Dual PanelRaja-raja si italuken Musa
1Bangsa Israel nggo naluken ras ngiani taneh si arah Timur Jordan, mulai i Berneh Arnon nari terus nangkeng Baluren Jordan ras seh ku Deleng Hermon i Utara. Italukenna dua rajana.
2Sekalak eme kap raja Sihon, raja kalak Amori si erkuasa i Hesbon. Kerajanna setengah i bas Gileat nari: i Aroer nari i tepi (Baluren Arnon) ras kota si lit i tengah-tengah baluren e, seh ku Lau Jabok, perbalengen Amon;
3i je bengket Baluren Jordan i Dano Galilea nari ku Selatan ku Bet Jesimot (arah Timur Lawit Mate) janah terus kempak teruh Deleng Pisga.
4Italukenna ka pe Raja Og i Basan nari, sekalak i bas kalak Repaim si perpudina; ia merentah i Astarot ras Edrei.
5Si bengket ku bas kerajanna eme Deleng Hermon, Saleka, ras kerina daerah Basan seh ku perbatasen Gesur ras Maaka, bage pe setengah i bas daerah Gileat nari, seh ku perbatasen kerajan Raja Sihon i Hesbon nari.
6Raja si dua enda nggo italuken Musa ras bangsa Israel. Musa, suruh-suruhen TUHAN e, mereken taneh raja-raja enda man suku Ruben ras Gat ras man setengah i bas suku Manase, jadi sikerajangenna.
Raja-raja si italuken Josua
7Josua ras bangsa Israel naluken kerina raja-raja i daerah Barat Jordan, i Baalgat nari, si i Baluren Libanon, seh ku Deleng Halak i Selatan, deher Edom. Ibagi-bagiken Josua taneh enda man suku-suku bangsa Israel, iberekenna tetap jadi sikerajangenna.
8Bagin bengket daerah deleng-deleng, daerah teruh deleng si arah Barat, Jordan ras daerah teruh deleng, gugungen baluren e, reben-reben si arah Timur, ras taneh si la lit launa i Selatan. Nai taneh e ingan kalak Heti, Amori, Kanaan, Peris, Hewi, ras Jebusi.
9Bangsa Israel naluken raja-raja si arah teruh enda: raja Jeriho, Ai (deher Betel),
10Jerusalem, Hebron,
11Jarmut, Lakis,
12Eglon, Geser,
13Debir, Geder,
14Horma, Arat,
15Lipna, Adulam,
16Makeda, Betel,
17Tapua, Heper,
18Apek, Lasaron,
19Madon, Hasor,
20Simron Meron, Aksap,
21Taanak, Megido,
22Kedes, Jokneam (i Karmel),
23Dor (i tepi lawit), Goyim (i Galilea),
24ras Tirsa, telu pulu sada kalak raja kerina.