Dual PanelNggit min Israel ngaloken
1Nina TUHAN, "Marilah kam si muas kerina, lau inemen nggo sikap i jenda. Marilah kam si la erduit kerina, enda nakan, panlah asa puasna. Marilah, anggur ras susu lit i jenda, buatlah, la pada nukur gia.
2Kai gunana nukurken duit kempak barang si la mahan besur? Kai gunana ngkeriken gajindu tapi tetap denga kam melihe rusur? Begiken, kai si Kukataken, janah lakokenlah maka besur kam man pangan si ntabeh.
3Genduari, marilah dengkehken Aku, o bangsangKu; marilah, maka idatndu kegeluhen, dahi Aku. Kubahan sada perpadanen si la ermasap-masap ras kam. KekelengenKu si nteguh man Daud, Kusehken ku kam.
4Kubahan nai ia jadi peminpin ras puanglima, janah arah ia Kucidahken kuasangKu man bangsa-bangsa.
5Genduari idilondu me bangsa-bangsa si deban; aminna la gia kam sitandan. Tapi kiam ia lako njumpai kam. Si enda kerina banci jadi, erkiteken Aku, TUHAN Dibatandu, Dibata si Badia nu Israel, mereken kehamaten ras kemulian man bandu."
6Daramilah TUHAN tupung banci denga jumpa ras Ia, ertotolah man BaNa, tupung Ia ndeher denga.
7Itadingken kalak jahatlah dalinna, isambarinalah perukurenna. Mulihlah kalak jahat kempak TUHAN, Dibatanta, sabap Ia perkuah, janah simpar pengalemi dosa i bas Ia.
8Nina TUHAN, "PerukurenKu la bali ras perukurenndu, dalanKu labo seri ras dalanndu.
9Bagi langit ndauh ganjangen asa doni, bage me pe ndauh kal ganjangen dalinKu asangken dalinndu, perukurenKu asangken perukurenndu.
10Bali ras udan sinusur i langit nari, lanai mulih ku datas tapi litap ibanna doni, si mahanca turah sinuan-sinuan, si ngelitken benih ras nakan man pangan,
11bage me pe kata si Kubelasken, la mulihken man bangKu alu sia-sia, tapi isehkenna kai si Kurencanaken, dingen ilakokenna kai Kusuraken.
12Itadingkenndu Babil alu dem keriahen, alu dame kam kerina itaruhken. I lebe-lebendu rende meriah deleng-deleng ras uruk-uruk, batang-batang kayu ersurak ras ertepuk-tepuk.
13Gancih duri turah kayu eru, gancih rambah duri turah kayu murbai. Enda me jadi tanda seh rasa lalap kerna Aku sada peringet-ingeten kerna kai si nggo Kulakoken."