Alkitab Mobile SABDA
[VER] : [KARO]     [PL]  [PB] 
 <<  Yehezkiel 48 >> 

Pembagin taneh man suku-suku Israel

1Baleng negeri e arah Utara mulai i Lawit Tengah nari ku kenjulu terus ku Kuta Hetlon, terus ku dalan bengket ku Hamat, jenari ku Kuta Hasar-Enam, seh ku perbalengen Damaskus ras Hamat. Tep-tep suku arus ngaloken sada bagin taneh mulai i perbalengen si arah kenjulu nari terus ku Lawit Tengah, rikutken uruten si tersena arah teruh enda, i Utara nari ku Selatan: Dan Aser Naptali Manase Eperaim Ruben Juda

2(Yeh 48:1)

3(Yeh 48:1)

4(Yeh 48:1)

5(Yeh 48:1)

6(Yeh 48:1)

7(Yeh 48:1)

Bagin si iserapken i tengah-tengah negeri e

8Bagin taneh si tersena arah teruh enda arus iserapken gelah ipake guna keperlun tertentu. Belangna i Utara nari ku Selatan sepulu dua setengah kilometer, janah gedangna i kenjulu nari ku kenjahe bali ras bagin si ibereken man suku-suku e. I bas bagin enda me ingan Rumah Pertoton e.

9I tengah-tengah taneh e, sada bagin si gedangna sepulu dua setengah kilometer, belangna sepuluh kilometer, iserapken man TUHAN.

10I tengah-tengah taneh eme ipajekken Rumah Pertoton man TUHAN. Imam-imam arus ndat bagin i bas taneh si badia e. Belangna baginna i kenjulu nari ku kenjahe sepulu dua setengah kilometer janah i Utara nari ku Selatan lima kilo meter.

11Bagin taneh si badia enda jadi sikerajangen imam-imam kesusuren Sadok. Kalak enda tetap patuh ndalinken dahinna, janah la iikutkenna bangsa Israel si debanna ngelakoken si salah, bagi kalak si deban i bas suku Lewi.

12Erkiteken si e, lit baginna tersendiri deherken sikerajangen kalak Lewi, janah bagin si eme si badiana kal.

13Kalak Lewi pe lit ka nge baginna tersendiri, eme arah Selatan bagin imam-imam e, si e pe sepuludua setengah kilometer ka nge gedangna i kenjulu nari ku kenjahe, janah lima kilometer i Utara nari ku Selatan.

14Bagin si iserapken man TUHAN eme bagin taneh si mehulina kal i bas taneh, janah si e la banci sitik pe idayaken tah itukarken tah pe ibereken man kalak si deban. Taneh e badia kap, janah e sikerajangen TUHAN.

15Iba-iba taneh si nggo iserapken enda ndai, gedangna sepulu dua setengah kilometer, belangna dua setengah kilometer, si e la badia janah banci ipake jelma si nterem. Banci ia ringan i je, janah banci pe ipakena taneh e. Kuta arus ipajekken i tengah-tengah taneh e

16janah arus persegi; gedangna ras belangna dua seperempat kilometer.

17Sekelewet kuta e lit taneh kosong, belangna seratus dua puluh lima meter.

18Iba-iba taneh kenca kota e ipajekken, eme i Selatan bagin si badia ndai, si belangna lima ras dua setengah kilometer terjulun kuta e, bage pe lima ras dua setengah kilometer jahen kuta e, banci ipake penduduk si ringan i bas kuta jadi perjuman.

19Ise si ringan i bas kuta e, subuk i bas suku si apai nari pe ia, banci mperjumai taneh e.

20Dage belangna taneh si lit i tengah-tengah bagin si iserapken ndai gedangna ras belangna sepulu dua setengah kilometer. I je nggo subuk kuta ndai.

21Taneh si iba denga arah kenjulu ras kenjahe daerah ingan Rumah Pertoton, taneh imam-imam ras taneh kalak Lewi, si e jadi sikerajangen raja si erkuasa. Bagin si arah kenjulu terus ku perbalengen si arah kenjulu, janah bagin si arah kenjahe terus ku Lawit Tengah. Balengna si arah Utara eme taneh bagin suku Juda, janah arah selatan bagin Benyamin.

22(Yeh 48:21)

Taneh man suku-suku si deban

23Taneh si lit i Selatan bagin si iserapken ndai, ibereken man suku-suku si debanna. Taneh e mulai i perbalengen si arah kenjulu nari terus ku Lawit Tengah, janah ibagi rikutken uruten si tersena arah teruh enda, i Utara nari ku Selatan. Benyamin Simeon Isakar Sebulon Gat

24(Yeh 48:23)

25(Yeh 48:23)

26(Yeh 48:23)

27(Yeh 48:23)

28Arah Selatan bagin si ibereken man suku Gat, mulai i Tamar nari, perbalengen e terus sider ku Selatan kempak sumbul Kades-Mariba, janah i jenari sider ka ku Utara ngikut-ngikut perbalengen ras Mesir seh ku Lawit Tengah.

29Nina TUHAN si Erdolat, "Bagenda me pe mbagi-bagiken taneh e man kerina suku-suku Israel."

Pintu gerbang Jerusalem

30Lit sepulu dua dalan bengket ku Kuta Jerusalem. Empatna tembokna seri gedangna, eme dua seperempat kilometer sada. Tep-tep dampar lit telu gerbangna, janah sada sadai ibahan gelarna rikutken sada gelar i bas suku-suku e. Gerbang-gerbang tembok si arah Utara gelarna Ruben, Juda ras Lewi; si i bas tembok si arah kenjulu gelarna Jusup, Benyamin, ras Dan; si i bas tembok si arah Selatan gelarna Simeon, Isakar ras Sebulon, si i bas tembok si arah barat gelarna Gat, Aser ras Naptali.

31(Yeh 48:30)

32(Yeh 48:30)

33(Yeh 48:30)

34(Yeh 48:30)

35Gedang tembok e kerina lit siwah kilometer. Mulai genduari nari gelar kota e, eme "TUHAN Ringan i jenda."


  Share Facebook  |  Share Twitter

 <<  Yehezkiel 48 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel