Dual PanelPemindon Sedekia man Jeremia
1Nebukadnesar raja Babilon mahanca Sedekia anak si Josia raja Juda, nggancihken Raja Joyakin anak si Joyakim.
2Tapi subuk Sedekia, pegawai-pegawaina bage pe bangsa e, sada pe la nggit ngikutken kata si nggo ibereken TUHAN man bangku.
3Isuruh Sedekia si Jehukal anak Selemia ras Imam Sepanya anak si Maaseya mindo gelah ertoto aku man TUHAN Dibata kami guna kami.
4Tupung e aku langa ipenjaraken tapi bebas denga i tengah-tengah bangsa e.
5Tentera Babilon nggo ngkepung Jerusalem, tapi tupung ietehna maka tentera Mesir nggo ngelepari perbalengen Mesir, emaka mundur ia.
6TUHAN Dibata nu Israel nuruh aku
7melasken kata enda man Sedekia, "Tentera Mesir sangana i bas perdalanen lako nampati kam, tapi mulihken denga ia ku Mesir.
8Emaka reh ka tentera Babilon, iperangna kota enda, irebutna jenari icilukna.
9Aku TUHAN mpersingeti kam maka ula ibualindu bandu alu ngataken maka tentera Babilon lanai bo reh.
10Aminna pe kerina tentera Babilon italukenndu dingen si luka-luka nari ngenca tading i bas kemahna, tapi keke denga nge ia jenari icilukna kota enda seh rata ras taneh."
Jeremia itangkap dingen ipenjaraken
11Tentera Babilon mundur i Jerusalem nari sabap tentera Mesir nggo erdeherna.
12Emaka kutadingken Jerusalem guna lawes ku daerah Benyamin muat erta tading-tadingen keluargangku.
13Tapi kenca aku seh i Pintu Gerbang Benyamin, i je kapten tentera si erjaga eme Jeria anak si Selemia kempu si Hanania. Itahanna aku jenari nina, "Lompat atendu man kalak Babilon!"
14Ningku ngaloisa, "Labo! Labo aku lompat." Tapi la aku ibegiken si Jeria. Itangkapna aku jenari ibabana ngadap si erkuasa.
15Merawa kal kalak e man bangku. Emaka isuruhna kalak ngeligasi aku, ikurungna aku i bas rumah Jonatan, sekretaris kerajan. Rumahna e nggo ijadiken penjara.
16Itamakenna aku i bas kamar tahanen teruh taneh janah ndekah kal aku i je.
17Dungna isuruh Raja Sedekia kalak ngelegi aku dingen i jah i bas istana e alu ise pe la lit si metehsa isungkunna aku nina, "Lit kang kata i bas Dibata nari?" Ningku enjabapsa, "Lit" "Nandangi iendesken me kam ku bas kuasa raja Babilon!"
18Kenca bage nungkun aku ningku, "Kai kin kejahatenku man bandu ras man pegawai-pegawaindu ras man bangsa enda maka aku ipenjarakenndu?
19Kai kin jadina nandangi nabi-nabindu si ngatakenca man bandu maka raja Babilon la reh nerang kam ras negeri enda?
20Emaka genduari, o Raja, kupindo man bandu gelah ibegikenndu aku janah nehken pemindonku man bandu. Ulanai min aku iulihkenndu ku penjara rumah si Jonatan. Adi iulihkenndu, ugapa pe mate aku i jah."
21Emaka isuruh Raja Sedekia aku ipenjaraken i kesain pengawal istana. I jah me aku tading. Tep-tep wari ibereken man bangku sada roti i bas tukang roti nari, seh ngayak keri roti i kota e.