Dual PanelJerusalem italuken (2Raj 25:1-17; Yer 52:3b; Yer 52:4-11)
1Bulan sepuluh, pesiwah tahunken Sedekia nggo jadi raja Juda, reh Nebukadnesar raja Babilon ras kerina tenterana nerang Jerusalem.
2I bas wari siwah, bulan peempatken tahun pesepulusadaken Sedekia jadi raja, benteng-benteng kota e nggo pecah.
3(Tupung Jerusalem nggo italuken, kerina perwira tinggi kerajan Babilon reh dingen kundul i Pintu Gerbang Tengah. Kalak enda eme: Nergal Sareser, Samgar Nebo, Sarsekim dingen Nergal Sareser si deban.)
4Tupung Raja Sedekia ras kerina tenterana meteh kai si nggo jadi, tupung berngi icubakenna lompat i bas kota e nari. Lompat ia arah peken raja, erdalan arah dalan ndarat si mperdemuken dua tembok terus kempak Berneh Jordan.
5Tapi iayaki tentera Babilon ia, emaka itunduksa Sedekia i bas taneh kendit deher Jeriho. Ibabana man Raja Nebukadnesar si tupung e sangana i Ripla i daerah Hamat lako ndabuhken ukumen man bana.
6I Ripla, raja Babilon munuh kerina anak Sedekia, janah si enda ilakoken i lebe-lebena, pegawai-pegawai kerajan Juda pe igelehi kerina.
7Kenca bage ipulditkenna mata Sedekia, jenari igarikenna ibabana ku Babilon.
8Tupung si e iciluk kalak Babilon istana kerajan ras rumah-rumah kalak Juda, benteng-benteng Jerusalem iruntuhkenna.
9Kedungenna, Nebusaradan, eme puanglima tentera Babil e, ngangkut ku Babilon kerina kalak si ringan i Jerusalem rikut ras kalak si nggo erpihak man bana.
10Tapi si musil-musil si la lit kadena pe itadingkenna i Juda dingen iberekenna kebun anggur ras perjumanna.
Pembebasen Jeremia
11Tapi iperentahken Nebukadnesar puanglima tenterana Nebusaradan guna nehken perentah enda:
12"To dahi Jeremia bahanlah si mehuli man bana. Ula seh tanndu man bana, tapi lakokenlah rikutken sura-surana."
13Emaka Nebusaradan radu ras pegawai-pegawai tinggi Nebusaradan ras Nergal Sareser, bage pe perwira-perwira tentera kerajan Babilon,
14ngelegi aku i bas kesain pengawal istana nari. Iendeskenna aku ku bas kuasa Gedalya anak si Ahikam kempu si Sapan, si ngawasi aku mulih ku rumah, alu tenang. Emaka tading aku i tengah-tengah jelma si nterem.
Pengarapen man Ebedmelek
15Tupung aku ipenjaraken denga i bas kesain pengawal istana, reh kata TUHAN man bangku,
16gelah kukataken man Ebedmelek kalak Sudan e, maka TUHAN si Mada Kuasa, Dibata nu Israel nggo ngataken man bangku bagenda, "Sue ras si nggo Kukataken, Kubereken me ateKu man kota enda cilaka labo kiniulin. Tupung kejadin e kam me i je ngidahsa.
17Tapi Aku kap TUHAN, si ngkawali kam, dingen kam labo iendesken kempak kalak si ibiarindu.
18Aku si njagai kam, janah labo ibuat kesahndu. Kam terkelin nge erkiteken pengarapenndu itamakenndu man bangKu. Aku kap TUHAN si nggo melasken ranan enda."