Dual Panel1Bicara sumbul lau min takalku matangku pancur iluh. Tangis me aku suari ras berngi erkiteken bangsangku nggo ibunuhi.
2Bicara lit min inganku tading i gurun pasir ndauh i bas bangsangku nari tentu aku lawes ku je nadingken bangsangku. Bangsangku si erlua-lua perpulungen kalak si jahat ukurna.
3Lalap atena ngataken si la tuhu, kini la bujuren nge, labo kinibujuren si ngkuasai negeri e. Nina TUHAN, "BangsangKu runut erbahan kejahaten, dingen la ietehna maka Aku me Dibatana."
4Tep-tep kalak la banci la erjaga-jaga nandangi temanna, janah sekalak pe lanai banci tek nandangi seninana. Sabap tep-tep senina bali penipuna ras Jakup, kerina kalak encekuraki temanna.
5Kerina si mabai temanna papak, dingen la lit kalak melasken kata tuhu. Dilahna nggo semal melasken kata bual, dingen la ia nggit ngadi erbahan salah. Runut ia erbahan kejahaten penipun siarak-araken ras penipun. Ikataken TUHAN maka BangsaNa nggo nulak Ia.
6(Yer 9:5)
7Erkiteken si e nina TUHAN si Mada Kuasa, "Kuane me bangsangKu desken besi, jenari Kuuji ia. Kai denga kin si banci Kubahan nandangi bangsangKu?
8Dilahna desken anak panah si erbisa, lalap ia erbual. Man temanna mehuli kerina rananna tapi situhuna siding nge si itogengna.
9La kin nge ia Kuukum erkiteken perbahanenna e? La kin Aku erbalas man bangsa si bagenda? Aku kap Dibata si ngerana enda."
10Ningku, "Ceda kal ateku erkiteken deleng-deleng, tangis aku erkiteken mbal-mbal sabap nggo kerah kerina, dingen ise pe lanai lit mentas arah e. Sora asuh-asuhen pe lanai terbegi, perik-perik pe nggo kabang, rubia-rubia si meliar pe nggo lawes."
11Nina TUHAN, "Kubahan maka Jerusalem bali ras batu si ergun-gun, man ingan serigala nggeluh. Kota-kota Juda Kujadiken gurun pasir, sekalak pe la lit ringan i je."
12Nungkun aku ningku, "O TUHAN, ngkai maka negeri enda ceda janah kerah desken gurun pasir, seh maka ise pe la lit mentas arah e? Ise kin ngasup ngantusisa si e? Man ise kin nggo IterangkenNdu si e gelah banci iturikenna ka man kalak si deban?"
13Nina TUHAN ngaloisa, "Si enda kerina jadi erkiteken bangsangKu nggo nundalken ajaren si nggo Kubereken man bana. Lanai Aku iikutkenna, lanai idalankenna kai si Kukataken man bana.
14Tapi mekeng ia, dingen isembahna gana-gana Baal bagi si iajarken nini-ninina bana.
15Emaka dengkehkenlah kai ateKu Kubahan, TUHAN si Erdolat, Dibata nu Israel: Kubereken man bangsangKu sirap-rap man panganna dingen racun man inemenna.
16Kukerapken ia ku tengah-tengah bangsa-bangsa si subuk ia bage pe nini-ninina la pernah nandaisa. Kusuruh pasuken tentera merangsa seh Kukernepken ia tuhu-tuhu."
Kalak Jerusalem nderkuh man TUHAN
17Nina TUHAN si Mada Kuasa, "Ukurkenlah kai si sangana jadi! Dilolah kalak si beluh tangis-tangis, diberu-diberu si ngendeken ende-enden penguburen."
18Nina bangsa e, "Kataken man bana maka pedas-pedas ia reh, janah ngendeken ende-enden penguburen man banta, seh maka matanta dem alu iluh dingen seliben matanta besar erkiteken ngandung."
19Dengkehkenlah sora tangis i Sion nari nina, "Nggo cilaka kita, nggo mela kal siakap. Terpaksa sitadingken negerinta, rumahta nggo irontasken kerina."
20Ningku, "Dengkehkenlah TUHAN, diberu-diberu, perdiatekenlah RananNa. Ajarilah anakndu si diberu uga ngandung, ajarilah teman-temanndu uga ngendeken ende-enden penguburen.
21Kehamaten nggo bengket arah tingkapta, bengket ia ku bas istananta itampulna anak-anakta i pasar-pasar, bage pe anak si nguda i tengah tiga.
22Bangke manusia merap i japa pe; bali ras pupuk si ergun-gun i juma, desken buah gandum si isabi jenari tading ibahan si rani, la lit sekalak pe si pepulungsa. Enda me kata si isuruh TUHAN kubelasken."
23Nina TUHAN, "Kalak pentar ula megah iakapna kerna kepentarenna. Kalak megegeh ula iagahkenna gegehna, kalak bayak ula megah iakapna kerna kebayakenna.
24Adi lit kalak atena ermegah ate, megahlah iakapna perban itandaina Aku. Sabap keleng ateKu tetap kap, dingen Kubahan kai si bujur ras benar. Eme perkara si erbahanca meriah ukurKu, Aku TUHAN si nggo ngerana."
25Nina TUHAN, "Seh me paksana Kuukum bangsa Mesir, Juda, Edom, Amon, Moap ras bangsa padang gurun, si nggo ipangkasna bukna gendek. Kerina bangsa e nggo isunat, tapi pusuhna la isunat. La lit sada pe i bas bangsa enda nari, bage pe kalak Israel encikep perjanjinKu."
26(Yer 9:25)