Edom, nggo Kubegi rananndu si la erluhu, cakapndu si meganjang ngelawan Aku."
14Nina TUHAN si Erdolat, "Kerina doni ermeriah ukur, erkiteken negerindu Kubahan jadi taneh terulang,
15bali ras sanga kam ermeriah ukur ngidah Israel, ertangKu si meherga e ikernepken. Deleng-deleng Seir, kerina taneh Edom pe jadi terulang me. Kenca bage kerina kalak meteh maka Aku kap TUHAN."