Dual PanelPengenehenen nabi kerna Imam si Mbelin
1I bas pengenehenen si deban icidahken TUHAN man bangku Imam si Mbelin, Josua, sangana tedis i lebe-lebe malekat TUHAN. Deherken Josua tedis si Iblis, janah nggo sikap ia ngaduken Josua.
2Ikataken malekat TUHAN man Iblis nina, "Iukum TUHANlah kam, o Iblis! TUHAN si erkeleng ate man Jerusalem ngukum kam gelah! Josua bali kap ras ciken si isintapken i bas api nari."
3Josua sangana tedis i je i lebe-lebe malekat e make uis melket.
4Nina malekat ndai man suruh-suruhenna, "Tangtangi uis melket si ipakena e." Kenca bage nina kempak Josua, "Nggo kusasapken dosandu janah kubereken me man bandu uis mbaru."
5Iperentahkenna suruh-suruhenna makeken bulang si bersih man Josua. Minter ilakoken suruh-suruhen e sue ras si iperentahken man bana, kenca bage ipakekenna man Josua uis si mbaru, janah sanga bage malekat TUHAN ndai tedis i je.
6Kenca bage ikataken malekat ndai man Josua maka
7nggo ikataken TUHAN si Mada Kuasa bagenda, "Adi iikutkenndu Undang-undangKu dingen ilakokenndu kai si Kusuruh kam ngelakokenca, emaka tetap kam erkuasa i bas Rumah PertotonKu ras kesainna, janah Kubegiken pertotonndu, bagi Kubegiken pertoton malekat-malekat si lit i adep-adepenKu.
8Dage begikenlah, o Josua, kam Imam si Mbelin; janah begikenlah o imam-imam teman-teman Josua, kam si jadi gambaren kerna paksa si reh si mehuli: Kupetangkas me suruh-suruhenKu si igelari Dahan.
9Kutamaken me i lebe-lebe Josua sada batu si pitu ayona. I bas batu e Kuukir sada tulisen, janah i bas sada wari saja pe nggo keri Kubahan masap dosa negeri enda.
10Kenca seh pagi wari si e, sekalak-sekalak kam ndilo temanna gelah reh ngenanami kesenangen ras ketenangen i tengah-tengah kebun anggur ras batang arana."