Dual PanelSurat Jeremia man kalak Jahudi i Babilon
1Kutulis enda surat man imam-imam, nabi-nabi, peminpin-peminpin bangsa e, dingen man kerina kalak si nggo iangkut Nebukadnesar ku Babilon i Jerusalem nari jadi tabanen.
2Surat e kutulis kenca Raja Joyakin iangkut ku pembuangen rikut ras nandena, pegawai istana, peminpin-peminpin Juda ras Jerusalem, tukang-tukang ras pande si debanna.
3Surat e kubereken man Elasah anak Sapan ras man Gemaria anak si Hilkia. Kalak enda duana isuruh Raja Sedekia njumpai Nebukadnesar ku Babilon. Bagenda ningku i bas surat e:
4"TUHAN si Mada Kuasa Dibata nu Israel ngataken man kerina kalak si nggo IsuruhNa iangkut tertaban ku Babilon i Jerusalem nari:
5'Pajekkenlah rumah janah tetaplah kam ringan i je. Suanilah peken jenari pan ulihna.
6Erjabulah kam dingen mupuslah. Kenca bage pejabu ka anakndu maka ia pe mupus ka. Arus maka ertambah-tambah beliganndu labo erkurangna.
7Erdahinlah guna kiniulin kota-kota ku ja kam nggo Kubuang jadi tabanen. Ertotolah guna keperlun kota e sabap adi sikap ia kam pe ikut sikap.
8Aku TUHAN Dibata nu Israel mpersingeti kam, ula pelepasndu dirindu itipu nabi-nabi si lit i tengah-tengahndu entah kalak si deban si penipu, si ngatakenca maka banci ia ernubuat kerna wari-wari si pepagi. Ula perdiateken nipi-nipina!
9I bas gelarKu ikatakenna si la tuhu. Labo ia Kusuruh. Aku TUHAN kap si nggo melasken ranan enda.'
10Kenca bage nina TUHAN, 'Adi nggo genep pitu puluh tahun kam i Babilon, Kuperdiateken me kam dingen janjingKu pe Kusehken, maka Kubaba kam mulih ku tanehndu.
11Aku ngenca meteh sura-surangKu nandangi kam, eme gelah kam senang labo gelah cilaka. RencanangKu eme mereken wari si pepagi bagi si iarapkenndu.
12I je erlebuh me kam kempak Aku. Reh kam ndahi Aku dingen ertoto, janah Kualoi kam.
13Idaramindu Aku janah jumpaindu Aku, erkiteken alu bulat ukurndu idaramindu Aku.
14Tuhu, katangKu, ijumpaindu me Aku dingen Kubaba me kam mulih i bas pembuangen nari. Kupepulung me kam i bas kerina negeri dingen i bas kerina ingan nari i je kam nggo Kukerapken. Jenari Kubaba me kam mulih ku negerindu i jenari kam ibuang. Aku TUHAN kap si nggo melasken ranan enda.'
15Ikatakenndu maka nggo ibereken TUHAN nabi-nabi man bandu i Babilon.
16Dengkehkenlah kai nina TUHAN kerna raja si merentah kerajan si panteki Daud nai ras kerina kalak si tading i bas kota e, eme senina-seninanndu si la ikut iangkut jadi tabanen raduken kam.
17Nina TUHAN si Erdolat, 'Kubaba man bana perang, kelihen ras penakit. Jenari Kubahan ia bali ras buah ara si la terpan perbahan macikna.
18Kuelis-elis ia salu perang, kelihen dingen penakit. Emaka kerina bangsa-bangsa i doni enda ngeri iakapna ngenehenca. Ku belang-belang doni enda Kuhuntakken ia. Kerina kalak sengget dingen nggirgir erkiteken kai si jadi man bana. Kerina kalak nguru-nguru ia dingen gelarna ipake kalak i bas sumpah.
19Si enda jadi man bana sabap la ia patuh man katangKu si la erngadi-ngadi Kupeseh man bana arah nabi-nabi persuruhenKu. La ia nggit megikenca.
20O kam kerina si nggo Kusuruh iangkut ku Babilon, dengkehkenlah Aku, TUHAN si melasken ranan enda.'
21TUHAN si Erdolat, Dibata nu Israel nggo melasken kata kerna Ahap anak si Kelaya dingen Sedekia anak si Maaseya, si nggo ngerana i bas gelarKu alu kata la tuhu. IkatakenNa maka iendeskenna ia duana ku bas kuasa Nebukadnesar, raja Babilon, si munuh ia i lebe-lebe matandu.
22Adi kalak si iangkut jadi tabanen i Jerusalem nari ku Babilon isumpahina atena kalak bagenda nina, 'Jadilah man bandu ibahan TUHAN bali ras man Sedekia ras Ahap si itutung raja Babilon geluh-geluhen!'
23Bagenda me jadina man bana erkiteken salah dosana si mejin -- erlua-lua ia, jenari ibelaskenna kata la tuhu i bas gelar TUHAN. E ngelawan peraten TUHAN kap. Idah TUHAN kap kai si ibahan kalak enda janah Ia saksina ngelawanca. TUHAN kap si nggo melasken ranan enda."
Surat i bas Semaya nari
24TUHAN si Mada Kuasa Dibata nu Israel peseh KataNa man bangku kerna Semaya anak kuta Nehelam, si nggo ngirim surat i bas gelarna jine man kalak Jerusalem dingen man Imam Sepanya anak Maaseya dingen man kerina imam-imam si deban. I bas surat e nina Semaya man Sepanya:
25(Yer 29:24)
26"TUHAN kap si nggo nangkuhken kam jadi imam nggancihken Joyada, kam kap genduari kepala i bas Rumah Pertoton. Tugasndu kap maka kerina kalak adon si pekulah-kulah jadi nabi arus iiket salu rante besi i kerahungna.
27Ngkai dage maka la bage perbahanenndu kempak Jeremia kalak Anatot si nggo ngerana selaku nabi man bangsa e?
28Arus ia ipengadi ngerana sabap nggo ikatakenna man kami si i Babilon maka ndekah denga nge kami jadi tabanen i jenda, emaka arus ipajekken kami rumah janah tetap kami tading i jenda, isuani kami peken dingen man buahna."
29Iogeken Sepanya surat e man bangku.
30Jenari isuruh TUHAN aku
31nenahken KataNa man kerina kalak si tertaban i Babilon kerna Semaya nina, "Aku kap TUHAN, Kuukum me Semaya ras kerina sinursurna. Labo ia persuruhenKu tapi ngerana ia bandu tempa-tempa ia sekalak nabi jenari ibabaina kam tek man kata la tuhu. Masap me sinursurna i tengah-tengahndu nari. Lanai idahna perkara-perkara si mehuli si ateKu Kulakoken man bangsangKu, sabap iajukna bangsangKu ngelawan Aku. Aku TUHAN kap si nggo melasken ranan enda."
32(Yer 29:31)