Alkitab Mobile SABDA
[VER] : [KARO]     [PL]  [PB] 
 <<  Yesaya 34 >> 

Dibata ngukum musuh-MusuhNa

1Marilah o kerina bangsa-bangsa! Mari pulung, jenari dengkehken. Mari ku jenda, o kerina doni ras si nggeluh i je, jenari begikenlah.

2Nembeh ate TUHAN man kerina bangsa-bangsa ras tenterana. Nggo idabuhken TUHAN ukumen man bana kerina guna i kernepken.

3Mait-maitna la ikuburken, tapi ampar i je seh macik dingen mbau; deleng-deleng pe megara erkiteken dareh.

4Matawari, bulan, ras bintang-bintang, getem kerina jadi abu. Langit masap, desken amak igulung, janah bintang-bintang nartar desken bulung anggur tah bulung ara si nartar i bas batangna nari.

5TUHAN nggo nggarut PedangNa i Surga, emaka ItampulNa me Edom bangsa si nggo IputuskenNa ukumenna gelah ikernepken.

6Pedang TUHAN dem dareh ras tabeh-tabeh kalak e, bali ras dareh ras tabeh-tabeh anak biri-biri ras kambing si ipersembahken. TUHAN erbahan penggelehen e i kota Bosra; IbahanNa penggelehen si mbelin i negeri Edom.

7Bangsa e guling desken lembu kerangen ras jenggi lembu nguda, janah tanehna megara erkiteken dareh janah ketamburen tabeh-tabeh.

8Eme paksana TUHAN mulahi Sion janah erbalas man musuh-musuhna.

9Kerina lau belin si lit i Edom salih pagi jadi ter, janah tanehna salih jadi kertah. Negeri e meseng kerina desken ter.

10Apina gurlah suari ras berngi, janah cimberna erdipul ku das rasa lalap. Taneh e terulang abad ku abad, janah ise pe lanai lit mentas arah e seh rasa lalap.

11Alingkupa ras kak me pagi gancih manusia si ngiani taneh e. Ibahan TUHAN maka la lit kai pe turah i je maka terulang mulihi, bali ras paksa ope tembe doni nai.

12Lanai lit raja si merentah negeri e, janah peminpin-peminpinna kerina nggo lawes.

13Duri ras rambah si erduri turah i bas kerina istana-istana ras kuta-kuta si ertembok, janah biang kerangen ras alingkupa ringan i je.

14Rubia-rubia si meliar gawah-gawah i je; begu si lebuh-lebuhen, janah begu ganjang reh ku je ndarami ingan pengadi-ngadin.

15Alingkupa rasar, naruhen, janah pebelin-belin anakna i je. Perik pengatah daging pe pulung i je; tambah-tambah sada tep-tep wari.

16Pepayolah i bas pustaka TUHAN kerna tinepa si nggeluh, janah oge kai nina. La lit sada pe i bas rubia-rubia si ndai bene, janah la lit sada pe si la ras pasangenna. Sabap nggo iperentahken TUHAN maka bage me jadina; janah TUHAN jine kap si pepulungsa.

17TUHAN kap si magi-magiken taneh e man kerina rubia-rubia, janah sada-sadai ndatken sada bagin. I bas abad ku abad ringan ia i bas negeri e, janah jadi sikerajangenna e seh rasa lalap.



Studi Alkitab dengan AI: Chat dengan Alkitab GPT.

Studi lengkap, silahkan lihat: Alkitab SABDA.
Dengar dan baca Alkitab Karaoke, silahkan kunjungi: Alkitab Karaoke.
Rencana Multimedia Baca Alkitab: BaDeNo.

 <<  Yesaya 34 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Keesaan
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Alkitab GPT
Bantuan
Dual Panel Dual Panel