Dual PanelBaruh ngoge surat gulungen i bas Rumah Pertoton
1I bas tahun peempatken Joyakim anak Josia jadi raja Juda reh kata TUHAN man bangku nina,
2"Buatlah sada gulungen kertas, jenari suratken i babona kerna kai si nggo Kuturiken man bandu kerna Israel ras Juda dingen kerina bangsa-bangsa. Suratken kerina si nggo Kukataken man bandu menaken kin tangtangna nari Aku ngerana man bandu tupung Josia jadi raja seh ngayak paksa enda.
3Banci jadi tupung kalak Juda megi kerna cilaka si ateKu Kubaba man bana, itadingkenna dalanna si jahat. Adi bage Kualemi salah dosana."
4Emaka kulebuh Baruh anak si Neria, jenari kubelasken tep-tep kata si ibelasken TUHAN man bangku. Janah kerina si e isuratken Baruh i babo gulungen kertas ndai.
5Kenca bage kubereken tole perentah enda man Baruh, "Aku lanai ipediat bengket ku bas Rumah Pertoton.
6Tapi ateku maka kam lawes ku je, i bas warina tupung kalak e erpuasa. Alu megang ogekenlah gulungen kertas e man bana, gelah ibegina tep-tep kata si nggo ibelasken TUHAN man bangku, dingen si nggo kubelasken man bandu. Lakoken e i bas ingan i ja nari kerina kalak megi kam, subuk kalak Juda si nggo reh bengket i bas kota-kota nari.
7Banci jadi ertoto ia man TUHAN jenari jera i bas dalan si jahat nari, sabap TUHAN ngancam bangsa enda alu RawaNa si mbelin dingen gurlah."
8Emaka iogeken Baruh kata TUHAN i bas Rumah Pertoton, sue ras si nggo iperentahken man bana.
9I bas bulan pesiwahken tahun pelimaken Joyakim jadi raja Juda, bangsa e erpuasa lako ndatken keleng ate TUHAN. Kerina kalak si reh i kota-kota Juda nari rikut ras kalak si ringan i Jerusalem ngelakoken puasa e i Jerusalem.
10Emaka iogeken Baruh gulungen surat e man perpulungen sue ras si nggo kukataken. Si e ilakokenna i bas Rumah Pertoton, i bas bilik Gemaria anak si Sapan nari. Gemaria eme sekretaris kerajan. Ingan kamarna e i bas kesain si arah datas deherken dalan bengket arah pintun gerbang si mbaru ku bas Rumah Pertoton.
Gulungen e iogeken man pegawai-pegawai
11Mikaya anak Gemaria, kempu si Sapan megi kai si nggo ikataken TUHAN arah gulungen si iogeken Baruh.
12Jenari lawes ia ku istana kerajan ku bas bilik sekretaris istana kerajan. I je sangana pulung runggu kerina peminpin-peminpin, eme Elisama, sekretaris kerajan, Delaya anak Semaya, Elnatan anak si Akbor, Gemaria anak Sapan, Sedekia anak Hanania dingen kerina peminpin-peminpin si deban lit i je.
13Ikataken Mikaya kerina kai si nggo ibegina iogeken Baruh man bangsa e.
14Emaka isuruh peminpin-peminpin e Jahudi anak Netania, kempu si Selemia, kempu-kempu si Kusi ngatakenca man si Baruh gelah ibabana gulungen si nggo iogeken man perpulungen e. Ibaba Baruh gulungen e man bana.
15Nina peminpin-peminpin e, "Kundulken, jenari iogeken gulungen e man kami." Emaka iogeken Baruh.
16Kenca nggo dung iogekenna, si nehenen peminpin-peminpin e sapih-sapih ia perban biarna jenari nina man Baruh, "La banci la ilapurken kami enda man raja."
17Nina kalak e, "Turiken man kami uga penulisindu kerina? Jeremia kin si melaskenca man bandu?"
18Nina Baruh enjabapsa, "Jeremia melaskenca tep-tep kata man bangku, jenari kusuratken e alu tinta i bas gulungen e."
19Nina kalak enda man Baruh, "Cebunilah kam ras Jeremia. Ula ise pe bahan si ngetehsa i ja kam."
Itutung raja gulungen e
20Peminpin e namaken gulungen ndai i bas bilik Elisama, sekretaris kerajan e, jenari lawes ku istana raja ngelapurkenca kerina man raja.
21Kenca bage isuruh raja si Jahudi ngelegi gulungen e. Ibuatna i bas bilik si Elisama nari jenari iogekenna man raja ras man kerina pegawaina si sangana tedis ngkeleweti ia.
22Tupung e paksa perudan emaka raja sangana kundul-kundul i bas inganna cicudu deherken api.
23Tep-tep Jahudi nggo dung ngogeken telu tah empat teran kata, ikeret raja bagin e alu rawit jenari iambekkenna ku bas api. Bage me ibahanna seh ngayak kerina gulungen e nggo keri meseng.
24Tapi subuk raja bage pe pegawai-pegawaina la lit sada pe sengget entah ncidahken tanda atena ceda.
25Tapi aminna bage gia mindo nge Elnatan, Delaya, Gemaria man raja gelah ula itutungna gulungen e tapi la diate raja pe.
26Jenari isuruh raja putra mahkota Jerahmeel ras Seraya anak si Asrel bage pe Selemia anak Abdel nangkap aku ras sekretarisku Baruh. Tapi TUHAN nggo muniken kami.
Isuratken Jeremia gulungen si deban
27Kenca gulungen si nggo kubelasken man Baruh itutung raja Joyakim reh kata TUHAN man bangku
28lako muat gulungen si deban dingen nuratken i je tep-tep kata si nggo lit i bas gulungen si pemena.
29Isuruh TUHAN aku melasken kata enda man raja, "Nggo icilukndu gulungen e, dingen nggo isungkunndu Jeremia, ngkai maka isuratkenna i je maka reh me raja Babilon engkernepken negeri enda, munuhi kerina rayatna dingen asuh-asuhenna.
30Emaka genduari Aku, TUHAN, ngatakenca man bandu, o Raja Joyakim, maka asa ndigan pe lanai lit kesusurenndu jadi raja i bas kinirajan Daud. Bangkendu iambengken ku bas ingan si iparpari las matawari tupung suari, kena embun tupung berngi.
31Erkiteken dosa-dosa si nggo ibahanndu Kuukum kam, kesusurenndu, ras pegawai-pegawaindu. Subuk kam, kalak Jerusalem ras Juda sada pe la mperdiateken persinget si rehna i bas Aku nari. Erkiteken si e Kudabuhken me man bandu kerina cilaka si nggo Kubelasken e."
32Kenca bage kubuat gulungen si deban jenari kubereken man sekretarisku Baruh; isuratkenna tep-tep kata si Kubelasken man bana, Isuratkenna kerina si nggo isuratken i bas gulungen si pemena.