Dual PanelJeremia ibaba ku Mesir
1Nggo kenca dung kuturiken man bangsa e kerina kata si isuruh TUHAN Dibatana man bangsa e,
2Asaria anak Hosaya, Johanan anak Kareah ras kerina kalak megombang si debanna ngerana man bangku nina, "Kam perbual! TUHAN Dibata kami labo nuruh kam ngatakenca maka kami ula nadingken negeri enda lako tading i Mesir.
3Nggo kam iatur Baruh anak si Neria lako ngelawan kami, gelah tambah-tambah kuasa kalak Babilon man kami jenari ibunuhna kami dingen iangkutna ku Babilon."
4Emaka Johanan, kerina puanglima tentera ras kerina bangsa e la ngikutken perentah TUHAN lako tetap tading i negeri Juda.
5Emaka Johanan ras kerina puanglima tentera si deban ngangkut ku Mesir asa kalak si tading denga i Juda radu ras kerina kalak si nggo mulih i bas bangsa-bangsa inganna ndube ikerapken
6subuk dilaki, diberu, anak-anak ras putri-putri raja. Kerina kalak si nggo itadingken puanglima Nebusaradan iteruh kuasa Gedalya. Aku pe ikut ras Baruh.
7La ia patuh man perentah TUHAN emaka lawes ia kerina ku Mesir seh ngayak kota Tahpanhes.
8I jah nina TUHAN man bangku,
9"Buat batu galang jenari tanemken i bas taneh dah, i lebe-lebe gedung pemerentah i Tahpanhes enda janah suruh kalak Israel ngenen si ibahanndu.
10Kenca bage kataken man bana, maka Aku TUHAN si Mada Kuasa, Dibata nu Israel, ateku ngelegi suruh-suruhenKu Raja Nebukadnesar i Babilon nari ku ingan enda. Itamakenna me kursi kinirajanna i babo batu-batu si itanemndu enda. Ikimbangkenna me kemah kerajan i babona.
11Nebukadnesar la banci lang reh me naluken Mesir. Kalak si nggo itetapken mate i bas penakit mate me iban penakit, kalak si nggo itetapken itaban, itaban me. Kalak si nggo itetapken mate i bas perang, mate me i bas perang.
12Kuciluk me rumah-rumah persembahen dibata-dibata Mesir. Iciluk raja Babilon me gana-ganana entah pe ibabana. Bali ras permakan ngagui tuma i bas uisna nari bage me raja Babilon mbersihken negeri enda jenari lawes i bas kemenangen.
13Iruntuhkenna me tugu-tugu batu si i Heliopolis i Mesir dingen icilukna maka meruntuh rumah-rumah persembahen gana-gana Mesir."