Dual PanelGuci si pecah
1Isuruh TUHAN aku nukur guci taneh dah. Isuruhna pe aku ninggahi peminpin-peminpin Israel ras peminpin imam,
2jenari berkat ku Baluren Hinnom ras Pintu Gerbang Kudin pecah-pecah. I jah arus kumomoken kata Dibata si IberekenNa man bangku.
3Ikataken TUHAN me kata si man katankenku bagenda, "O Raja-raja Juda ras kalak Jerusalem, dengkehken katangKu, TUHAN si Mada Kuasa, Dibata nu Israel. Kubaba me cilaka kempak ingan enda maka erdenging pinggel si megikenca.
4Kulakoken si e, erkiteken bangsa enda nggo nundalken Aku, janah nggo icemarkenna taneh enda alu nutung persembahen i je man dibata-dibata si deban eme dibata si la pernah itandai nini-ninina, la pernah itandai raja-raja Juda. Nggo dem ibahanna ingan enda alu dareh kalak si la ersalah.
5Ipajekkenna batar-batar man Baal, guna nutung anak-anakna jadi persembahen. La pernah ia Kusuruh ngelakoken si e. La pernah lit turah pe i bas ukurKu.
6Emaka seh me paksana ingan enda lanai igelari Topet entah Baluren Hinnom tapi Baluren Penggelehen.
7I bas ingan enda Kubahan kerina sura-sura kalak Juda ras Jerusalem isia-siaken. Kupediat ia ikuasai imbang-imbangna janah munuhsa i bas perang. Bangkena Kubereken man pangan perik-perik ras rubia-rubia si meliar.
8Kubaba ku je cilaka ngkernepken kota enda, maka kasa kalak si mentas arah e sengget dingen ngeri akapna.
9Musuh-musuh ngkepung kota enda dingen ibunuhina kalak si ringan i je. Bage sangatna pengepungna seh maka kalak si tading i bas kota e ipanna daging temanna subuk e daging anakna pe."
10Kenca bage isuruh TUHAN kuperperken guci taneh dah ndai i adep-adepen kalak si ikut ras aku.
11Jenari kuturiken man bana kai si ikataken TUHAN si Mada Kuasa. "Kuperperken me bangsa enda ras kota enda bali ras guci taneh dah si getem enda; lanai terpekena mulihi. Topet enda me jadi kuburen erkiteken lanai lit ingan si deban jadi kuburenna.
12Erjanji Aku maka bali ras perbahanenKu man Topet, bage me perbahanenKu nandangi kota enda ras kalak si ringan i je.
13Kerina rumah Jerusalem ras rumah raja-raja Juda, kerina ingan i ja tarum rumah nggo jadi ingan nutung kumenen man bintang-bintang, kerina ingan i ja lau anggur nggo ipirpirken jadi persembahen man dibata-dibata si deban. Kerina si nggo bali melketna ras Topet."
14Kenca bage kutadingken Topet, i je TUHAN nggo nuruh aku nehken KataNa. Lawes aku jenari tedis i kesain Rumah Pertoton ngerana man kerina bangsa e,
15maka TUHAN si Mada Kuasa, Dibata nu Israel nggo melasken KataNa nina, "Kudabuhken me ukumen man kota enda ras man kerina kota si ndeher rassa bagi si nggo Kubelasken, erkiteken kam mekeng janah la megiken kai si Kukataken."