Dual Panel1Adi paksa si ndai nggo pagi seh, pitu kalak diberu pagi nagangi sekalak dilaki janah nina, "Berelah maka ikataken kami kam perbulangen kami, gelah ula kami la tersereh sabap mela kami adi la tersereh; nakan ras uis kami, kami gia muatca."
Jerusalem ipesikap Dibata me mulihi
2Seh me paksana maka sinuan-sinuan ras batang kayu si lit i bas negeri e ibere TUHAN turah, mbelin ras mejile. Sanga si e kerina kalak Israel si tading denga meriah ukurna dingen megah akapna erkiteken ulih peranin si ipedarat taneh e.
3Kerina kalak si tading i Jerusalem si nggo ipilih TUHAN gelah tetap nggeluh, igelari badia.
4Alu KuasaNa Tuhan ngerunggui ras murihi bangsa e gelah mejelis kesalahen Jerusalem, i bas dareh si pernah mambur i je.
5Kenca bage, sanga suari itamaken TUHAN me embun i babo Deleng Sion ras i babo kerina kalak si pulung i je. Tupung berngi ItamaNa cimber ras sinalsal terang. Kemulian Dibata nutupi ras ngkawali kota e kerina.
6KemulianNa ngelinggemisa i bas las matawari nari janah IbahanNa jadi ingan cilinggem, ingan cio sanga udan meder ras angin meter.