Alkitab Mobile SABDA
[VER] : [KARO]     [PL]  [PB] 
 <<  Yesaya 8 >> 

Anak Nabi Jesaya jadi sada tanda man bangsa e

1Ikataken TUHAN man bangku nina, "Buat sada batu tulis si mbelang jenari suratken i je tulisen si terang, 'Pedas irampas, Rempet irampas.'

2Dilo dua kalak saksi si terteki eme Imam Uria ras Imam Sakaria anak Jeberekia."

3La asa kai nari dekahna, mehuli me kula ndeharangku. Kenca tubuh sekalak anak kami dilaki nina TUHAN man bangku, "Bahan gelarna Pedas Irampuk -- Kotep Irampuk.

4Sabap ope denga anak e beluh ngataken 'Bapa' Ras' Nande', kerina kebayaken Damaskus ras kerina barang rampasen si lit i Samaria iangkut raja Assur pagi."

Reh raja Assur

5Ngerana ka TUHAN man bangku nina,

6"Erkiteken bangsa enda la nggit ngaloken Lau Siloa si manjar-anjar permalerna, janah nggirgir ia i lebe-lebe Raja Resin ras Raja Peka,

7emaka Aku, Tuhan, ateKu maba raja Assur ras kerina tenterana lako nerang Juda. Reh me ia desken Lau Eprat si banjir si nggo mulsak arah tebing-tebingna.

8Ergalun arah Juda desken banjir, launa nangkih seh kerahung." Dibata kap ras kita! KabengNa IkirbangkenNa ngkawali negeri e.

9O bangsa-bangsa, pulunglah, tapi gentar nge kam. O negeri-negeri si ndauh begikenlah! Ersikaplah kam erperang, tapi birawan me. Tuhu, ersikaplah, tapi alu gentar!

10Bahanlah rencanandu, tapi ndigan pe labo tersehkenndu. Belasi sajalah uga atendu, tapi sia-sia nge kerina, sabap Dibata ras kami.

TUHAN mpersingeti nabi

11Alu KuasaNa si mbelin ipersingeti TUHAN aku gelah ula ngikutken lagu langkah jelma si nterem. IkatakenNa man bangku nina,

12"Ula kam nggit ikut i bas pertakin si ibahan bangsa enda, janah ula kam mbiar nandangi kai si ibiarina.

13Inget, maka Aku, TUHAN si Mada Kuasa, badia kap; man bangKu ngenca kam arus mbiar.

14Erkiteken kebadianKu, Aku desken batu si erbahanca kalak tertutuk. Aku desken siding si nidingi rayat kerajan Juda ras Israel bage pe penduduk Jerusalem.

15Nterem pagi kalak si tertutuk; jongkang ia janah mbelkam lukana. Kerina ia kena perangkap."

Kata persinget gelah ula nungkuni guru si baso

16Kam ajar-ajarku arus njaga ras muniken kata si nggo ibereken Dibata man bangku.

17Ibuniken TUHAN DiriNa i bas BangsaNa nari, tapi aku ernalem ras erpengarapen man BaNa.

18Aku ras anak-anakku si ibereken TUHAN si Mada Kuasa, si ringan i Deleng Sion, nggo IsuruhNa jadi berita si nggeluh man bangsa Israel.

19Tapi jelma si nterem ugapa pe nuruh kam gelah nungkun berita i bas guru perkatika ras guru si baso nari, si erkata kerahungna ras guru pertabas. Nina kalak si nterem e, "Ma arus kin kita nungkun keramat-keramat ras begu kalak mate guna kiniulin kalak si nggeluh."

20Emaka arus i jabapndu ia, nindu, "Begikenlah kai si iajarken TUHAN man bandu. Ula begiken guru-guru si baso, sabap kai si ikatakenna labo lit gunana man bandu."

Paksa kesusahen si mesangat

21Isiar-siari bangsa e belang-belang negeri; kelihen dingen tumpat ukurna kerina. Erkiteken lihena janah perban nembehna atena isumpahina rajana ras Dibatana. Aminna itarena pe ku langit,

22tah inehenna ku taneh, la lit kai pe iidahna seakatan kesusahen ras kegelapen. Ku bas kegelapen si mejin eme ia kerina igurba.


  Share Facebook  |  Share Twitter

 <<  Yesaya 8 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel