Alkitab Mobile SABDA
[VER] : [KARO]     [PL]  [PB] 
 <<  Yesaya 54 >> 

Kekelengen TUHAN man Israel

1O Jerusalem, kidekah enda bali kam ras diberu si la mupus tapi genduari kam nggo banci rende dingen ersurak alu meriah. Nterem me anakndu, teremen asa anak pernanden si la pernah itadingken perbulangenna.

2Pebelinilah kemahndu, ula tanggungi, pegedangi tinali-tinali dingen peteguhi pantuk-pantukna.

3Sabap ipebelangi me tanehndu ku kerina dampar, janah kota-kota si lume, dem pagi mulihi. Negerindu si genduari ikuasai bangsa si deban, mulai ka pagi jadi sikerajangenndu.

4Ula kam mbiar sabap lanai pagi mela iakapndu, lanai pagi megombang kalak man bandu. Lupa me kam pagi kerna kini-la-patuhenndu tupung ngudandu, bage pe kai si man kemelanken sanga kam mbalu.

5Si nepa kam eme perbulangenndu, GelarNa eme TUHAN si Mada Kuasa, Dibata si Badia nu Israel eme kap kekelengenndu, Ia me si merentah doni enda kerina.

6Kam desken sekalak ndehara si nguda denga si erceda ate erkiteken itadingken perbulangenna. Tapi ilebuh TUHAN kam mulihi nina,

7"Kentisik ngenca kam Kutadingken; Kulegi me kam mulihi alu kekelengen si mbelin.

8Erkiteken gara pernembeh ateKu, la Aku nggit ncidahken ayongKu, tapi labo aku lalap nembeh man bandu. Jenari rasa lalap Kucidahken kekelengenKu." Bage nina TUHAN, Penebusndu.

9"Tupung paksa Nuah, erpadan Aku nai, ndigan pe lanai Kubahan kelenglengen ndemi doni. Genduari erpadan Aku, ndigan pe lanai kam Kutembehi; lanai kam Kuukum, lanai Kurawai.

10Bicara deleng-deleng miser gia, uruk-uruk pe mundu-undu, tapi keleng ateKu tetap la miser i bas kam nari, janah padan dame si Kubahan lalap paguh la mundu-undu." Bage nina TUHAN si ngkelengi kam tetap.

Jerusalem si mbaru

11Nina TUHAN, "O Jerusalem, kota si sangana mesera, kota si medungu, si la lit ngapulisa. Kupanteki ka kam mulihi i babo batu sapir si meherga, janah kerina batu batandu kuleketken alu semin si mejilena.

12Menara-menarandu Kubahan batu delima tembok-tembokndu batu permata; pintu-pintu gerbangndu batu si erndilap-erndihawa rupana ernala-nala, bagi api si gara.

13Aku jine kap si ngajari pendudukndu, emaka senang dingen dame geluhna kerina.

14Kebujuren ras kebenaren mahanca kam megegeh, lanai lit si nindih kam, lanai lit si man kebiaren.

15Adi iperangi kalak kam, labo bekasKu nuruh; ise si ngelawan kam la banci lang ndabuh.

16Aku kap si njadiken tukang besi, si pegara api arang lako nepa senjata. Aku ka nge si njadiken tentera si make senjata e lako munuhi.

17Tapi la lit senjata si banci nakiti kam; janah kasa kai si ngaduken kam italukenndu i bas pengadilen. Kerina suruh-suruhenKu Kubela; Kubereken bana kemenangen." Bage nina TUHAN.


  Share Facebook  |  Share Twitter

 <<  Yesaya 54 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel