Dual PanelPertenahen i negeri Babilon nari (2Raj 20:12-19)
1Kira-kira i bas paksa si e ka, raja negeri Babilon, Merodak Baladan, anak Baladan, megi berita kerna Raja Hiskia sakit janah nggo malem. Emaka ikiremkenna surat ras hadiah man Raja Hiskia.
2Ialo-alo Hiskia pertenahen ndai, jenari icidahkenna kebayakenna man kalak ndai, pirakna ras emasna, rempah-rempah ras minak wangina, ras kerina perkakas tenterana. Kasa si lit i bas gudang bage pe i bas kerina kerajanna la lit si la icidahken Hiskia man kalak ndai.
3Kenca bage ijumpai Nabi Jesaya Raja Hiskia, isungkunina nina, "I ja nari kalak enda janah kai nina man bandu?" Erjabap Hiskia nina, "Kalak enda reh i bas negeri si ndauh nari, eme negeri Babilon."
4"Kai si nggo idahna i bas istana?" "Kerina nggo idahna. Kasa si lit i bas perbendaharanku nggo kucidahken man kalak enda."
5Jenari nina Jesaya man raja, "TUHAN si Mada Kuasa ngatakenca maka,
6paksana reh me, i ja kerina barang-barang si lit i bas istanandu, kerina si nggo ipepulung nini-ninindu seh kubas paksa enda, ibaba me ku negeri Babilon, la lit sada pe si tading.
7Piga-piga kalak anak dilaki kesusurenndu pe ikut ibaba jenari ikebiri guna ijadiken suruh-suruhen i bas istana raja Babilon."
8Iertiken Hiskia kata enda maka kidekah ia nggeluh denga kerajanna tetap nge aman dingen dame. Emaka erjabap ia nina, "Berita si ipesehndu e man bangku i bas TUHAN nari mehuli nge."