Alkitab Mobile SABDA
[VER] : [KARO]     [PL]  [PB] 
 <<  Zakharia 14 >> 

Jerusalem ras bangsa-bangsa si deban

1Nehenlah, wari ukumen TUHAN nggo ndeher. Tupung e pagi Jerusalem irampasi, janah barang rampasen e ibagi-bagiken i lebe-lebe matandu.

2Ipepulung TUHAN kerina bangsa-bangsa merangi Jerusalem. Kota e ikuasaina, rumah-rumahna irampasina, dingen diberu-diberu igagahina. Setengah i bas anak kota e ibaba ku pembuangen, si lebihna la ibaba ndarat i bas kota e nari.

3Kenca bage ndarat me TUHAN ngelawan bangsa-bangsa e, bali ras si IbahanNa i bas paksa-paksa si nggo lepas.

4I bas paksa e pagi tedis Ia i Deleng Saitun, arah kenjulu kota Jerusalem. Kenca bage Deleng Saitun erbelah jadi dua i kenjahe nari ku kenjulu alu sada baluren si mbelang. Sembelah i bas deleng e miser ku Utara dingen sembelah nari ku Selatan.

5Kam lompat arah baluren si mbagi deleng e jadi dua. Kiam me kam bali ras nini-ninindu nai kiam tupung lit linur sanga pemerentahen Usia, raja Juda. TUHAN Dibatangku reh nge, dingen IbabaNa kerina malekat-malekat ras Ia.

6Tupung e pagi, lanai mbergeh tah pe salju,

7lanai lit kegelapen. Katawari pe terang bagi suari, subuk sanga berngi pe. Ndigan si enda jadi, TUHAN ngenca metehsa.

8Tupung e pagi, maler lau malem i Jerusalem nari, sembelah maler ku Lawit Mate, janah sembelah nari ku Lawit Tengah. Lau e maler gedang-gedang tahun, subuk sanga paksa perlego bage pe paksa perudan.

9Kenca bage TUHAN jadi raja doni enda kerina; tep-tep kalak nembah Ia selaku Dibata janah GelarNa ngenca itandai kalak i japa pe.

10Kerina daerah e, mulai i Geba nari i Utara seh ku Rimon i Selatan, ipekendit kerina. Jerusalem pagi ingan si meganjangna, mulai i Pintu Gerbang Benyamin nari seh ku Pintu Gerbang Suki ingan pintu gerbang si lit nai, jenari mulai i Menara Hananel nari ku pengeriken gandum kerajan.

11Bangsa e ringan i je alu teneng, lanai lit kebiarenna.

12Kerina bangsa-bangsa si merangi Jerusalem iukum TUHAN salu penakit si mekelek. Dagingna macik tupung ia nggeluh denga; matana macik i bas lubang matana dingen dilahna macik i bas babahna.

13I bas paksa e pagi, sengget kal ia kerina seh maka itangkapna kalak si ndeher ras ia jenari igudamna.

14Kalak Juda erperang lako mpertahanken Jerusalem. Kebayaken kerina bangsa-bangsa ibuatna jadi barang rampasen -- emas, pirak, bage pe uis si lanai tanggung buena.

15Kuda, kuda kitik-kitik, unta, bage pe kalde, asuh-asuhen si lit i bas perkemahen musuh, kerina kena penakit.

16Kenca bage kerina kalak si tading denga i bas bangsa-bangsa si merangi Jerusalem e, lawes ku kota e tep-tep tahun nembah TUHAN si Mada Kuasa selaku raja, dingen ngerayaken Wari Raya Sapo-sapo.

17Adi lit bangsa si la nggit reh ku je nembah man TUHAN si Mada Kuasa, emaka legon tanehna.

18Adi kalak Mesir la nggit reh ngerayaken Wari Raya Sapo-sapo, emaka ia pe kena penakit seri ras si itamaken TUHAN man kerina bangsa-bangsa si la nggit reh.

19Eme ukumen si isehken man Mesir ras kerina bangsa-bangsa si deban adi la irayakenna Wari Raya Sapo-sapo.

20I bas paksa e pagi subuk giring-giring si lit i bas pasangen kuda pe isurati alu kata-kata, "Ipersembahken guna TUHAN." Kudin penanggeren si lit i bas Rumah Pertoton bali badiana ras mangkuk si lit i lebe-lebe batar-batar.

21Tep-tep kudin si lit i Jerusalem ras i belang-belang Juda iserapken guna ipake nembah man TUHAN si Mada Kuasa. Kalak si mpersembahken persembahenna, ipakena me kudin e lako nanggerken daging persembahenna. Adi nggo seh pagi paksa si e, lanai lit perbinaga i bas Rumah Pertoton TUHAN si Mada Kuasa.



Studi Alkitab dengan AI: Chat dengan Alkitab GPT.

Studi lengkap, silahkan lihat: Alkitab SABDA.
Dengar dan baca Alkitab Karaoke, silahkan kunjungi: Alkitab Karaoke.
Rencana Multimedia Baca Alkitab: BaDeNo.

 <<  Zakharia 14 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Keesaan
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Alkitab GPT
Bantuan
Dual Panel Dual Panel