Dual Panel1Kugejap kuasa TUHAN, janah KesahNa maba aku nusur ku sada baluren. Baluren ndai dem alu tulan-tulan.
2Ibabai TUHAN aku niar-niar i baluren e, janah i je kuidah seh kal buena tulan-tulan, janah tulan-tulan ndai kerah kal.
3Nina TUHAN man bangku, "O manusia si ermasap-masap, banci kin tulan-tulan enda nggeluh mulihi?" Ngaloi aku, "O TUHAN si Erdolat, Kam ngenca metehsa."
4Nina TUHAN, "Ngerana kam kempak tulan-tulan e. Kataken man tulan-tulan si nggo kerah e gelah ibegikenna katangKu.
5Turiken man bana katangKu enda, Aku, TUHAN si Erdolat, bagenda: Kuembusken KesahKu ku bas kam maka kam nggeluh mulihi.
6Kutamaken uratndu ras dagingndu jenari Kubaluti kam alu kuling. Kutamaken kesah i bas kam, emaka nggeluh kam mulihi. Kenca bage ietehndu me maka Aku kap TUHAN."
7Emaka ernubuat aku sue ras si iperentahken TUHAN. Tupung aku sanga ngerana denga, kubegi sora erderak-derak, janah tulan-tulan ndai mulai ersada.
8Sanga kuperdiateken, tulan-tulan ndai itutupi urat ras daging, jenari kuling. Tapi kula ndai la sada pe erkesah.
9Kenca bage nina Dibata man bangku, "O manusia si ermasap-masap, ngeranalah kam kempak angin. Kataken man angin maka Aku, TUHAN si Erdolat merentahken ia gelah reh i japa nari pe guna ngembusken kesah kempak kula si mate enda kerina, maka nggeluh ka ia mulihi."
10Emaka ernubuat aku sue ras si iperentahken TUHAN man bangku. Bengket me kesah ku kula ndai, emaka nggeluh dingen tedis ia kerina, janah perban teremna, bias jadi sada serdadu si mbelin.
11Nina Dibata bangku, "O manusia si ermasap-masap, bangsa Israel bali kap ras tulan-tulan ndai. Ikatakenna maka ia nggo kerah, pengarapenna nggo bene, nggo peltep.
12Dage ernubuatlah man bangsangKu, Aku TUHAN si Erdolat; Kutalangi me kuburenna, Kupedarat ia, jenari Kubaba mulih ku taneh Israel.
13Kenca Kutalangi kuburen ingan bangsangKu ikuburken, janah Kupedarat ia i jenari, ietehna me maka Aku kap TUHAN.
14Kutamaken kesahKu i bas ia, maka nggeluh ia mulihi, jenari Kubere ia ringan i bas negerina jine. Kenca bage ietehna me maka Aku kap TUHAN. Aku, TUHAN nggo melasken katangKu, janah la banci lang Kusehken bagi si Kukataken e."
Juda ras Israel jadi sada kerajan mulihi
15Kata TUHAN seh ka man bangku nina,
16"O manusia si ermasap-masap, buatlah sada ciken kayu, suratken i je kata-kata enda: "Kerajan Juda". Kenca bage buat ka ciken si deban, jenari suratken i je kata-kata: "Kerajan Israel".
17Kenca bage cikep duana ciken ndai, persada ujung-ujungna seh maka tempa-tempa ia sada ciken.
18Adi isungkun bangsandu kam kai ertina si e,
19kataken man bana, Aku, TUHAN si Erdolat, nandangi muat ciken si nggambarken Israel, jenari Kupersada ras ciken si nggambarken Juda. I bas ciken si dua e nari Kubahan sada ciken janah Kucikep i bas tanKu.
20Cikeplah duana ciken emaka idah bangsandu.
21Kenca bage kataken man bana maka Aku, TUHAN si Erdolat, nandangi muat kerina bangsangKu i bas negeri-negeri e nari, ku ja ia nggo lawes. Kupepulung ia, emaka Kubaba ia mulihi ku tanehna jine.
22Kubahan ia jadi sada bangsa i bas taneh e, i deleng-deleng Israel. Sada ngenca pagi rajana kerina, janah lanai ia terbagi i bas dua bangsa, tah pe terpecah i bas dua kerajan.
23Lanai iliamina bana alu erbahan dosa dingen nembah man berhala-berhala ras gana-gana si nggesuh. Kupulahi ia kerina i bas perbahanen-perbahanen dosa si mabai ia nilah i bas Aku nari. Kubersihken ia kerina; ia jadi bangsangKu, janah Aku jadi Dibatana.
24Alu tutus iikutkenna Undang-undangKu. Ersada pagi ia i teruh pemerentahen sekalak raja, sekalak raja si bali ras suruh-suruhenKu Daud nai.
25I bas taneh si Kubereken man suruh-suruhenKu Jakup, taneh si iiani nini-ninina nai, i je me pagi bangsangKu tading seh rasa lalap, terus ku anak-anakna bage pe kerina kesusurenna. Raja si bali ras suruh-suruhenKu Daud e, merentah ia pagi seh rasa lalap.
26Kubahan sada perpadanen ras ia gelah jadi sada jaminen kerna keamanenna seh rasa lalap. Kupasu-pasu ia, janah Kubahan maka ertambah-tambah teremna. Rumah PertotonKu Kutamaken i bas tanehna, janah i je me pajek seh rasa lalap.
27I je me Aku ringan ras ia; Aku jadi Dibatana, ia jadi bangsangKu.
28Kenca Kutamaken Rumah PertotonKu e i tengah-tengahna alu nteguh seh rasa lalap, kenca bage kerina bangsa-bangsa meteh maka Aku, TUHAN, nggo milih Israel jadi bangsangKu."