Dual Panel1Ra’yat gi’ ta’ ngenneng mabadha paraya’an Paska teppa’ e baktona iya areya e bulan settong, sabab mam-imam se nyocce’e ba’na gi’ ce’ sakone’na ban gi’ ta’ bannya’ oreng se akompol e Yerusalim. Daddi Rato Hizkiya ban ba-ponggabana sarta reng-oreng Yerusalim padha saroju’ araya’agiya Paska jareya e dhalem bulan dhuwa’, ban kabbi padha perak narema rancana jareya. Rato laju akerem sorat ka sakabbinna oreng e saantero Isra’il ban Yehuda. Bariya keya ka oreng Efraim ban Manasye. Sakabbinna oreng Isra’il dhari dhaerana suku Dan e bagiyan dhaja, sampe’ ka Bersyeba e bagiyan lao’ eonjang ka Padalemman socce e Yerusalim kaangguy araya’agi Paska ban ngormadi PANGERAN, Allahna Isra’il akantha se la etantowagi e dhalem kom-hokomma Mosa. Sajjegga ta’ tao Paska eraya’agi akantha jareya.
2(30:1)
3(30:1)
4(30:1)
5(30:1)
6Kalaban dhabuna rato ban ba-ponggabana para otosan ekerem ka saantero Yehuda ban Isra’il, epangeba rat-sorat jareya, se monyena kantha reya, "Ra’yat Isra’il! Ba’na la lopot dhari kakobasa’anna oreng Asyur. Sateya ba’na kodu abali ngabdi ka PANGERAN pole, ka Allah se esemba Ibrahim, Ishak ban Yakub, sopaja PANGERAN jareya kasokana keya nolonge ba’na pole.
7Ba’na ja’ akantha bangatowana ban reng-oreng Isra’il laenna se ta’ esto ka GUSTE Allahna. Ba’na la nangale’e dibi’ baramma berra’na Pangeran jareya ngokom bangatowana ba’na gella’.
8Ba’na ja’ pacengkal akantha bangatowana jareya, tape sabaligga, pata’at ka PANGERAN. Mara entar ka Yerusalim, ka Padalemman Socce se bi’ Guste Allahna ba’na eteptebbagi kaangguy salerana dibi’ malolo salanjangnga. Mara abakte ka Salerana, sopaja terebba dukana ka ba’na.
9Mon ba’na abali ngabdi ka PANGERAN pole, reng-oreng se nawan la-balana ba’na tanto neser sarta ngedine la-balana ba’na jareya abali ka bengkona. GUSTE Allahna ba’na reya Allah se sae ban bellas ase; ba’na tanto etarema mon ba’na abali ka Salerana."
10E bakto entar ka kottha se settong terros ka settongnga e dhaera Efraim ban Manasye sampe’ ka dhaja napa’ ka dhaerana suku Zebulon, para otosan jareya ekala’-gella’ ban eya-seya.
11Tape badha keya reng-oreng dhari suku Asyer, Manasye, ban Zebulon se endha’ entar ka Yerusalim.
12E Yehuda Allah manyettong keya atena ra’yat sopaja padha’a gu-onggu ta’at ka kasokanna Allah kalaban cara atoro’ ka papakonna rato ban ba-ponggabana.
13E bulan dhuwa’ bannya’ ra’yat akompol e Yerusalim araya’agiya Are Raja Roti Se Ta’ Eragi’i.
14Ba-mezba e Yerusalim se eangguy ngatorragi kurban ban ngobbar dupa ka ba-diba, ekala’ kabbi laju ebuwang ka Cora Kidron.
15E tanggal pa’ bellas bulan jareya reng-oreng jareya nyambelli ba-dumba eatorragiya menangka kurban Paska. Para imam ban reng-oreng Lewi se gi’ najjis, arassa ce’ todhussa. Kabbi padha nyocce’e aba’na daddi ngenneng ngatorragi kurban obbaran e Padalemman Socce.
16Reng-oreng jareya mele kennengngan e Padalemman Socce menorot katantowan-katantowan se esebbuttagi e dhalem ketab Kom-hokomma Mosa. Dharana ban-kurban jareya bi’ oreng Lewi epassra’agi ka para imam, bi’ mam-imam buru laju etotta’ ka mezba.
17Bannya’ e antarana reng-oreng se hadir e jadhiya gi’ ta’ nyocce’e aba’na, daddi padha ta’ olle nyambelli dumba se egabaya kurban Paska. Daddi jareya kabbi elakone bi’ reng-oreng Lewi ban oreng Lewi jareya keya se ngatorragi ka PANGERAN.
18Laen dhari jareya, e antarana reng-oreng Efraim, Manasye, Isakhar, ban Zebulon, bannya’ se entar ka jadhiya ta’ kalaban nyocce’e aba’na gallu. Daddi reng-oreng jareya araya’agi Paska ta’ kalaban nyokobi rat-sarat se la etantowagi. Daddi Rato Hizkiya adu’a nyo’onnagi reng-oreng jareya, dhabuna,
19"GUSTE Allah, pojja’anna bangatowa abdidalem sadaja, moga-moga lantaran kasaeyannepon Junandalem kasokana Junandalem nyapora reng-oreng se ngalakone kabakteyan ka Junandalem kalaban gu-onggu ate, sanare reng-oreng ka’dhinto gi’ ta’ nyocce’e aba’."
20PANGERAN meyarsa ka du’ana Hizkiya. Reng-oreng jareya eparenge sapora, ban ta’ eokom.
21Pettong are abidda reng-oreng jareya neng-sennengngan akompol e Yerusalim mabadha paraya’an Roti Se Ta’ Eragi’i. Sabban arena reng-oreng Lewi ban para imam ji-moji PANGERAN kalaban gu-onggu.
22Reng-oreng Lewi jareya ce’ penterra mimpin kabakteyan ka PANGERAN, sampe’ ealem bi’ Hizkiya. Saellana pettong are abidda reng-oreng jareya kan-ngakan nyaman e dhalem paraya’an gella’ sarta ngatorragi kurban menangka parnyata’an sokkor ka PANGERAN, Allahna bangatowana,
23reng-oreng jareya kabbi laju padha motossagi nerrossagiya paraya’an jareya pettong are aggi’. Kabbi laju padha neng-sennengngan araya’agi paraya’an jareya.
24Rato Hizkiya nyombang sape lake’ saebu meggi’ ban dumba pettong ebu meggi’. Ba-ponggabana Hizkiya nyombang sape lake’ saebu meggi’ ban dumba sapolo ebu meggi’. Ban-keban jareya eparengngagi ka ra’yat kabbi, esoro sambelli ban ekakan. Ce’ bannya’na imam se nyocce’e aba’na.
25Ra’yat Yehuda, para imam, reng-oreng Lewi ban reng-oreng se dhateng dhari dhaja, sarta reng-oreng manca se la neptep e Isra’il ban Yehuda, kabbi padha senneng.
26Kottha Yerusalim ce’ peragga, sabab molae jamanna Sulaiman, pottrana Daud, ta’ tao badha paraya’an se kantha jareya.
27Mam-imam ban reng-oreng Lewi nyo’onnagi berkadda PANGERAN kaangguy ra’yat, ban dhari kalenggiyanna e sowarga Allah meyarsa du’ana reng-oreng jareya, ban parnyo’onan jareya etarema.