Dual Panel1Dewa Bel nggo mbengkung, Nebo nggo njerunuk; nai dibata-dibata Babil e isembah, tapi genduari iampeken ku gurung asuh-asuhen baban si mberat man asuh-asuhen si nggo latih.
2Gana-gana e la ngasup engkelini dirina, tapi itaban jenari ibaba kerina, bage me jadina man gana-gana Babilon.
3O kesusuren Jakup, dengkehkenlah Aku, kam kerina si tading denga i bas bangsangKu. Nggo kutatang-tatang kam mulai i bas bertin nari, tangtang tubuhndu nari nggo kam Kuembahi.
4Aku kap Dibatandu, emaka Kuembah-embah kam, seh kam metua janah ubanen. Aku si njadiken kam, emaka Kutatang-tatang, Kuangkip-angkip, janah Kukelini kam.
5Ras ise kin Aku banci ipeserindu? Lit kin si deban bali ras aku?
6Italangi kalak dompetna, jenari itungtungkenna emasna; janah itimbangna pirak i bas neraca. Iupahina tukang emas lako erbahan gana-gana, kenca bage nembah erjimpuh ia i lebe-lebena.
7Iampekenna gana-gana e ku babo barana, ipersanna lawes; jenari itamakenna ka ku inganna. I je me lalap gana-gana e tedis, la ngasup miserken bana. Adi lit kalak ertoto ku ia, la ia ngasup ngaloi la ngasup pe ia ngkelinisa i bas cilaka nari.
8Ingetlah enda, o perdosa, ukurilah si nggo-nggona.
9Peinget-ingetlah kai si jadi nai. Akuilah maka Aku ngenca Dibata, janah la lit si bali ras Aku enda.
10Bena-benana nari nggo Kunubuatken kerna kedungenna, nai-nai nari nggo Kuturiken kai si nandangi jadi. Nggo Kukataken maka rencanangKu la terolangi, janah sura-surangKu la banci lang Kudalanken.
11Kudilo sekalak jelma i Timur nari, ia reh desken perik rajawali. Kerina sura-surangKu idalankenna, sue ras kata si Kubelasken, bage me jadina.
12Begikenlah Aku o bangsa si mekeng pusuhna; iakapndu maka kemenangen ndauh denga.
13Aku erbahanca maka ndeher kemenangen, janah kemenangenKu la Kupelawen-lawen. Kota Jerusalem Kuselamatken, janah man Israel Kubereken kemulianKu."