Dual Panel1Ruben reya pottra sareyangnga Yakub. Tape sarrena Ruben tedhung apolong ban sala settong dhari sellerra ramana, ha’na menangka ana’ sareyang ecabut laju eparengngagi ka Yusup. Maske kantha jareya, toronanna Yakub se paleng kowat banne suku Yusup, tape suku Yehuda. La’-mala’ se dha’-adha’ kadibi’ daddi ratona sakabbinna ommat Isra’il jareya dhari suku Yehuda.
2(5:1)
3Ruben pottra sareyangnga Yakub, kaagungan pottra lalake’ kaempa, iya areya: Henokh, Palu, Hezron ban Karmi.
4Areya’ toro’ gilirra toronanna Yowël: Semaya, Gog, Simei, Mikha, Reaya, Ba’al ban Be’era. Be’era reya se mimpin suku Ruben e bakto etangkep bi’ Tiglat-Pileser rato Asyur, laju egiba ka tana pambuwangan.
5(5:4)
6(5:4)
7E dhalem silsila ecathet keya la-kapala suku se kasebbut e baba reya e dhalem suku Ruben: Yeiyel, Zakhariya,
8ban Bela pottrana Azas, bajana Sema dhari kaom Yowël. Suku Ruben neng e Aroër ban e dhaerana se molae dhari Aroër ka dhaja sampe’ ka Nebo ban Ba’al-Meon.
9Ebinna ce’ bannya’na e dhaera Gileyad. Daddi suku jareya ngennengnge dhaera bagiyan temor terros ka ra-ara beddhi se malanjang sampe’ ka Songay Efrat.
10E jamanna Rato Saul, suku Ruben alorok ban makala oreng Hagri e temorra Gileyad, sarta laju ngobasane nagara jareya.
11E dhaja’anna dhaera kakobasa’anna suku Ruben, iya areya e tana Basan sampe’ gan Salka e bagiyan temor, ekennengnge suku Gad.
12Dhari suku Gad jareya Yowël bangatowana kaom se kasohor, ban Safam bangatowana kaom se nomer dhuwa’. Yaenai ban Safat bangatowana om-kaom laenna e dhaera Basan.
13Reng-oreng laenna e dhalem suku Gad tamaso’ e dhalem om-kaom se papetto’ se kasebbut e baba reya: Mikha’el, Mesulam, Syeba, Yorai, Yakan, Ziya ban Eber.
14Jareya padha toronanna Abihail pottrana Huri. Toro’ gilirra silsilana reng-oreng jareya dhari baba ka attas kantha reya: Abihail, Huri, Yarowah, Gileyad, Mikha’el, Yesisai, Yahdo, Bus.
15Kapalana om-kaom jareya iya areya Ahi pottrana Abdiyel, bajana Guni.
16Reng-oreng jareya ngennengnge dhaera Basan ban Gileyad ban tha-kottha e dhaera jareya sarta sakabbinna talon e Saron.
17Silsila reya ekagabay e jamanna Yotam rato Yehuda, ban Yerobeyam rato Isra’il.
18E dhalem suku Ruben, Gad ban suku Manasye se e temorranna Yordan badha pa’ polo empa’ ebu pettong atos sabidak oreng parjurit se la elate ban se la apangalaman e dhalem aguna’agi tameng, peddhang ban gandhiba.
19Rit-parjurit jareya aperrang ban suku Yetur, Nafis, ban Nodab, iya areya ku-suku e dhalem bangsa Hagri.
20Rit-parjurit jareya parcaja ka Allah, ban nyo’on tolong ka Salerana, daddi Allah ngabbullagi parnyo’onanna sarta apareng kamennangan ka reng-oreng jareya e dhalem paperrangan ban reng-oreng Hagri ban sakutuna.
21Lantaran paperrangan jareya kalakon dhari kasokanna Allah, daddi bannya’ moso se epate’e. Moso se etawan badha saratos ebu oreng, rampasanna aropa onta saeket ebu, dumba dhu ratos saeket ebu ban hemar dhu ebu. Saellana jareya reng-oreng buru laju neptep e dhaera jareya sampe’ ka baktona bangsa Isra’il etawan ban egiba ka pambuwangan.
22(5:21)
23Sabagiyan dhari suku Manasye enneng e dhaera Basan terros ka dhaja sampe’ gan bagiyan Ba’al-Hermon, Senir ban Gunong Hermon. Reng-oreng jareya sajan abit sajan bannya’.
24La-kapalana kaomma iya areya: Hefer, Yisei, Eliyel, Azriyel, Yeremiya, Hodawya ban Yahdiyel. Jareya kabbi rit-parjurit se parjuga.
25Oreng Isra’il ta’ esto ka Allah se esemba bangatowana, mongkore Allah ban nyemba ka ba-dibana sa-bangsa se la eojuk bi’ Allah dhari nagara Kana’an.
26Daddi Allah laju maguli panggaliyanna Rato Pul dhari Asyur, sampe’ rato jareya alorok nagara jareya. Rato Pul jareya kasohor ban nyama Tiglat-Pileser. Suku Ruben, Gad ban suku Manasye se badha e temorra Yordan laju eangko’ menangka tawanan sarta ebuwang ka Halah, Habor, Hara ban ka settong kennengngan e seddi’anna Songay Gozan. E jadhiya reng-oreng jareya terros neptep sampe’ are teya.