Dual PanelUkumen man Amon
1Enda me si ikataken TUHAN kerna Amon, "I ja kin kalak Israel? Lanai kin lit kalak si mpertahanken negerina? Ngkai maka ipediatna kalak si nembah man Moloh muat darehna i bas suku Gat nari? Ngkai maka ipelepasna ia ringan i je!
2Tapi seh me paksana maka kalak si tading i ibukota Raba megi gegehna peperangen, dingen meruntuh me ia. Kenca bage kuta-kutana iciluk radu ras taneh. Emaka ibuat Israel me taneh e mulihi i bas kalak si ngerebutca nari.
3O kalak Hesbon, tangiskenlah! Ai nggo kernep! O pernanden-pernanden Raba, erceda atelah! Pakeken uis guni tanda atendu ceda, ngandungkenlah! Kiamkenlah alu ukurndu gulut. Dewa Molohndu la banci la iangkut ku pembuangen, radu ras imam-imamna dingen pengulu-penguluna.
4Ngkai maka iagahkenndu bandu, o bangsa si la patuh? Gegehndu nggo bene. Ngkai maka kam ernalem man gegehndu jine? Ngkai maka ikatakenndu la lit kalak si pang ngelawan kam?
5Kubahan maka kebiaren lit i sekelewetndu. Kiam me kam kerina. Tapi kalak kiam guna kesahna janah la lit si pepulungsa mulihi.
6Tapi dungna kubahan ka maka Amon makmur mulihi. Aku TUHAN kap si nggo melasken ranan enda."
Pengukumen TUHAN kempak Edom
7Enda ikataken TUHAN si Mada Kuasa kerna Edom, "Nggo kin bene kebeluhen ertimbang i bas bangsa Amon nari? Lanai kin banci penasehatna nuriken kai si arus man dahinna? Nggo bene kin kerina kepentarenna?
8O kalak Dedan, mulihken janah kiamken! Cebuniken! Kukernepken ateKu kesusuren Esau, sabap nggo seh paksana man bangKu ngukumsa.
9Tupung kalak mutiki buah anggur itadingkenna deba. Tupung pinangko reh berngi, si iperlukenna ngenca ibuatna.
10Tapi nggo kutilanjangi kesusuren Esau. Inganna cebuni nggo talang emaka la nai ia banci cebuni. Kerina kalak Edom nggo kernep. Lanai lit si tading.
11Anak-anakndu si nggo melumang tadingken ras Aku, Aku si pekena-kenasa. Diberu-diberu si nggo mbalu banci ernalem man bangKu.
12Sedangken kalak si aturna la iukum, nggo minem tare calung pengukumen e, iakapndu kin maka kam la iukum? La banci la kam minem tare calung e!
13Sabap nggo jine Kusumpahken maka Bosra la banci la mejin dingen jadi gurun pasir. Iuru-uru kalak me ia dingen gelarna ipake kalak i bas numpahi. Kerina kuta-kuta si ndeher rassa, meruntuh asa lalap. Aku TUHAN kap si nggo melasken ranan enda."
14Ningku, "O Edom nggo kualoken kata i bas TUHAN nari. Nggo isuruhna sekalak persuruhen ngataken man bangsa-bangsa maka ipepulungna tenterana gelah ia ersikap nerang kam.
15Ate Dibata maka kote kam ibahanna, janah lanai lit kalak si nghamati kam.
16Kinigombangenndu nggo nipu kam. Lanai lit kalak si mbiar man bandu bagi pengakapndu. Kam enggeluh i babo ling-ling batu, i datas ancuk-ancuk deleng. Tapi aminna kam enggeluh bali ganjangna ras rajawali, TUHAN kap si pesusur kam. TUHAN kap si melasken ranan enda."
17Nina TUHAN, "Cilaka si ndabuhi Edom lanai kap tanggung serana. Emaka kerina kalak si mentas arah e sengget dingen gentar.
18Jadi man Edom bali ras si nggo jadi kempak Sodom ras Gomora tupung ia ras kota-kota si ndeher rassa ikernepken. Lanai sekalak pe si pernah nari enggeluh i je. Aku TUHAN kap si nggo melasken ranan enda.
19Bali ras singa reh i bas kerangen tua gedang-gedang Jordan nari nangkeng ku mbal-mbal, bage me Aku reh dingen Kubahan maka rempet bangsa Edom ngerbul nadingken negerina. Kenca bage raja pilihenKu me si engkuasai bangsa e. Ise kin si seri ras Aku? Ise kin pang ngelawan Aku? Apai kin pemerentah si pang erlawan ras Aku?
20Emaka dengkehkenlah rencana si Kubahan lako ngelawan Edom. Dingen kai ateKu si Kubahan man kalak si ringan i kota Teman. Anak-anakna pe la banci la isaren, kerina kalak gentar.
21Tupung Edom ndabuh, terbegi me sora si megang seh maka kerina doni enda mugur-ugur. Sorana serko terbegi me seh ku Teluk Akaba.
22Iserang musuh me Bosra bali ras rajawali nangkis alu kabengna si kimbang. I bas paksa e kerina tentera Edom bali biarna ras sekalak pernanden si sangana mupus."
Ukumen TUHAN man Damaskus
23Enda me si ikataken TUHAN kerna Damaskus, "Kalak si ringan kota-kota Hamat ras Arpad lit i bas aru ate dingen mbiar erkiteken nggo ibegina berita si la uli. Kearun ate ergalun i bas ia bagi galumbang lawit emaka sitik pe lanai ia teneng.
24Nggo kote kalak Damaskus jenari kiam ia perban biarna. Mesui dingen aru kal atena bali ras sekalak pernanden sangana mupus.
25Kota si terberita e si biasana dem alu keriahen nggo terulang tuhu-tuhu.
26I bas paksa e kerina anak peranana ibunuh i bas gedang-gedang dalan kota e janah tenterana ikernepken.
27Tembok-tembok Damaskus Kuambengken kempak api. Istana Raja Benhadad iciluk. Aku TUHAN si Mada Kuasa kap si nggo melasken ranan enda."
Ukumen man suku Kedar ras kota Hasor
28Enda me kata TUHAN kerna suku Kedar ras kerna daerah si ikuasai Hasor si nggo italuken raja Babilon Nebukadnesar, "Perangilah kalak Kedar dingen kernepkenlah suku-suku si arah Timur!
29Rampasilah kemah-kemahna ras rarasen biri-birina, kire-kire kemah ras kerina si lit i bas kemah e. Buatlah kerina untana jenari kataken man bana, 'Ena, kebiaren i sekelewetndu.'
30O kalak Hasor, Aku, TUHAN, Kupersingeti kam, maka ndauh kam kiam dingen cebunikenlah. Nebukadnesar raja Babilon nggo erpekat ngelawan kam. Enda me katana,
31'Ota! Siperang kalak ah, si niakapna aman man bana dingen iakapna bana paguh! Kotana la lit pintu gerbangna la lit eruk-erukna.'
32Buatlah unta dingen kerina asuh-asuhenna! Kukencahken maka merap kalak si erpangkas gendek enda. Janah i jenari pe Kubereken man bana cilaka.
33Hasor tetap me jadi gurun pasir rasa lalap. Serigala ngenca ringan i je. Lanai ise pe si enggeluh i je. Aku kap TUHAN si nggo melasken ranan enda."
Ukumen TUHAN man Elam
34Kenca Sedekia itangkuhken jadi raja Juda, minter reh kata TUHAN si Mada Kuasa man bangku kerna negeri Elam.
35Nina, "Kubunuh me kerina kalak Elam si beluh manah, si erbahanca negeri e seh paguhna.
36Kubahan maka i ja nari pe reh angin ngembuskenca. Kukencahken me ia maka merap, seh maka lanai lit negeri la jadi inganna mengongsi.
37Kubahan maka mbiar kal Elam man imbang-imbangna si ersura-sura munuh ia. Alu rawangKu si mbelin Kukernepken me kalak Elam. Kusuruh me tentera merangsa seh maka masap ia kerina.
38Raja-raja ras peminpin-peminpinna Kukernepken jenari Kupajekken kursi kinirajanKu i je.
39Tapi denggo Kubahan maka makmur ka mulihi Elam. Aku TUHAN kap si nggo melasken ranan enda."