Dual Panel1Daud elindhunge PANGERAN dhari gangguwanna so-mosona, daddi bisa terros alenggi e karatonna.
2Dhabuna rato ka Nabbi Natan, "Kaula neng e karaton se ekagabay dhari kaju comara mangkana Petthe Parjanjiyanna Allah namong esaba’ e dhalem kemah!"
3Saodda Natan, "Lampa’agi saos ponapa se daddi kasokanna junandalem, guste, sabab PANGERAN nolonge junandalem."
4Tape e malem jareya PANGERAN adhabu ka Natan,
5"Kassa’ ba’na entar ka Daud; kabala Tang pessen reya, ‘Banne ba’na se kodu maddek Tang padalemman.
6Molae Sengko’ mabebas bangsa Isra’il dhari Messer sampe’ sateya reya, Sengko’ ta’ tao neng e dhalem padalemman; Sengko’ terros alalana ban enneng e dhalem kemah.
7Saabidda Sengko’ alalana ban bangsa Isra’il, Sengko’ ta’ tao atanya ka reng-oreng se bi’ Sengko’ epele epadaddi pamimpin, arapa Sengko’ me’ ta’ egabayyagi padalemman dhari kaju comara Libanon.’
8Daddi, Natan, kabala’agi ka Tang abdi se anyama Daud jareya, ja’ Sengko’, PANGERAN Se Mahakobasa, ngoca’ kantha reya, ka Daud jareya, ‘Bi’ Sengko’ ba’na la ekala’ dhari lalakonna ba’na se ngowan dumba e lon-talon, pas epadaddi ratona bangsa Isra’il.
9Ba’na dha’ emma’a bai terros ebarengnge Sengko’. E baktona ba’na aperrang, so-mosona bi’ Sengko’ epatompes kabbi. Bi’ Sengko’ ba’na epakasohora epakantha’a sakabbinna pamimpin se paleng raja.
10Ban Sengko’, ommat Isra’il la esadhiyai kennengngan se ekennengngana salanjangnga, sopaja bisa’a odhi’ taremtem, ta’ ela-salae pa-sapa pole. Molae maso’ ka nagara reya bangsa Isra’il ros-terrosan eserrang sa-bangsa se kasar, tape se kantha jareya ta’ kera kadaddiyan pole. Sengko’ ajanji ja’ ba’na bakal amana dhari mosona, ban pole bi’ Sengko’ ba’na eberri’ana toronan.
11(7:10)
12Pagi’, mon ba’na la mate, ban ekoburragi e koburanna bangatowana, badha settong e antarana ana’na ba’na se bi’ Sengko’ epadaddiya rato. Rato jareya se maddegga Tang padalemman. Karaja’anna bi’ Sengko’ epakokowa ban salanjangnga bakal badha’a toronanna se daddiya rato.
13(7:12)
14Sengko’ daddiya ramana, ban ana’na ba’na jareya daddiya Tang ana’. Mon ana’na ba’na jareya andhi’ sala, bi’ Sengko’ eokoma akantha oreng lalake’ se ngokom ana’na.
15Tape ana’na ba’na jareya bi’ Sengko’ ekabecce’ana terros menorot Tang janji. Sengko’ teptebba neggu’i Tang janji ka ana’na ba’na jareya; ana’na ba’na bi’ Sengko’ ta’ epakantha’a Saul se bi’ Sengko’ eerset dhari kakobasa’anna sopaja ba’na bisa’a daddi rato.
16Ba’na bakal andhi’a toronan terros, ban karaja’anna ba’na bi’ Sengko’ epakokowa terros. Toronanna ba’na bakal daddiya rato salanjangnga.’"
17Natan pas ngatore oneng ka Daud sabarang se edhabuwagi Allah ka salerana.
18Rato Daud pas meyos ka dhalem Kemah Socce. E jadhiya Daud alenggi sambi adu’a, "Guste ALLAH Se Mahatenggi, abdidalem sakalowarga ta’ pantes narema kabecce’an se eparengngagi Junandalem ngabidi gi’ dhimen kantos samangken.
19La’-mala’ se elampa’agi Junandalem samangken ngalangkonge dhari gapaneka, Guste ALLAH Se Mahatenggi; Junandalem apareng janji kasambung sareng na’ poto abdidalem e bingkeng are. Sareng Junandalem abdidalem epanengale parkara ka’dhinto, sanare abdidalem ka’dhinto namong manossa, Guste ALLAH Se Mahatenggi!
20Dhu matora ponapa pole abdidalem ka Junandalem? Junandalem ampon ngaonenge sadajana parkara abdidalem ka’dhinto.
21Kaangguy neptebbi janji, sareng kalaban karsana Junandalem dibi’, Junandalem ampon alampa’agi lalakon se ja-raja artena kaangguy ngajar abdidalem ka’dhinto.
22Agung onggu Junandalem, Guste ALLAH Se Mahatenggi! Namong Junandalem Allah, se tadha’ tandhinganna. Abdidalem sadaja ngaonenge parkara gapaneka sabab ampon eparenge oneng ngabidi lamba’ mola.
23E bume tadha’ bangsa se padha sareng Isra’il. Namong Isra’il bangsa se sareng Junandalem epabebas dhari odhi’ se ekadunor oreng, pas epadaddi ommattepon Junandalem. Sadaja lalakon raja sareng ajib se elampa’agi Junandalem kaagem reng-oreng gapaneka andaddiyagi asmana Junandalem kalonta e bume. Sa-bangsa laen sareng ba-dibana sareng Junandalem eojuk e bakto ommattepon Junandalem maju aperrang.
24Bangsa Isra’il sareng Junandalem epadaddi ommattepon Junandalem dibi’ salanjangnga, sarengngan Junandalem, GUSTE, daddi Allahepon bangsa ka’dhinto.
25Samangken, GUSTE, kasokana Junandalem salanjangnga ngokowe janji se ampon edhabuwagi Junandalem kasambung sareng abdidalem tor na’ poto abdidalem. Kasokana Junandalem alampa’agi sadaja se ampon ejanjiyagi Junandalem ka’dhinto.
26E ka’dhimma’a saos oreng bakal ngagungngagiya asmana Junandalem sambi ngoca’, ‘PANGERAN Se Mahakobasa reya Allahna Isra’il.’ Daddi salanjangnga toronan abdidalem badhi daddiya ratona bangsa ka’dhinto.
27PANGERAN Se Mahakobasa, Allahepon Isra’il! Abdidalem ngal-mabangal nyo’on kadi ka’dhinto ka Junandalem, sabab Junandalem dibi’ ampon apareng oneng ka abdidalem ja’ na’ poto abdidalem ron-temoron sareng Junandalem epadaddiya ratona bangsa ka’dhinto.
28Guste ALLAH Se Mahatenggi, Junandalem ka’dhinto Allah; Junandalem neptebbi sadajana janji, ban Junandalem ampon ajanjiyagi barang se talebat saena ka abdidalem.
29Daddi, abdidalem nyo’ona kasokana Junandalem aberkadi toronan abdidalem sopaja padha’a kengeng arassa’agi kobassana kataresna’annepon Junandalem salanjangnga. Guste ALLAH Se Mahatenggi, sadajaepon ka’dhinto ampon ejanjiyagi sareng Junandalem, daddi na’ poto abdidalem badhi teptebba eberkadi salanjangnga sareng Junandalem."