Dual Panel1Daud pas buru dhari Nayot e seddi’na Rama manggi’i Yonatan, laju adhabu kantha reya, "Kaula neka sala ponapa? Ponapa kajahadan sareng dusa kaula ka ramana sampeyan me’ daddi ramana sampeyan mateyana kaula?"
2Saodda Yonatan, "Ampon, ja’ adhabu sapaneka! Demi Allah, sampeyan ta’ kera epate’e. Rama masthe abala ka kaula parkara sabarang se elampa’agiya, parkara se penting sareng se ta’ penting. Daddi ta’ kera rama kaagungan maksod se eroseya’agi ka kaula. Daddi, se edhabuwagi sampeyan ganeka ta’ lerres!"
3Saodda Daud, "Ramana sampeyan ngagali ja’ sampeyan neser ka kaula. Daddi sampeyan ta’ kera ebalai me’ olle ta’ sossa. Kadi ponapa’a saos, demi PANGERAN se odhi’, odhi’ kaula paneka padha sareng tellor e batton!"
4Dhabuna Yonatan, "Ponapa saos parmenta’anna sampeyan sareng kaula elakonana."
5Saodda Daud, "Kadi paneka, lagguna Paraya’an Bulan Ngodha, masthena kaula neddha asareng ramana sampeyan. Tape mon sampeyan saroju’, kaula ngetegga e teggal sampe’ sadhumalem lem-malem.
6Manabi ramana sampeyan mareksane aponapa kaula me’ ta’ hadir, atorragi ja’ kaula nyo’on edi ka sampeyan palemana ka Betlehem duliyan, sabab e ka’dhissa’ badha opacara kurban taonan kaangguy sadajana essena compo’ kaula.
7Manabi rato adhabu, ‘Iya, dina,’ artena kaula aman, tape manabi rato duka, artena rato ampon motossagi macalaka’a kaula.
8Kaula nyo’on tolong ka sampeyan, sabab sampeyan sareng kaula ampon mabadha parjanjiyan e ajunanna PANGERAN. Tape manabi kaula pajat sala, ngereng kaula pate’e, tape kaula ja’ parengngagi ka ramana."
9Saodda Yonatan, "Ampon, ja’ kobater! Mon kaula oneng ja’ rama ampon motossagi mateyana sampeyan, bi’ kaula sampeyan ebala’ana."
10Daud mareksane, "Pasera se mala’ana kaula saompama ramana sampeyan duka?"
11"Tore samangken entar ka teggal," dhabuna Yonatan. Se kadhuwa jareya pas meyos ka teggal kadhuwa’an.
12Dhabuna Yonatan ka Daud, "PANGERAN, Allahna Isra’il, mandar kasokana daddi saksena sampeyan sareng kaula! Lagguna gu-laggu otabana sadhumalem baja mangken, kaula aehteyara sopaja bisa’a oneng ka essena atena rama. Manabi maksodda ka sampeyan becce’, sampeyan bi’ kaula ekabarrana.
13Manabi rama aneyat macalaka’a sampeyan, tanto sampeyan bi’ kaula ebala’ana jugan sopaja sampeyan bisa’a buru nyare salamet. Mon kaula ta’ neptebbi janji se ekoca’agi kaula are mangken paneka, mandar kaula epamateya sareng PANGERAN. Moga-moga sampeyan etolonga sareng PANGERAN akadi se nolong rama kaula!
14Manabi kaula gi’ odhi’, kaemodi parjanjiyanna sampeyan sareng kaula e ajunanna PANGERAN paneka, ban sampeyan paesto ka kaula; tape manabi kaula ampon mate,
15sampeyan paesto salanjangnga ka na’ poto kaula. Manabi sareng PANGERAN mosona sampeyan epatompes sadaja,
16ja’ kantos sampeyan megga’ parjanjiyan paneka. Mon sampeyan sampe’ megga’ parjanjiyan paneka, PANGERAN dibi’ se ngokoma sampeyan."
17Daddi Yonatan makon Daud sakaleyan aggi’ ajanji taresna’a ka salerana, sabab salerana taresna ka Daud akantha kataresna’anna ka salerana dibi’.
18Saellana jareya Yonatan adhabu ka Daud, "Sarrena lagguna paneka Paraya’an Bulan Ngodha, tantona etemmo ja’ sampeyan tadha’, sabab kalenggiyanna sampeyan e meja makan kosong;
19ponapa pole sadhumalem! Daddi, sampeyan duli ngetek e pangeteggan se sabbanna ka’issa’, nante’ e bingkengnga tombuganna bato se badha e ka’issa’.
20Sadhumalem kaula ngocola pana tatello’ ka bato ganeka, me’ olle sareng oreng esanggu kaula ngeleng sasaran.
21Kaula pas nyorowa dunor kaula nyare’e pana se tatello’ ganeka. Manabi kaula ngoca’ sapaneka ka dunor kaula ganeka, ‘E, pana jareya gaggar e jang dhinna’an; mara kala’,’ ganeka artena sampeyan aman, olle kalowar. Kaula asompa kalaban asmana PANGERAN se odhi’ ja’ tadha’ babaja ka sampeyan.
22Tape mon kaula ngoca’ sapaneka ka dunor kaula, ‘Pana jareya gaggar e jang dhissa’an,’ artena sampeyan epakon buru sareng PANGERAN.
23Moga-moga PANGERAN ajaga’a sampeyan sareng kaula sopaja terrosa neptebbi parjanjiyan se ekoca’agi e ajunanna PANGERAN paneka."
24Daddi Daud ngetek e teggal. E bakto Paraya’an Bulan Ngodha, Rato Saul meyos ka dhadha’aran.
25Akantha biyasana Saul alenggi e seddi’na geddhung. Yonatan alenggi dhep-adhebban ban Saul, Abner e erenganna Saul, tape korsena Daud kosong.
26Tape e are jareya Saul ta’ adhabu pa-apa parkara jareya, sabab ca’na panggaliyanna, "Pola badha pa-apa, sampe’ Daud ta’ berse noro’ atoranna agama."
27Kalagguwanna, e are se kapeng dhuwa’ e dhalem Bulan Ngodha, korsena Daud gi’ kosong keya, daddi Saul adhabu ka Yonatan, "Arapa ba’ari’ ban sateya Daud me’ ta’ entar ka dhadha’aran reya?"
28Saodda Yonatan, "Ampon nyo’on edi ka kaula, entar ka Betlehem.
29Oca’na sapaneka, ‘Kaula nyo’ona edi, entara ka Betlehem, polana kalowarga kaula teppa’na araya’agi paraya’an kurban e ka’dhissa’, ban bi’ kaka’ kaula epakon entar. Daddi manabi sareng sampeyan eedine, kaula entara manggi’i la-bala kaula.’ Gapaneka sababba Daud ta’ kengeng hadir e dhadha’aran ka’dhinto, Rama."
30E bakto meyarsa jareya Saul ce’ dukana ka Yonatan, "Ana’ jada! Sateya sengko’ tao ja’ ba’na nolonge Daud ban agabay malona aba’na dibi’ ban ebuna!
31Apa ba’na ta’ apangrasa ja’ saabidda Daud gi’ odhi’ ba’na ta’ kera bisa daddi rato e nagara reya? Sateya kassa’ soro sare Daud jareya giba dha’ enna’, bi’ sengko’ epateyana!"
32"Aponapa me’ epateyana?" dhabuna Yonatan. "Sala ponapa?"
33Meyarsa partanya’an jareya Saul ngontallagi tombagga eacettagi ka Yonatan; Yonatan epateyana. Daddi Yonatan ngagali ja’ ramana pajat amaksod mateyana Daud onggu.
34Yonatan pas jaga, laju ondur dhari meja dhadha’aran jareya ta’ kalaban adha’ar pa-apa sakale e are se kapeng dhuwa’ e dhalem Paraya’an Bulan Ngodha jareya; panggaliyanna duka, arassa ngennes polana Daud eya-seya bi’ Saul, ramana.
35Kalagguwanna Yonatan meyos ka ra-ara apanggiya ban Daud menorot se la erembak e antarana se kadhuwa. Se meyos abakta na’-kana’ lake’ kasorang, dunorra,
36dhabuna Yonatan ka kana’ jareya, "Mara, kala’ na-pana se bi’ sengko’ epana’agiya." Teppa’na kana’ jareya berka’, Yonatan ngocol panana epangalebadi kana’ jareya.
37E bakto kana’ jareya napa’ ka kennengnganna pagaggarra pana jareya, Yonatan aera’, "E, pana jareya gaggar e jang dhissa’an!
38Abak duliyan, ja’ guk-magguk!" Kana’ jareya nolong pana gella’, pas abali ka kennengnganna lorana.
39Kana’ jareya ta’ ngarte apa maksodda dhabuna Yonatan gella’; se ngarte coma Yonatan ban Daud.
40Yonatan pas marengngagi gandhiba ban panana ka dunorra jareya, se pas epakon giba mole ka kottha.
41Saellana kana’ lake’ gella’ la tadha’, Daud kalowar dhari budhina tombuganna bato, pas asojud ka tana tello kale. Daud ban Yonatan saleng seyom sambi padha nanges. Kasossa’anna Daud ngalebbi’i kasossa’anna Yonatan.
42Yonatan pas adhabu ka Daud, "Moga-moga Allah kasokana nolong sampeyan. PANGERAN se nanggunga ja’ sampeyan sareng kaula sana’ poto teptebba neggu’i parjanjiyan se eocabbagi sampeyan sareng kaula e ajunanna Allah." Saellana jareya Daud laju nyengla dhari jadhiya, ban Yonatan gubar ka kottha.