Dual Panel1Maka {Mat 9:1; Luk 5:17} habis bebrapa hari Toehan masok lagi dalem negari Kapernaoem, lantas kadengaran jang Toehan ada didalem roemah.
2Maka sabentar djoega berkoempoel banjak orang sampe trada lagi tampat akan moewat dia-orang, lagi dimoeka pintoe trada, maka Toehan mengadjar sama dia-orang firman Allah.
3{Mat 9:1; Luk 5:18} Maka ada orang dateng sama Toehan jang membawa satoe orang loempoeh, dipikoel orang ampat.
4Maka kapan dia-orang tidak bolih deket sama Toehan dari sebab banjaknja orang, lantas dia-orang memboeka atapnja tempat Toehan ada, maka kapan soedah dipetjahkennja, lantas dia-orang toeroenken kasoer jang ditidoeri orang loempoeh itoe.
5Maka kapan Jesoes melihat pertjajanja, lantas katanja sama itoe orang loempoeh: Hei anakkoe! dosamoe soedah di-ampoeni.
6Maka ada bebrapa orang katib-katib doedoek disana, jang berpikir dalem hatinja:
7Kenapa ini orang berkata salah bagini? {Maz 32:5; 51:3; Yes 43:25} Siapatah bolih mengampoeni dosa, melainken Allah sendiri?
8Maka sabentar Jesoes dapet taoe dalem hatinja jang dia-orang berpikir bagini dalem dirinja, lantas Toehan berkata sama dia-orang: Kenapa kamoe berpikir segala perkara ini dalem hatimoe?
9Jang gampang mana, kaloe berkata sama orang loempoeh: Dosamoe soedah di-ampoeni? atawa kaloe berkata: Bangoen, angkatlah kasoermoe dan berdjalan?
10Tetapi sopaja kamoe bolih taoe, jang Anak-manoesia berkoewasa mengampoeni dosa di-atas boemi, (lantas Toehan berkata sama itoe orang loempoeh):
11Akoe berkata padamoe: bangoenlah, angkat kasoermoe, dan poelang diroemahmoe.
12Maka sabentar djoega dia bangoen, serta angkat kasoernja lantas kaloewar dihadepan segala orang itoe, sampe samowa itoe orang djadi heiran sakali, dan memoeliaken Allah, katanja: Kita-orang belom taoe melihat perkara jang bagini!
13{Mat 9:9; Luk 5:27} Maka Toehan kaloewar pergi kembali dipinggir laoet; maka segala orang banjak dateng kapadanja, lantas Toehan mengadjar sama dia-orang.
14Maka sedeng berdjalan liwat, Toehan melihat Lewi, anak Alpeoes, doedoek di petjokejan, lantas berkata sama dia: Ikoetlah sama Akoe. Maka dia bangoen serta ikoet sama Toehan.
15Maka djadi kapan Toehan doedoek makan diroemahnja, ada banjak orang pemoengoet tjoke dan orang-dosa doedoek bersama-sama Jesoes dan moerid-moeridnja; karna itoe orang ada banjak, dan dia-orang soedah mengikoet sama Toehan.
16Maka kapan katib-katib dan orang parisi melihat Toehan doedoek makan bersama-sama orang pemoengoet tjoke dan orang-dosa, lantas dia-orang berkata sama moeridnja: Bagimana ini, dia doedoek makan minoem bersama-sama orang pemoengoet tjoke dan orang-dosa?
17Maka habis dengar itoe, kata Jesoes padanja: Orang jang baik badan tidak perloe doekoen, melainken orang jang sakit {Mat 9:18; 21:31; Luk 5:32; 19:10; 1Ti 1:15} Akoe tidak dateng maoe panggil tobat orang-bener, melainken orang-dosa.
18{Mat 9:14; Luk 5:33} Maka moeridnja Johannes dan orang parisi memang berpoeasa; lantas dia-orang dateng dan berkata sama Toehan: Kenapa moeridnja Johannes dan orang parisi itoe berpoeasa, tetapi moeridmoe tidak berpoeasa?
19Maka Jesoes berkata sama dia-orang: {Yes 62:5; 2Ko 11:2} Mana bolih orang pangiring penganten berpoeasa salamanja penganten masih bersama-sama dia-orang? Salamanja penganten ada bersama-sama, dia-orang tidak bolih berpoeasa.
20Tetapi nanti dateng harinja, kapan penganten soedah terangkat dari tengahnja, maka pada itoe hari dia-orang nanti poeasa.
21Trada satoe orang jang tambalken sapotong kain {Sakelat = laken} sakelat, jang belom mengkeret, sama djoebah toewa, karna kain baroe jang ditambalken nanti ambil apa-apa dari itoe kain toewa, lantas djadi lebih robek.
22{Mat 9:17} Maka trada satoe orang taroh anggoer jang baroe dalem kantong koelit jang lama; melainken itoe anggoer baroe petjahken kantongnja, dan itoe anggoer tertoempah dan kantongnja djadi roesak; tetapi anggoer jang baroe patoet ditaroh dalem kantong koelit jang baroe.
23{Kel 23:25; Mat 12:1; Luk 6:1} Maka djadi pada satoe hari sabat, kapan Toehan berdjalan troes disawah, jang segala moeridnja semantara berdjalan moelai petik tangke-tangke.
24Maka orang parisi berkata sama Toehan: Lihat, kenapa dia-orang boewat pada hari sabat perkara {Kel 20:10} jang tidak bolih?
25Maka Toehan berkata sama dia-orang: Apa kamoe belom taoe membatja jang diboewat nabi {1Sa 21:6} Dawoed, kapan dia kakoerangan dan berlapar, dan segala orang, jang ada serta dengan dia?
26Bagimana dia soedah masoek dalem roemah Allah, pada masa Abjathar imam-besar, dan soedah makan itoe roti toendjoekan, jang tidak bolih dimakan orang, {Ima 24:9} melainken imam-imam sadja, maka dia soedah kasih djoega sama orang jang ada sertanja.
27Maka Toehan berkata sama dia-orang: Itoe sabat soedah didjadiken karna sebab manoesia, dan boekan manoesia didjadiken karna sebab sabat.
28{Mat 12:8; Luk 6:5} Dari itoe Anak-manoesia ija Toehannja sabat djoega.