Dual PanelUkumen man kalak si nembah berhala
1Kata TUHAN seh man bangku nina,
2"O manusia si ermasap-masap, tataplah kempak deleng-deleng Israel janah ernubuatlah kerna ukumen.
3Enda me katangKu, Aku TUHAN si Erdolat, janah suruhlah deleng-deleng Israel, uruk-uruk, embang-embang, ras baluren-baluren megikenca. Nehenlah, Kusuruh me sada pedang ngeradasken kerina ingan ersembah man gana-gana.
4Batar-batar iruntuhken janah batar-batar ingan mpersembahken kumenen iperperken. Kerina kalak si ersembah i je, mate i lebe-lebe gana-gana e.
5Merap Kubahan mait-mait kalak Israel, tulan-tulanna kukerapken i belang-belang batar-batar e.
6Kerina kota Israel ikernepken, maka kerina batar-batarna ras gana-ganana meipuk seh getem, batar-batar ingan kumenen iperperken, janah kasa si ibahanna masap kerina.
7Ijapa pe jelma ibunuhi, janah kasa kalak si nggeluh denga ngaku me maka Aku kap TUHAN.
8Tapi deba Kupulahi i bas pembunuhen e nari jenari Kupemerap ku tengah bangsa-bangsa,
9janah i je me ia nggeluh jadi buangen. I je ingetna me Aku, janah ietehna maka nggo Kuukum ras Kupeteruk ia, erkiteken pusuhna nggo ngelupaken Aku, sabap ulin akapna nembah man berhalana asangken man bangKu. Emaka ciga atena ngenen dirina erkiteken kejahaten ras lagu langkahna si macik si nggo ilakokenna.
10Ietehna me maka aku kap TUHAN, janah persinget si Kubereken e labo si sia-sia."
11Nina TUHAN si Erdolat, "Temtemilah bandu, serkokenlah! Ngandunglah erkiteken kerina kejahaten ras kerina si nggesuh si nggo ilakoken kalak Israel. Emaka mate me ia i bas perang, erkiteken kelihen, ras penakit.
12Kalak si ndauh kena penakit, kalak si ndeher mate i bas perang; kalak si tading denga mate erkiteken kelihen. Inanamina me uga sangatna pernembeh ateKu man bana.
13Mait amparen i tengah gana-gana i sekelewet batar-batar, merap i bas tep-tep uruk meganjang, i datas tep-tep deleng, iteruh tep-tep batang kayu si merabun bulungna, iteruh kayu si galang, i bas tep-tep ingan i ja itutungna persembahen-persembahen man gana-gana. Kenca si e kerina me kalak meteh maka Aku kap TUHAN.
14Sabap la banci lang Kuawatken tanKu, jenari Kukernepken negerina, seh maka melungen, mulai i gurun pasir selatan nari seh ku kota Ripla i Utara. Kasa kota-kota si iiani kalak Israel la lit sada pe ketadingen. Kenca si e kerina me kalak metehsa maka Aku kap TUHAN."