Alkitab Mobile SABDA
[VER] : [KARO]     [PL]  [PB] 
 <<  Yosua 22 >> 

Josua nuruh suku-suku si arah Timur mulih ku Kanaan

1Kenca bage idilo Josua pulung suku Ruben, Gat, ras Manase Timur.

2Nina man bana kerina, "Nggo ilakokenndu kerina si nggo iperentahken Musa, suruh-suruhen TUHAN e, man bandu, janah nggo ipatuhindu kerina perentahku.

3Kidekah enda sekali pe la pernah itadingkenndu seninandu kalak Israel. Nggo metenget kam ngikuti perentah TUHAN Dibatandu.

4Genduari, sue ras si nggo IpadankenNa man senina-seninandu kalak Israel, TUHAN Dibatandu nggo mereken keamanen. Emaka mulihlah kam ku kutandu, taneh si arah Timur Jordan, taneh si ibereken Musa suruh-suruhen TUHAN e man bandu.

5I bas si e arus iingetndu gelah ipatuhindu undang-undang si ipedahken Musa man bandu: kelengilah TUHAN Dibatandu, bahanlah kai si ngena AteNa ikutken PedahNa, patuhlah man BaNa, janah pemuliakenlah Ia alu bulat ukurndu ras tendindu."

6Isuruh Josua ia kerina mulih ku kutana alu pemasu-masunna janah ipedahina pe ia kerina nina, "Mulihlah kam ku kutandu maba mbue kebayaken: lembu pirak, emas, tembaga, besi, ras mbue paken. Kai si nggo ibuatndu i bas musuh-musuhndu nari bereken deba man senina-seninandu si sada suku." Kenca bage berkat ia kerina mulih ku kutana. Musa nggo mereken taneh i Timur Jordan man setengah suku Manase, tapi man si setengah nari nggo ibereken Josua arah Barat Jordan, radu ras suku-suku si deban.

7(Yos 22:6)

8(Yos 22:6)

9Emaka mulih kalak Ruben, Gat, ras Manase Timur ku kutana. Itadingkenna bangsa Israel si debanna i Silo i taneh Kanaan janah mulai berkat ku tanehna Gileat, si nggo jadi sikerajangenna sue ras si nggo ipedahken TUHAN arah Musa.

Batar-batar deherken Jordan

10Kenca suku Ruben, Gat, ras Manase Timur seh i Gelilot, arah bagin Barat Jordan denga, ipajekkenna batar-batar galang ras mejile deherken Jordan.

11Emaka man bangsa Israel si debanna ikataken nina, "Nehenlah! Kalak si i bas suku Ruben, Gat, ras Manase Timur nggo majekken batar-batar i Gelilot, deherken balengta Lau Jordan arah sembelahta enda!"

12Kenca ibegi bangsa Israel si enda pulung kerina perpulungen e i Silo guna lawes erperang ngelawan suku-suku si arah Timur.

13Jenari isuruh bangsa Israel me Pinehas, anak Imam Eleasar, ndahi suku Ruben, Gat ras Manase Timur ku taneh Gileat.

14Sepuluh kalak peminpin berkat ras Pinehas, eme sekalak i bas tep-tep suku si arah Barat. Kalak enda ndai eme kepala keluarga i bas terpukna ras Pinehas.

15Reh ia ku taneh Gileat, njumpai suku Ruben, Gat ras Manase Timur.

16Ngerana ia i bas gelar kerina perpulungen TUHAN nina man kalak e, "Ngkai maka ibahanndu si jahat man Dibata Israel? Kam nggo mberontak man TUHAN alu majekken batar-batar enda man bandu jine! Kam lanai ngikutken Ia!

17Ma ingetndu dosanta i Peor, sanga TUHAN ngukum BangsaNa alu penakit si ngkenai nterem jelma? Genduari pe mesera denga siakap erkite-kiteken si e. Langa kin iakapndu bias dosa si ilakokenndu e?

18Lanai kin atendu ngikutken Ia genduari? Adi isimbakndu TUHAN sendah, la banci la merawa pagi Ia man kerina jelma i Israel.

19Genduari dage, adi tanehndu e la kin cocok man ingan ersembah, reh kam ku taneh TUHAN, ingan KemahNa ipajekken. Pindo deba taneh si lit i bas kami. Tapi ula kal isimbakndu TUHAN, ula kal ibahanndu kami jadi pemberontak alu kam erbahan batar-batar nambahi batar-batar TUHAN Dibatanta.

20Inget uga Akan anak Sera la nggit ngikutken pedah TUHAN kerna barang-barang si arus ikernepken. Kerina perpulungen Israel iukum erkite-kiteken si e. La Akan ngenca mate erkite-kiteken dosana."

21Ngaloi suku Ruben, Gat ras Manase Timur kepala-kepala keluarga suku-suku si arah Barat nina,

22"Dibata si meganjangna kap Dibata si tuhu-tuhu! Ia kap TUHAN! Dibata si meganjangna kap Dibata si tuhu-tuhu! Ia kap TUHAN! ItehNa kai si ibahan kami enda, janah ate kami maka kam pe metehsa ka! Adi ngelawan kin kami man TUHAN, adi lanai kin kami tek man TUHAN ulanai pelepas kami nggeluh!

23Adi isimbak kami kin TUHAN janah adi ibahan kami kin batar-batar guna diri kami jine man ingan nutung persembahen ntah pe gelah ipake guna persembahen buah gandum ntah pe persembahen persadan, TUHAN jine lah si ngukum kami.

24Labo e tujun kami! Ipajekken kami batar-batar e, sabap mbiar kami maka pagin kesusurenndu ngerana man kesusuren kami, nina, 'La kap lit hubungendu ras TUHAN Dibata Israel?

25IbahanNa Lau Jordan jadi baleng kami ras kam kalak Ruben ras Gat. Labo lit baginndu i bas TUHAN.' Jenari banci jadi ilarang kesusurenndu pagi kesusuren kami ersembah man TUHAN.

26Emaka ipajekken kami sada batar-batar, labo man ingan nutung persembahen ntah pe man ingan persembahen,

27tapi gelah jadi sada tanda man kami ras kam, bage pe man kerina kesusurenta si reh, maka kami pe tuhu-tuhu nge ersembah man TUHAN i lebe-lebe KemahNa si Badia rikut pe ras persembahen-persembahen persadan. Enda ibahan kami njaga gelah ula pagi ikataken kesusurenndu, maka kesusuren kami labo lit urusenna ras TUHAN.

28Si e iukurken kami, gelah kune si enda terjadi, kesusuren kami banci ngerana nina, 'Nehenlah! Nini-nini kami erbahan sada batar-batar TUHAN. Batar-batar e labo guna nutung persembahen ntah guna persembahen gelehen, tapi jadi sada tanda man kami ras kam.'

29Dage, labo ate kami ngelawan TUHAN ntahpe nudalken Ia genduari, alu majekken sada batar-batar man ingan nutung persembahen ntah pe persembahen buah gandum ntahpe persembahen gelehen. Labo kami nggit majekken batar-batar si deban lain asa batar-batar TUHAN Dibatanta si pajek i lebe-lebe Kemah PerjumpanNa."

30Imam Pinehas ras peminpin-peminpin perpulungen si sepuluh kalak si ras ia, kepala-kepala keluarga i bas suku-suku si arah Barat, megi kai si ikataken suku Ruben, Gat, ras Manase Timur, janah payo iakapna.

31Pinehas anak Imam Eleasar ngerana nina, "Genduari nggo ieteh kami maka TUHAN ras kita kap, sabap labo kepe atendu ngelawan man BaNa. Erkite-kiteken si e nggo ipulahindu bangsa Israel i bas ukumen TUHAN nari."

32Kenca bage Pinehas ras peminpin-peminpin e lawes nadingken kalak Ruben ras Gat i taneh Gileat janah mulih ia ku Kanaan, ku bangsa Israel, jenari nuri-nuri ia man bangsa e.

33Payo iakap kalak Israel jenari ipujina Dibata. Lanai icakapkenna kerna lawes erperang guna ngkernepken taneh ingan tading kalak Ruben ras Gat.

34Nina kalak Ruben ras Gat, "Batar-batar enda jadi sada saksi man banta kerina maka TUHAN kap Dibata." Emaka ibahanna gelar batar-batar e "Saksi".


  Share Facebook  |  Share Twitter

 <<  Yosua 22 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel