Dual PanelKalak Amori italuken
1Ibegi Adonisedek, raja Jerusalem, maka kota Ai nggo italuken ras ihancurken Josua tuhu-tuhu. Rajana pe nggo ibunuh, bagi si nggo ibahanna man kota Jeriho ras rajana. Nggo pe ibegina maka kalak Gibeon nggo erbahan perdamen ras bangsa Israel janah nggo ras ia tading.
2Perban e seh kal biarna penduduk Jerusalem sabap Gibeon eme sada kota si mbelinna si lit rajana. Kota e belinen asa kota Ai, janah pendudukna kalak si beluh erperang.
3Emaka itenahken Adonisedek me berita enda man Raja Hoham i Hebron nari, Raja Piran i Jarmut nari, Raja Japia i Lakis nari, ras man Raja Debir i Eglon nari nina,
4"Rehlah kam, sampati aku nerang kota Gibeon, sabap pendudukna nggo erbahan perdamen ras Josua ras bangsa Israel."
5Raja Amori si lima enda: raja Jerusalem, raja Hebron, raja Jarmut, raja Lakis, raja Eglon, ipersadana gegehna, ngkepungna Gibeon, jenari iserangna kota e.
6Kalak Gibeon minter nehken berita man Josua ku ingan erkemah i Gilgal nina, "Ula min tadingken kam kami, bapa! Pedas lah kam reh, sampati kami! Selamatken kami! Kerina raja-raja kalak Amori i deleng nari nggo mpersada gegehna, lako nerang kami!"
7Emaka Josua ras kerina tenterana, ikut pasukenna si mbisana, berkat i Gilgal nari.
8Nina TUHAN man Josua, "Ula kam mbiar man kalak e. Nggo Kubereken man bandu kemenangen. La lit sada pe i bas ia nari si ngasup ertahan ngelawan kam."
9Gedang-gedang berngi Josua ras tenterana erdalan i Gilgal nari ku Gibeon, jenari ibahanna sada serangen si rempet mahanca sengget kalak Amori.
10Gentar kalak Amori ibahan TUHAN ngidah tentera Israel. Nterem ia ibunuhi kalak Israel i Gibeon, jenari iayakina ia arah dalan ngincuah-ngincuah si mentasi Bet-Horon, janah terus iserangna seh ku Aseka ras Makeda i Selatan.
11Sanga kalak Amori kiam ku berneh arah dalan e i bas tentera Israel nari, idabuhken TUHAN ku ia batu si galang bagi udan baho, la erpeltep gedang-gedang dalan seh ku Aseka. Buen ibunuh batu si bagi udan e asa si ibunuh kalak Israel jine.
12I bas warina TUHAN mereken kemenangen man bangsa Israel ngelawan kalak Amori, ngerana Josua man TUHAN, i lebe-lebe kalak Israel kerina nina Josua, "O matawari, ngadilah i babo Gibeon; o bulan, ngadilah i babo Baluren Ayalon."
13Matawari ngadi ras bulan pe la miser seh bangsa e nggo naluken musuh-musuhna. Si enda isuratken i bas Kitap Kalak Bujur. Matawari ngadi i tengah-tengah langit janah la sundut gedang-gedang wari.
14La nggo pernah bage ope denga si e, janah kenca si e pe lanai nggo pernah jadi bagi si jadi i bas wari e, asum TUHAN ngikutken kata manusia. TUHAN erperang i pihak Israel!
15Kenca si enda, Josua ras tenterana mulih ku ingan erkemah i Gilgal.
Itaban Josua raja kalak Amori si lima
16Tapi raja kalak Amori si lima nggo lompat jenari cebuni ia i bas gua i Makeda.
17Lit sekalak jumpa ras ia, jenari ikatakenna man Josua inganna cebuni.
18Nina Josua, "Gulingken batu si galang ku babah gua e. Tamaken piga-piga kalak si erjaga i je,
19tapi kam ula tading i je. Teruskenlah ayaki musuhndu jenari seranglah ia i pudi nari, ula pelepas ia bengket ku bas kotana! TUHAN Dibatandu nggo mereken kemenangen man bandu ngelawan musuhndu."
20Josua ras bangsa Israel munuhi kalak ndai, aminna gia lit sempat ndat ingan si aman i bas kotana si erbenteng janah la terbunuh.
21Kenca bage kerina tentera Josua mulihken ndahi ia alu selamat i bas ingan erkemah i Makeda. I belang-belang negeri e lanai lit ise pe si pang ncakapken si la mehuli kerna Israel.
22Kenca bage nina Josua, "Talangi babah gua e jenari baba ndarat raja si lima e man bangku."
23Emaka italangi me gua ndai, jenari raja-raja Jerusalem, Hebron, Jarmut, Lakis, ras Eglon ibaba ndarat,
24ibaba man Josua. Jenari idilo Josua kerina kalak Israel ndahi ia janah iperentahkenna man kepala-kepala pasuken si nggo lawes ras ia gelah reh ndedeh kerahung raja-raja e. Emaka bage me ibahanna.
25Kenca bage nina Josua man kepala-kepala pasukenna, "Ula kam mbiar, ula aru atendu. Tetapkenlah ukurndu janah teklah sabap bagenda me ate TUHAN IbahanNa man kerina musuhndu."
26Jenari ibunuh Josua raja-raja ndai, igantungna i das lima batang kayu, i ja maitna gantung seh ben.
27Kenca matawari sundut ibereken Josua perentah, emaka mait-mait raja ndai ipesusur janah ibenterken ku bas gua inganna cebuni ndai. Itamaken batu si galang i bas babah gua e, janah i je denga lalap.
Ikuasai Josua tole daerah kalak Amori
28I bas wari e Makeda ras rajana iserang ras italuken Josua. Ibunuhna tep-tep kalak si lit i bas kota e; la lit sada pe itadingken nggeluh. Ibahanna man raja Makeda bagi si nggo ibahanna man raja Jeriho.
29Nggo kenca dung si enda, Josua ras tenterana lawes i Makeda nari ku Lipna, jenari iserangna kota e.
30I bas kota enda pe ibereken TUHAN kang kemenangen man kalak Israel. La lit sada pe ipelepasna nggeluh, tapi ibunuhna kerina kalak si lit i bas kota e. Man rajana bali ibahanna ras kai si nggo ibahanna man raja Jeriho.
31Kenca si enda, Josua ras tenterana lawes i Lipna nari ku Lakis. Ikepungna kota e jenari iserangna.
32Kenca pertempuren e erdalan dua wari, TUHAN mereken kemenangen man bangsa Israel ngelawan Lakis. I je pe bali ka nge ibahanna ras Lipna. La lit sada pe ipelepasna nggeluh, tapi ibunuhna kerina kalak si i bas kota e.
33Raja Horam i Geser nari reh nampati Lakis, tapi italuken Josua ia ras tenterana janah la lit sada pe itadingkenna nggeluh.
34Seterusna, Josua ras tentera berkat i Lakis nari ku Eglon. Ikepungna kota e jenari iserangna.
35Italukenna kota e i bas wari e kang janah ibunuhna kerina si lit i je, bali ras si nggo ilakokenna i Lakis.
36Kenca si enda, Josua ras tenterana lawes i Eglon nari nangkeng ku Hebron, iserangna kota e
37jenari italukenna. Ibunuhna rajana ras kerina si lit i bas kota e bage pe i bas kuta-kuta i sekelewetna. Ikernepken Josua kota e seh getem tuhu-tuhu, bali ras si nggo ibahanna man Eglon. La lit sada pe itadingkenna nggeluh i bas kota e.
38Kenca bage Josua ras tenterana mulihken ku Debir jenari iserangna kota e.
39Italukenna kota e ras rajana bage pe kerina kuta-kuta i sekelewetna. Ibunuhna kerina kalak si lit i je. Man Debir ras rajana pe bali ibahan Josua ras si nggo ibahanna man Hebron ras man Lipna ras rajana.
40Kerina taneh e ikuasai Josua. Italukenna raja-raja si ringan arah deleng-deleng, arah rebe-reben si arah Timur, ras si i bas kendit si arah Barat, bage pe taneh si la lit launa i Selatan. La lit sada pe ipelepasna nggeluh. Kerina ibunuhna. Enda me kai si ipedahken TUHAN, Dibata Israel.
41Daerah si italuken Josua e mulai i Kades Barnea nari i Selatan seh ku Gasa deher tepi lawit, bengket kerina daerah Gosen, bage pe terus ku Gibeon i Utara.
42Kerina raja-raja enda ras tanehna italuken Josua sekali erperang saja ngenca sabap TUHAN, Dibata Israel, nampati Israel i bas peperangen e.
43Kenca si enda kerina Josua ras tenterana mulih ku inganna erkemah i Gilgal.