Dual PanelIsuruh Josua mata-mata ku Jeriho
1Kenca bage isuruh Josua dua kalak mata-mata i bas ingan erkemah i Sitim nari, gelah iselidikina secara rahasia taneh Kanaan, terlebih-lebih kota Jeriho. Kenca ia seh i kota e, erberngi ia i bas rumah sekalak diberu si pendahinna erlua-lua, Rahap gelarna.
2Ikataken kalak man raja Jeriho, maka i bas berngi e nggo reh piga-piga mata-mata bangsa Israel ku bas daerah e.
3Emaka isuruhna kalak nungkun Rahap nina, "Kalak si nggo bengket ku rumahndu e nggo reh ku jenda guna nelidiki kerina daerah enda. Emaka pedaratlah ia."
4"Payo nge tuhu maka lit piga-piga kalak dilaki reh ku rumahku," nina erjabap, "tapi la kuteh i ja nari ia. Asum matawari sundut nggo lawes ia ope denga pintu gerbang kota itutup. La kuteh ku ja ia lawes, tapi adi pedas iayakindu, tentu itundukndu." (Ope denga si e nggo ibabai Rahap duana mata-mata ndai ku das tarum, jenari ibunikenna i teruh gun-gunen batang kurri si nggo itamakenna i je.)
5(Yos 2:4)
6(Yos 2:4)
7Kalak si isuruh raja ndai minter lawes nadingken kota e, janah kenca e pintu gerbang kota itutup. Idaramina mata-mata bangsa Israel ndai seh ku ingan dalan ngepar Lau Jordan.
8Ope denga mata-mata ndai medem, lawes Rahap ku das tarum,
9jenari nina man kalak ndai duana, "Kueteh maka nggo ibereken TUHAN taneh enda man bandu. Kerina kalak i negeri enda mbiar man bandu.
10Nggo ibegi kami uga TUHAN ngkerahi Lawit Merah i lebe-lebendu asum kam nadingken taneh Mesir. Bage pe nggo ibegi kami kam nggo munuh Sihon ras Og, raja kalak Amori arah Timur Jordan.
11Mbiar kami minter kenca ibegi kami kerna si e; bene ukur kami kerina erkite-kiteken kam. TUHAN Dibatandu, Ia nge Dibata langit ras doni.
12Emaka genduari ersumpahlah kam erkite-kiteken Ia, maka bagi ulina perbahanenku man bandu bagelah perbahanenndu nandangi keluargangku, janah berekenlah tanda man bangku maka banci aku tek man bandu.
13Erpadanlah kam min man bangku maka ipelepasndu min bapangku ras nandengku nggeluh, turangku ras senina-seninangku, ras kerina keluargana! Ula min iberendu kami ibunuh!"
14Emaka nina kalak ndai duana, "Dibata lah si muat kesah kami adi la kin ibahan kami bagi si ikataken kami! Adi la ikatakenndu man ise pe kai si nggo ibahan kami, erpadan kami man bandu maka adi nggo ibereken TUHAN taneh enda man kami la banci la mehuli perbahan kami man bandu."
15Rahap ringan i bas sada rumah si ipajekken ersada ras dingding tembok kota, emaka ipesusurna kalak ndai ku teruh alu tinali arah jendela.
16"Laweslah kam ku uruk-uruk ah," nina, "gelah ula kam jumpa ras kalak si isuruh raja ngayaki kam. Cebuni kam i je telu wari dekahna seh ia nggo mulih. Kenca bage banci iteruskenndu perdalanenndu."
17Nina kalak si dua ndai man bana, "Padan si nggo ibereken kami bekas pemindonndu la banci la itepati kami.
18Tapi arus maka bagenda ibahanndu: Adi iserang kami tanehndu enda, tambatkenlah tinali si megara enda i bas jendela ingan kami ipesusurndu enda. Pepulunglah bapandu ras nandendu, turangndu, ras kerina keluarga bapandu i bas rumahndu.
19Ise ndarat i bas rumah enda nari, kematenna bekas kesalahenna jine, janah la kami ertanggung jawab, tapi ise ras kam i bas rumah enda isakiti, kami ertanggung jawab.
20Aminna bage gia, adi iturikenndu kin man kalak kai si nggo ibahan kami, emaka la perlu itepati kami padan kami si nggo ipindondu i bas kami nari."
21Setuju ia kerna si e, jenari isuruhna kalak ndai lawes. Kenca kalak ndai lawes, itambatkenna tinali megara i bas jendela ndai.
22Lawes mata-mata ndai cebuni ku uruk-uruk. Telu wari dekahna idarami kalak si isuruh raja ndai ia i bas kerina dalan, tapi la ia jumpa, emaka mulih ia ku Jeriho.
23Kenca bage mata-mata si dua ndai nusur i das uruk-uruk nari, ikeparina lau belin e, jenari mulih ia ndahi Josua. Iturikenna man bana kerina si nggo jadi,
24janah kenca e nina, "Tek kami maka nggo ibereken TUHAN man banta kerina daerah e. Kerina kalak si i je mbiar kal man banta."