Dual PanelLau si maler i bas Rumah Pertoton nari
1Kenca bage ibabai dilaki ndai aku mulih ku gerbang Rumah Pertoton. I bas dalan bengket ku Rumah Pertoton e kuidah lau ndarat i teruh pintu nari, janah maler ku kenjulu sue ras pengala Rumah Pertoton e. Lau e maler arah teruh Rumah Pertoton bagin Selatan mentasi dampar Selatan batar-batar.
2Kenca bage ibabai dilaki ndai aku ndarat i bas kesain Rumah Pertoton e nari arah gerbang Utara, jenari ku gerbang si ngala kempak Timur. I je lau si kitik-kitik ndai maler ndarat arah kemuhen gerbang e.
3Janahna nibarisa alu sibar-sibar ibabai dilaki ndai aku lima ratus meter ku kenjulu ngikutken paleren lau e. Isuruhna aku ngeparisa, janah i bas ingan e, launa terjeng gedap tapak-tapak ngenca bagesna.
4Kenca bage isibarina ka limaratus meter nari; lau nggo seh ngayak tiwenku. Limaratus meter nari ka kuberneh, launa nggo seh terjeng awakku.
5Isibarina ka lima ratus meter nari, janah i je launa nggo mbages, seh maka lanai terdalani ngepar. Adi ngepar ate kalak terpaksa ia erlangi.
6Nina dilaki e bangku, "O manusia si ermasap-masap, perdiatekenlah kerina si e alu mehuli." Kenca bage ibabaina aku mulih arah tepi lau belin e,
7janah kuidah gedang-gedang tepi lau e melala kal batang kayu.
8Nina man bangku, "Lau enda maler arah negeri e ku kenjulu, jenari ku Baluren Jordan, terus ku Lawit Mate. Kenca seh i Lawit Mate, Lau masin si lit i je isambarina jadi lau malem.
9Kujapa pe lau e maler, melala i je rubia-rubia ras nurung. Lau e mahanca maka lau si lit i Lawit Mate jadi malem, janah ku japa pe ia maler, i je minter lit kegeluhen.
10Mulai i Sumbul En-Gedi nari terus ku Sumbul En-Eglaim, nterem penjala nurung engkerahken jalana i tepi lawit e. Erbage-bage nurung lit i je, bali ras si lit i Lawit Tengah.
11Tapi lau si lit i bas paya-paya ras kolam-kolam si gedang-gedang tepi lawit e la isambari jadi lau malem. Lau e tetap i je gelah banci man ingan muat sira.
12I gedang-gedang tepi lau e, arah kawes ras kemuhen turah erbage-bage batang kayu si man pangan buahna. Bulungna la melus-melus janah buahna la erkeri-kerin. Tep-tep bulan lit buahna si mbaru, erkiteken launa eme si maler i bas Rumah Pertoton e nari. Buahna man pangan, bulungna jadi tambar."
Perbalengen negeri e
13Nina TUHAN si Erdolat, "Enda me perbalengen taneh si man bagi-bagindu man suku-suku si sepuludua e, i je suku Jusup ngaloken dua bagin.
14Nai erpadan Aku man nini-ninina maka Kubereken taneh e man sikerajangenna; emaka genduari begikenlah alu bujur sapih-sapih kam.
15Balengna si arah Utara mulai i Lawit Tengah nari ku kenjulu arah kota Hetlon, Hamat terus ku kota Sedad,
16jenari ku kota-kota Berota ras Sibraim (inganna kelang-kelang kerajan Damaskus ras kerajaan Hamat), terus ku kota Tikon (inganna i bas perbalengen kerajan Hauran).
17Dage balengna si arah Utara mulai i Lawit Tengah nari ku kenjulu seh ku kota Hasar-Enon; alu bage daerah Damaskus ras Hamat lit i Utara perbalengen e.
18Balengna si arah kenjulu mulai i bas sada ingan kelang-kelang daerah Damaskus ras Hauran, jenari terus ku Selatan ngikut-ngikut Lau Jordan seh ku Tamar i Lawit Mate. Dage jahen Lau Jordan eme taneh Israel, janah julunna Gileat.
19Balengna si arah Selatan mulai i Tamar nari ku kenjahe, terus ku Kades, kenca bage sider ku Utara ngikutken perbalengen ras Mesir seh ku Lawit Tengah.
20Balengna si arah kenjahe eme Lawit Mate terus ku Utara ngayak seh i bas sada ingan jahen dalan ku Hamat.
21Bagikenlah taneh enda sapih suku-sukundu,
22janah eme sikerajangenndu seh rasa lalap. Bangsa si deban si ringan i tengah-tengahndu janah anak-anakna si tubuh i bas negeri e, arus dat bagin tupung taneh e ibagi-bagikenndu. Man bana pe arus bali ibahan ras man kalak Israel.
23Man kerina bangsa si deban arus ibereken taneh radu ras kalak Israel i ja ia ringan. Aku TUHAN si Erdolat nggo melasken katangKu."