Dual PanelNabi numpahi dosa bangsa e
1Ula akapndu maka kurangsa gegeh TUHAN lako ngkelengi kam tah pe paseksa akapndu Ia lako ndengkehken sorandu erlebuh.
2Erkiteken dosa-dosandu nge maka la IdengkehkenNa kam. Dosa-dosandu nge si nirangken kam ras Dibata.
3Sabap tanndu ras jari-jarindu keliamen erkiteken dareh ras kejahaten. Babahndu ras dilahndu melasken guak ras tipu.
4Ngadu kam ku pengadilen, tapi labo bujur sikerajangenndu. Ipenalemndu kata guak maka banci menang i bas perkarandu. Isehkendu sura-surandu erbanca mesui ate kalak.
5Pertakin si ibahandu bali ras naruh nipe si erbisa si erbahanca kalak mate. Adi itaperkenndu naruh e, luar nipe! Tapi pertakinndu e labo erguna, man bandu, sabap bali kap e ras uis si ibahan i bas banto lawah-lawah nari.
6(Yes 59:5)
7Rusur irencanakenndu si jahat, janah kurang pedas akapndu ndalankenca. La kam alang-alangen munuh kalak si la ersalah. Kujapa pe kam lawes bekas radas ras kecedan ngenca itadingkenndu i bas dalanndu.
8La ietehndu dalan dame. Kasa kai si ilakokenndu pelin-pelin si la bujur. Erdalan kam arah dalan si la pinter, janah la lit ise pe si erdalan arah e banci dat dame.
Bangsa e ngakuken dosana
9Nina bangsa e, "Genduari ieteh kami ngkai maka la ikelini Dibata kami i bas kalak si nindas kami nari. Itima-timai kami terang, tapi gelap ngenca lit.
10Bagi kalak pentang, terdadap-dadap kami ku jah ku je. Jurembat kami sanga siang wari, tempa-tempa sanga berngi; tempa-tempa kami ringan i bas doni kematen si gelap.
11Ndehereng kami bagi mbaruang, sora kami nggo pero bagi sora ndrapati engkukui. Tertima-tima kami gelah ikelini Dibata i bas kalak si ndedeh kami nari, tapi sia-sia."
12Jenari nina bangsa e man TUHAN, "O TUHAN, mbue kal kejahaten kami man bandu. Dosa-dosa kami nalahken kami. Igejap kami kal kerina si e.
13Ilawan ras itulak kami Kam, janah la kami nggit ngikutken Kam. Itindas kami kalak si deban, janah itadingken kami Kam. Pusuh kami dem alu taki; kata-kata kami guak kerina.
14Keadilen ipelawes, janah kebenaren ipedauh. Ketuhu-tuhun tertuktuk i tengah-tengah jelma si nterem, janah kebujuren la lit inganna.
15Lanai lit piga kalak si bujur, seh maka kasa kai kalak si menaken erbahan bujur, ia jine rate mesui erkiteken kejahaten kalak man bana."
TUHAN ersikap-sikap mulahi BangsaNa
TUHAN nggo ngidah si enda, janah nembeh AteNa perbahan lanai lit kebujuren.
16Sengget kal Ia ngidahsa sabap lanai lit ise pe nampati kalak si ikicatken. Erkiteken si e IpakeNa GegehNa jine lako mulahisa janah IberekenNa kemenangen man bana.
17IpakeNa me kebujuren desken baju besi dingen kemenangen desken topi waja. IuisiNa BaNa alu kebulaten ukur lako majekken kebenaren janah ngukum ras erbalas nandangi kejahaten si mahan kalak mesera.
18IukumNa me imbang-ImbangNa sue ras perbahanenna, subuk si ringan i bas ingan si ndauh.
19I kenjahe nari terus ku kenjulu, kerina pagi kalak mbiar man BaNa ras man KuasaNa si mbelin. Ia reh desken lau belin si meter, desken angin si megegeh.
20Nina TUHAN man BangsaNa, "Reh me Aku ku Jerusalem lako ngkawali ras engkelini kerina kam si nadingken dosa-dosandu.
21Janah Kubahan sada perpadanen ras kam, eme: nggo Kubereken gegehKu ras pengajarenKu jadi sikerajangenndu seh rasa lalap, janah mulai genduari nari arus ikutkenndu Aku. Anak-anakndu ras kesusurenndu pe arus iajarindu maka patuh man bangKu genduari nari seh rasa lalap."