Dual Panel1Saellana Ahab rato Isra’il seda, nagara Mo’ab aberonta’ ka Isra’il.
2E settong are Rato Ahaziya dhari Isra’il labu dhari amperra lotengnga karatonna e Samaria, sampe’ loka bakbak. Daddi rato jareya laju ngotos oreng epakon atanya ka Ba’al-Zebub, dibana kottha Ekron e Filistin, apa salerana bakal barasa apa enja’.
3Tape malaekadda PANGERAN makon Eliya, nabbi dhari Tisbe, sopaja manggi’i reng-oreng otosanna Rato Ahaziya jareya epakon adhabu kantha reya, "Apa e Isra’il tadha’ Allah me’ sampe’ ba’na entara menta petodu ka Ba’al-Zebub, dibana kottha Ekron rowa?
4Atorragi ka ratona ja’ PANGERAN adhabu kantha reya, ‘Ba’na ta’ bisa baras, ba’na bakal mateya!’" Saellana Eliya alampa’agi dhabuna PANGERAN jareya,
5para otosan gella’ abali ka rato, rato laju mareksane, "Arapa ba’na me’ abali?"
6Saodda reng-oreng jareya, "Badha oreng lalake’ manggi’i abdidalem, oreng lake’ gapaneka makon abdidalem abali sarta mator ka junandalem ja’ PANGERAN adhabu kadi ka’dhinto ka junandalem, ‘Apa e Isra’il tadha’ Allah me’ sampe’ ba’na nyoro oreng menta petodu ka Ba’al-Zebub, dibana kottha Ekron? Ba’na ta’ bisa baras, ba’na bakal mateya!’"
7"Kantha apa robana oreng jareya?" dhabuna rato.
8"Juba sareng panyengsettepon dhari kole’," atorra reng-oreng jareya. "O, jareya Eliya," dhabuna rato.
9Rato laju ngotos settong parwira ban baba’anna saeket oreng epakon nangkep Eliya. Parwira jareya mangkat; Eliya etemmo teppa’na alenggi e settong gumo’. "He, abdina Allah," ca’na parwira jareya, "bi’ rato ba’na esoro toron!"
10"Mon sengko’ reya pajat bendher abdina Allah," saodda Eliya, "mandar torona apoy dhari langnge’ me’ olle ba’na ban baba’anna ekello’ kabbi!" E bakto jareya keya toron apoy ban parwira jareya ban baba’anna se saeket oreng padha ekello’ kabbi.
11Rato laju ngotos parwira se laen ban baba’anna se bannya’na saeket oreng keya. Reng-oreng jareya mangkat pas ngoca’ ka Eliya, "He, abdina Allah, bi’ rato ba’na esoro toron sateya keya!"
12"Mon sengko’ reya pajat bendher abdina Allah," saodda Eliya, "mandar torona apoy dhari langnge’ me’ olle ba’na ban baba’anna ekello’ kabbi!" E bakto jareya keya toron apoy dhari Allah, parwira ban para baba’anna se saeket oreng rowa ekello’ kabbi.
13Rato sakaleyan aggi’ ngotos parwira se laen baba’anna saeket oreng bannya’na. Parwira jareya ongga ka gumo’ ban sanapa’na ka adha’anna Eliya laju asojud pas mator, "Adhu abdina Allah, nyo’ona sapora abdina sadaja! Kabellasi abdina sareng baba’an abdina sadaja, ja’ pate’e.
14Parwira se kadhuwa sareng sadajana baba’anna ampon padha mate ekello’ apoy. Nyo’ona bellas abdina!"
15E bakto jareya keya malaekadda PANGERAN adhabu ka Eliya, "Ella ta’ osa tako’! Kassa’ ba’na toron abareng ban parwira jareya." Daddi Eliya laju toron abareng ban parwirana rato jareya nyabis ka rato.
16Atorra Eliya ka rato, "PANGERAN adhabu, ‘Ba’na nyoro oreng menta petodu ka Ba’al-Zebub dibana kottha Ekron akantha e Isra’il reya tadha’ Allah se ekenneng tanyae. Lantaran jareya ba’na ta’ bisa baras, ba’na bakal mateya!’"
17Daddi Ahaziya seda akantha se edhabuwagi PANGERAN kalaban parantara’anna Eliya. Lantaran Ahaziya ta’ kaagungan pottra lalake’, daddi Yoram taretanna se agante jumenneng rato. Jareya kadaddiyan e taon se kapeng dhuwa’ pamarenta’anna Yehoram pottrana Yosafat, rato Yehuda.
18Careta laenna parkara apa se elampa’agi Rato Ahaziya ecathet e dhalem ketab Sajarana To-rato Isra’il.