Dual PanelJerusalem iukum
1Kenca bage kubegi Dibata erlebuh alu sora megang nina, "Mari o kam kerina si ngukum kota e, baba senjatandu."
2Emaka minter reh enem kalak dilaki arah pintu gerbang si arah utara Rumah Pertoton, sekalak-sekalak maba senjatana. Radu ras kalak ndai lit sekalak dilaki, uisna linen, ibabana perkakasna guna nurat. Reh ia kerina jenari tedis deherken batar-batar tembaga e.
3Kenca bage sinalsal si mesilo tandana Dibata Israel lit i je, nangkih i bas kerubim e nari, jenari pindah i bas inganna si gel-gel e nari ku dalan bengket ku Rumah Pertoton e. Jenari erlebuh TUHAN man kalak si ruis linen ndai nina,
4"To siar-siari kerina kota Jerusalem, janah tamaken capna i perdempaken tep-tep kalak si erndele ate ras susah erkite-kiteken kerina perbahanen si macik si ilakoken i bas kota e."
5Emaka kubegi ka Dibata ngerana man kalak si debanna nina, "Ikutken ia niar-niar kota e; bunuh, ula sada pe pulahi, ula ise pe atendu mekuah.
6Bunuh kerina tua-tua, anak perana, singuda-nguda, pernanden, bage pe danak-danak. Tapi ula kuit kalak si lit capna i perdempakenna. Benakenlah i jenda, i bas RumahKu enda nari." Emaka ibenakenna munuhi peminpin-peminpin si tedis i bas Rumah Pertoton e.
7Nina Dibata man kalak ndai, "Bahanlah maka Rumah Pertoton e keliamen. Demilah kesainna alu. Benakenlah!" Emaka ibenaken kalak ndai me munuhi i bas kota.
8Tupung pemunuhen e sangana erdalan, aku sisada ngenca i je. Nembah aku, ayongku seh ku taneh janah kuserkoken ningku, "O TUHAN si Erdolat, nembeh kal kin AteNdu man Jerusalem seh maka IbunuhiNdu AteNdu kerina kalak si tading i Israel?"
9Erjabap Dibata nina, "Kalak Israel ras Juda mbelin kal dosana. Munuh dahinna i belang-belang negeri e, janah idemina kota Jerusalem alu kejahaten. Ikatakenna maka Aku, TUHAN, nggo nadingken negerina janah la Kuidah ia.
10Emaka la ateKu mekuah man bana; uga perbahanenna man kalak si deban, bage ka me perbahanenKu man bana."
11Kenca bage dilaki si ruis kain linen ndai mulih, jenari ikatakenna man TUHAN nina, "Nggo kudalanken PerentahNdu."