Alkitab Mobile SABDA
[VER] : [KARO]     [PL]  [PB] 
 <<  Yohanes 14 >> 

Jesus me si negu manusia ndahi Bapa

1Jenari nina Jesus man ajar-AjarNa kerina, "Ola aru atendu. Ernalemlah kam man Dibata janah ernalem pe kam man bangKu.

2I bas rumah BapangKu mbas ingan; janah lawes me Aku nikapken ingan man bandu. Tuhu kap enda; adi lang labo Kukataken bage man bandu.

3Kenca Aku lawes nikapken ingan man bandu, reh denga pagi Aku ngalo-ngalo kam, gelah i ja Aku i je kam pe.

4Ietehndu dalanna ku inganKu lawes e."

5Emaka nungkun Tomas man Jesus, "O Tuhan, la kap ieteh kami ku ja Kam lawes; kuga ka pemeteh kami dalanna ku je?"

6Erjabap Jesus man Tomas, "Aku kap dalan nandai Dibata, dingen ndatken kegeluhen. Ise pe la banci ndahi Bapa adi la arah Aku.

7Adi Aku nggo itandaindu, BapangKu e pe nggo itandaindu. Genduari nari itandaindu me Ia janah nggo pe idahndu."

8Emaka nina Pilipus man Jesus, "O Tuhan cidahken dage Bapa e man kami, gelah puas iakap kami."

9Ngaloi Jesus, "O Pilipus, bage dekahna nggo Aku ras kam kerina, langa kin Aku itandaindu? Ise nggo ngidah Aku, nggo idahna pe Bapa e. Ngkai maka nindu, 'Cidahken Bapa e man kami?'

10O Pilipus, la kin kam tek maka Aku ersada ras Bapa, janah Bapa ersada ras Aku? Kerina si nggo Kukataken man bandu, labo i bas Aku nari saja. Bapa si ersada ras Aku e me si ndahiken kerina si e.

11Teklah kam maka Aku ersada ras Bapa, janah Bapa ersada ras Aku. Adi la kam tek arah si Kukataken enda, arah perbahanenKu e lah gia kam tek.

12Kukataken man bandu maka situhuna kalak si tek man bangKu, ibahanna me bagi si nggo Kubahan. Tuhu ibahanna pe terbelinen asangken si e, sabap Aku lawes ndahi BapangKu.

13Maka kai pe pagi ipindondu i bas gelarKu, Kubereken nge, gelah Bapa ipemuliaken arah Anak e.

14Ntah kai gia ipindondu i bas gelarKu, Kubereken nge."

Ipadanken Jesus kerehen Kesah Si Badia

15"Adi keleng atendu Aku, ikutkenlah pedah-pedahKu.

16Kupindoken me man BapangKu gelah IsuruhNa Penampat si deban man bandu e me Kesah si naksiken kebenaren kerna Dibata, gelah ItemaniNandu rasa lalap.

17Doni enda la ngasup ngaloken Ia sabap la Ia idah doni enda dingen la itandaina. Tapi kam itandaindu Ia sabap Ia ras kam, janah kam ringan i bas Ia.

18Labo kam Kutadingken melumang. Reh nge Aku mulihken ndahi kam.

19Kentisik nari, lanai bo Aku idah doni enda. Tapi kam idahndu nge Aku janah perbahan Aku nggeluh, kam pe nggeluh me.

20I bas wari e pagi, ietehndu me maka Aku ersada ras Bapa, janah kam ersada ras Aku bage pe Aku ersada ras kam.

21Kalak si ngaloken dingen ngikutken pedah-pedahKu, ia me si engkelengi Aku. Kalak si engkelengi Aku ikelengi BapangKu kap ia; janah Aku pe engkelengi ia ras Kupetandaken diringKu man bana."

22Jenari nina Judas (labo Judas Iskariot), "O Tuhan nggit Kam mpetandaken DiriNdu man kami, janah la man doni enda?"

23Erjabap Jesus, "Kalak si engkelengi Aku, ikutkenna kap katangKu. Alu bage ikelengi BapangKu me ia, janah Bapa ras Aku reh ndahi ia dingen ringan ras ia.

24Kalak si la engkelengi Aku, labo ikutkenna katangKu. Kata si ibegikenndu labo katangKu tapi rehna i bas Bapa si nuruh Aku e nari.

25Si enda Kukataken man bandu asum Aku ras kam denga.

26Si nampati, eme Kesah Si Badia, si isuruh Bapa pagi i bas gelarKu, IajariNandu kerna kai pe; dingen IpersingetiNandu pagi kerna kerina si nggo Kukataken man bandu.

27Malem me atendu Kutadingken; Kemalemen ateKu Kubereken man bandu. Carana Aku mere kemalemen ate e man bandu labo bali ras cara doni enda merekenca. Ola ukurndu gulut janah ola kam mbiar.

28Nggo ibegindu maka ningku, 'Lawes me Aku, tapi reh ka nge pagi Aku ndahi kam.' Adi keleng atendu Aku, meriah nge ukurndu Aku lawes ndahi Bapa, sabap BapangKu e belinen nge KuasaNa asangken Aku.

29Genduari nggo Kukataken si e man bandu ope denga jadi; gelah kenca jadi pagi si e tek kam.

30Lanai bo Aku gedang ngerana ras kam, sabap si Penguasa doni enda reh me. Si tuhuna labo lit kuasana nandangi Aku.

31Tapi gelah ieteh doni enda maka keleng ateKu Bapa, e me sabapna maka Kuikutken kerina si isuruh Bapa. Ota lawes kita i bas ingan enda nari."


  Share Facebook  |  Share Twitter

 <<  Yohanes 14 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran