Dual PanelBerita man Raja Ahas
1Asum Raja Ahas, anak Jotam kempu Usia, jadi raja i Juda, pecah me perang. Resin raja Siria, ras Peka anak Remalia raja Israel reh nerang Jerusalem, tapi la tertalukenca.
2Kenca iberitaken man raja Juda maka tentera Siria nggo seh i Israel, mbiar kal raja Juda ras rayatna, nggirgir ia kerina desken batang kayu si mugur-ugur iembus angin.
3Jenari nina TUHAN man Jesaya, "To baba anakndu Sear Jasup njumpai Raja Ahas. Idapetindu ia kari i bas ujung parik dalan lau maler i bas kolam si arah gugung nari, eme ingan si biasa ipake kalak naptapi uis erdahin.
4Kataken man bana gelah ia erjaga-jaga tapi tetap teneng. La pada ia mbiar, la pada gulut ukurna. Amin uga rawana pe Raja Resin, ras tenterana kalak Siria e, bage pe Raja Peka, labo e man kebiaren, sabap labo lebih e asangken cimber dua ciken si sangana meseng.
5Siria ras Israel rikut ras rajana nggo erpekat.
6Iserangna atena Juda, janah ipebiar-biarna rayat Juda gelah ergabung ras ia, janah kenca bage iangkatna atena anak Tabeel jadi raja.
7Tapi Aku, TUHAN, ngatakenca maka si e la banci ndigan pe jadi.
8Ngkai? Erkiteken Siria labo gegehen asangken ibukotana Damaskus, janah Damaskus labo gegehen asa Raja Resin. Adi kerna Israel, enem pulu lima tahun nari negeri e la banci lang nggo terpecah-pecah seh maka negeri e lanai sada bangsa.
9Israel labo gegehen asa ibukotana Samaria, janah Samaria labo gegehen asa Raja Peka. Adi kinitekenndu la nteguh, tentu kam ndabuh."
Tanda Imanuel
10Itenahken TUHAN ka sada nari berita man Ahas nina,
11"Pindolah tanda man TUHAN, Dibatandu, tanda e banci i bas ingan si mbages nari eme kematen, tah pe i bas ingan si meganjang i Surga nari."
12Ngaloi Ahas nina, "La aku nggit mindo tanda. La ateku ncubai TUHAN."
13Megi si e nina Jesaya njabapsa, "Genduari begikenlah o kesusuren Raja Daud. Kesabaren manusia nggo keri ibahanndu; la kin akapndu bias e, maka kesabaren Dibata pe ikerikenndu ka atendu?
14Dage TUHAN genduari mereken tanda man bandu eme: Mehuli me pagi kula sekalak singuda-nguda jenari ipupusna me sekalak anak dilaki janah ibahanna gelarna 'Imanuel'.
15Kenca nggo pagi dem belinna, dingen ngasup ia erbahan keputusen jine, i je me pagi bangsa enda minem susu ras man tengguli.
16Tuhu, ope denga seh pe paksa si e, negeri raja si dua e si pebiar-biar kam genduari e, nggo pagi jadi ingan si melungen.
17Reh me man bandu, man rayatndu ras man kerina keluarga raja wari-wari kesusahen si mberat, beraten asa si pernah jadi kenca Israel erleka ras Juda, sabap ibaba TUHAN me ku jenda raja Assur.
18Adi nggo seh pagi paksa si e, idilo TUHAN me kalak Mesir ras kalak Assur gelah ia reh ku jenda. Emaka reh me ia pagi desken laneng i serang Lau Nil nari, desken wani i negeri Assur nari.
19Icinepina me kerina baluren-baluren, liang-liang si lit i bas batu, janah idemina kerina rambah-rambah si erduri bage pe kerina mbalmbal.
20Adi nggo seh pagi paksa si e, iupahi Tuhan me sekalak tukang pangkas, eme raja Assur i lepar Lau Eprat nari, janah labo buk takal saja ngenca icukurna, tapi terus ku mbulu paha pe mejelis ibahanna.
21Sanga si e pagi sada lembu ras dua kambing ngenca iasuhi kalak,
22janah susu lembu ras susu kambing e nari ngenca man pangan kalak. Tuhu, kalak si lit denga tading i bas negeri e susu ras tengguli kerangen nari ngenca panganna.
23I bas paksa si e pagi, peken anggur si mehuli si isin seribu batang anggur, janah ergana seribu duit pirak, jadi peren janah turah i je bungke rimbang ras rambah duri.
24Ingan e nggo jadi ingan kalak erburu alu panah ras anak panah. Tuhu, kerina negeri e pagi dem alu bungke rimbang ras rambah duri.
25Kerina uruk-uruk si gelgel nari iperjumai, nggo dem rambah si erduri seh maka lanai lit ise pe lawes ku je. Peken si mejile e nggo salih jadi ingan lembu ras biri-biri cigagat."