Dual PanelJeremia ras Nabi Hanania
1I bas tahun si e ka, bulan si pelimaken, tahun peempatken pemerentahen Raja Sedekia sekalak nabi i kota Gibeon nari gelarna Hanania anak Assur, ngerana man bangku i bas Rumah Pertoton. I adep-adepen imam-imam ras jelma si nterem, ikataken Hanania man bangku,
2maka TUHAN si Mada Kuasa Dibata nu Israel, nggo melasken kata enda nina, "Kuasa raja Babilon nggo Kuperperken.
3I bas dua tahun enda Kubaba me mulihken ku ingan enda kerina ugas-ugas Rumah Pertoton si nggo iangkut Raja Nebukadnesar ku Babilon.
4Raja Juda, Joyakin anak Joyakim, radu ras kalak Juda si nggo ibuang ku Babilon, Kubaba mulih. Tuhu Kuperperken me kuasa raja Babilon. Aku TUHAN kap si nggo melasken ranan enda!"
5Kenca bage iadep-adepen imam ras kerina kalak si tedis i bas Rumah Pertoton e kukataken man Hanania ningku,
6"Merandal! Kuarap TUHAN ngelakoken bagi si ikatakenndu e. Aku pe kuarapken kal payo isi nubuatndu e, janah kerina ugas-ugas Rumah Pertoton ras kerina bangsa e si nggo iangkut ku Babilon jadi tabanen ibaba min mulih.
7Tapi dengkehken kai si kukataken man bandu ras man kalak si nterem enda.
8Nabi-nabi si ernubuat nai ope denga kam ras aku, nggo ernubuat kerna perang, kelihen ras penakit si engkenai bangsa-bangsa dingen raja-raja si erkuasa.
9Tapi nabi si ernubuat kerna dame, ia iakui nabi tuhu-tuhu si isuruh TUHAN adi si inubuatkenna e tuhu jadi."
10Kenca bage ibuat Hanania pasangen si i bas kudukku ipenggelkenna seh meripuk;
11jenari ikatakenna i adep-adepen jelma si nterem nina, "Nggo ikataken TUHAN maka bagenda me PengeripukkenNa pasangen si nggo itamaken Raja Nebukadnesar ku babo kuduk bangsa-bangsa janah si enda IlakokenNa ope dua tahun nari." Kenca ikatakenna si e lawes aku.
12Piga-piga dekah kenca si e TUHAN nuruh aku
13lawes ngataken man Hanania bagenda, "Ikataken TUHAN maka pasangen kayu ngasup kam merperkenca tapi IgantikenNa alu pasangen besi.
14TUHAN si Mada Kuasa, Dibata nu Israel ngatakenca maka ItamakenNa bangsa-bangsa jadi budak raja Babilon, Nebukadnesar. Ikataken TUHAN maka rubia-rubia si meliar pe IbahanNa nembah man Nebukadnesar."
15Kenca bage kukataken tole man Hanania, "Begiken Hanania! Kam labo persuruhen TUHAN janah ibabaindu bangsa enda tek man si la tuhu.
16Dage TUHAN jine ngatakenca maka IambengkenNa me AteNa kam. Ope keri tahun enda, nggo kam mate, sabap nggo iajuk-ajukndu bangsa enda berontak ngelawan TUHAN."
17Emaka mate Hanania i bas bulan pepituken i bas tahun si e ka.