Dual PanelPengenehenen kerna empat gereta perang
1Kuidah ka pengenehenen si deban. Sekali enda empat gereta perang ndarat arah kelang-kelang dua deleng tembaga.
2Gereta perang si pemena kuda megara si ngerintaksa, si peduaken kuda mbiring,
3si peteluken kuda mbentar, janah gereta si peempatken kuda mekambing ngerintaksa.
4Kenca bage kusungkun malekat e, "Kai antusenna gereta perang e, tuan?" ningku.
5Erjabap ia nina, "Eme angin si empat si mbaru reh i adep-adepen TUHAN nari, TUHAN nu kerina doni."
6Gereta perang si irintak kuda mbiring lawes ku Babilon i Utara, si irintak kuda mbentar lawes ku kenjahe, janah si mekambing lawes ku negeri-negeri i Selatan.
7Tupung kuda si mekambing e ndarat, kurang pedas iakapna isuruh niar-niar doni enda. Emaka nina malekat e, "To siar-siar doni enda!" Minter ia berkat.
8Kenca bage erlebuh malekat e man bangku nina, "Kuda si lawes ku Babilon i Utara nggo erbahanca surut pernembeh ate TUHAN."
Perentah mereken mahkota man Josua
9Seh kata TUHAN man bangku
10nina, "Buatlah pemere kalak buangen e, eme Heldai, Tobia, ras Jedaya, kenca bage minter kam lawes ku rumah Josia anak Sepanya. Kerina kalak enda ndai nggo mulih i pembuangen nari i Babilon.
11Bahanlah sada mahkota i bas pirak ras emas si iberekenna e, jenari tamakenlah ku takal Imam si Mbelin Josua anak Josadak.
12Kataken man bana kata TUHAN si Mada Kuasa bagenda, "Kalak si tergelar Dahan, turah nge alu mehumur i bas inganna, janah iumbanna Rumah Pertoton man TUHAN.
13Ia me si majekken Rumah Pertoton TUHAN e, jenari ngaloken kehamaten bagi si ibereken man raja, janah iperentahna me rayat e. Sekalak imam tedis deherken kursi kinirajanna, janah duana ia erdahin alu dame ras sada perarih."
14Mahkota e ibahan jadi sada peringet-ingeten i bas Rumah Pertoton TUHAN guna enghamati Heldai, Tobia, Jedaya ras Josia."
15Kalak si ringan i negeri-negeri si ndauh reh nampati majekken Rumah Pertoton TUHAN e. Kenca pajek pagi mulihi Rumah Pertoton e ietehndu me maka TUHAN si Mada Kuasa kap si nuruh aku ndahi kam. Kerina si enda jadi pagi adi iikutkenndu kai si iperentahken TUHAN Dibatandu.