Alkitab Mobile SABDA
[VER] : [KARO]     [PL]  [PB] 
 <<  Yohanes 12 >> 

Jesus iminaki i Betani (Mat 26:6-13; Mrk 14:3-9)

1Enem wari ope Wari Raya Paskah, Jesus lawes ku Betani kuta Lasarus si nggo IpekekeNa i bas si mate nari.

2Emaka kuskas Marta nikapken pangan guna ielaken man Jesus ras temue si debanna. Lasarus kundul ras Jesus.

3Kenca e reh Maria, ibabana sada botol galang minak merim si meherga. Icurcurkenna minak e ku nahe Jesus, jenari isapuina alu bukna. Emaka merim kerina i bas rumah e.

4Jenari ngerana sekalak ajar-ajar Jesus, gelarna Judas Iskariot (si ndayaken Jesus) nina,

5"Ngkai maka la idayaken saja minak e telu ratus duit pirak jenari duitna e ibereken man kalak musil?"

6Si enda ikatakenna labo erdandanken iukurina kalak musil, tapi erdandanken pinangko ia. Ia kap si njemak perduiten kalak enda janah megati ipakena duit e.

7Tapi nina Jesus, "Ola kam nuhsahi diberu enda! Pelepaslah ibahanna enda guna penguburenKu!

8Adi kalak musil lit nge pagi lalap ras kam, tapi Aku labo pagi lalap ras kam."

Imam-imam si mbelin ersura-sura munuh Lasarus

9Nterem kalak Jahudi megi berita maka Jesus paksa si e i Betani. Emaka lawes kalak Jahudi e ku jah. Kalak ndai lawes ku Betani labo erdandanken Jesus saja, tapi pe guna ngenehen Lasarus si nggo ipekeke Jesus i bas si mate nari.

10Emaka imam-imam ersura-sura munuh Lasarus pe;

11sabap erkiteken Lasarus nggo nterem kalak Jahudi nadingken peminpin-peminpinna janah tek ia man Jesus.

Surak-surak si meriah i Pintu Gerbang Jerusalem (Mat 21:1-11; Mrk 11:1-11; Luk 19:28-40)

12Pepagina kalak si nterem si reh ku Jerusalem ngerayaken Paskah megi berita maka Jesus sangana i dalan nandangi seh ku Jerusalem.

13Emaka itektekna lambe jenari ialo-alona Jesus. Ersurak-surak ia nina, "Pujilah Dibata! Ipasu-pasu gelah Kam si reh i bas gelar Tuhan! Ipasu-pasu gelah Raja kalak Israel!"

14Paksa e idapeti Jesus sada kalde si nguda denga. IersakNa kalde e bagi si tersurat i bas Pustaka Si Badia,

15"Ola mbiar o kuta Sion! Nehenlah reh Rajandu, IersakNa kalde nguda!"

16Paksa si e la iangka ajar-ajar Jesus kai ertina kata enda. Tapi kenca Jesus ipakuken ku kayu persilang janah kenca Ia ipekeke Dibata i bas si mate nari, iinget ajar-ajar maka si tersurat enda e me kerna Jesus janah nggo pe jadi man BaNa.

17Kalak si i je tupung Jesus ngelebuh Lasarus gelah ndarat i bas kuburen nari dingen mpekekesa i bas si mate nari terus ersaksi kerna kejadin e.

18Erdandanken si e me maka nterem kalak njumpai Jesus, sabap ibegina maka nggo ibahan Jesus tanda sengget si mbelin e.

19Nina kalak Parisi sapih-sapih ia, "Nehenlah, kerina usahanta sia-sia, sabap i ja pa pe nterem kalak ngikutken Ia!"

Piga-piga kalak Junani mesikel jumpa ras Jesus

20I bas jelma si nterem si lawes ku Jerusalem guna ngikuti kebaktin i bas wari raya e, lit piga-piga kalak Junani.

21Ijumpaina Pilipus (ia i Betsaida daerah Galilea nari) jenari nina, "O, tuan mesikel kal kami jumpa ras Jesus."

22Idahi Pilipus si Andereas, jenari iturikenna sura-sura kalak Junani e man bana. Kenca bage duana ia lawes ngatakenca man Jesus.

23Ngaloi Jesus man bana duana, "Genduari nggo seh paksana, Aku, Anak Manusia persuruhen Dibata ipermuliaken.

24Kukataken man bandu: Si tuhuna sengkebuah page labo reh buena adi la kin isuanken dingen mate. Adi benih e isuanken dingen mate, melala me buahna.

25Kalak si engkelengi geluhna si i doni enda, bene kap kegeluhenna e. Tapi kalak si nembeh atena geluhna si i bas doni enda, kegeluhen si tuhu-tuhu dingen si rasa lalap tetap jadi sikerajangenna.

26Ise atena jadi persuruhenKu, ikutkennalah Aku; gelah persuruhenKu tetap ras Aku amin i japa pe Aku ringan janah persuruhenKu ipehaga BapangKu."

Ituriken Jesus kerna KematenNa

27Jenari nina Jesus, "Genduari ceda kal ateKu. Kuga ndia ningKu? Kukataken ndia pagi, 'O Bapa, pedauh min paksa kiniseran enda i bas Aku nari?' Lang, sabap guna si e kap Aku reh, gelah Kunanami kiniseran e.

28O Bapa ipermuliakenlah GelarNdu!" Jenari terbegi sora i langit nari Nina, "Nggo Kupermuliaken Ia, janah tetap denga Kupermuliaken."

29Megi sora e nina kalak si nterem si tedis i je, "Sora lenggur kap e." Tapi deba nina, "Labo! Malekat nge ngerana man BaNa!"

30Tapi nina Jesus man kalak si nterem si megi sora e, "Labo man gunangKu maka reh sora e, tapi man gunandu.

31Genduari me paksana doni enda iadili. Genduari italuken me si Penguasa doni enda.

32Kenca Aku ipeganjangken i doni nari, Kurintak me kerina manusia man bangKu."

33(Alu KataNa enda me IturikenNa kerna kematen si nandangi InanamiNa.)

34Jenari ngaloi kalak si nterem, "Rikutken Undang-undang kami, Raja Penampat si ipadanken Dibata e nggeluh me rasa lalap. Ngkai maka IkatakenNdu si reh i bas Dibata nari e ipeganjangken i doni nari? Ise kin Anak Manusia si reh i bas Dibata nari e?"

35Erjabap Jesus, "Kentisik nari ngenca terang e ringan i tengah-tengahndu. Teruskenlah perdalanenndu asum terang e lit denga i tengah-tengahndu, gelah ola kam ikuasai si gelap; sabap kalak si erdalan i bas gelap, la ietehna ku ja ia lawes.

36Dage teklah kam man terang e, asum terang e ras kam denga, gelah kam jadi kalak si nggeluh i bas terang."

Sabapna kalak Jahudi la tek man Jesus

Kenca ikataken Jesus si e, lawes Ia cebuni gelah la idah kalak si nterem.

37Aminna gia nggo melala tanda sengget ibahan Jesus i lebe-lebe kalak si nterem e, labo ia tek man Jesus.

38Alu bage nggo seh nubuat Nabi Jesaya nina, "O Tuhan ise nge tek nandangi berita si ipeseh kami? Janah man ise kin nggo tangkas kuasa Tuhan?"

39Kalak ndai la ngasup tek sabap nggo pe ikataken Nabi Jesaya,

40"Nggo pentang ibahan Dibata matana, bage pe nggo ipemersik Dibata ukurna; gelah matana la erpengidah, janah ukurna la erpengangka. Gelah ola ia mulihken man bangKu janah gelah ola Kualemi dosa-dosana nina Dibata."

41Si enda nai ikataken Nabi Jesaya erdandanken nggo idahna kemulian Jesus si mbelin janah erdandanken si emaka ia ernubuat kerna Jesus.

42Amin bage gia nterem nge kalak Jahudi si erkuasa tek man Jesus. Tapi erdandanken mbiar ia ipedarat kalak Parisi i bas Rumah Pertoton nari la ia terang-terangen encakapken kinitekenna.

43Ngenan atena pujin i bas manusia nari asangken pujin i bas Dibata nari.

Kata si ibelasken Jesus

44Jenari nina Jesus alu sora megang, "Ise tek man bangKu, labo man bangKu saja ia tek tapi man si nuruh Aku.

45Ise ngidah Aku, idahna pe si nuruh Aku.

46Aku reh ku doni enda bali ras terang, gelah kalak si tek man bangKu la tading i bas gelap.

47Kalak si megi pengajarenKu tapi la ikutkenna, labo Aku ngukumsa. Aku reh labo guna ngukum doni enda, tapi guna mulahisa i bas ukumen nari.

48Kalak si nulak Aku dingen la ngaloken pengajarenKu lit nge pagi si ngukum ia. Kata si nggo Kupeseh e pagi ngukum ia i bas wari pendungi!

49Aku ngerana labo bagi ate-ateKu saja, tapi Bapa nge si nuruh Aku, janah Ia ngaturken kai arus Kukataken ras Kuturiken.

50Janah Kueteh maka perentahna e mereken kegeluhen si tuhu-tuhu si la erkeri-kerin. Emaka Kupeseh kai si iajarken Bapa man Bangku."


  Share Facebook  |  Share Twitter

 <<  Yohanes 12 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel