Dual Panel1Sabarang se ekoca’agi ba’na sengko’ la tao nangale ban ngedhing sabellunna, ban parkara jareya sengko’ ce’ pahamma.
2Sabarang se ekataowe ba’na sengko’ tao keya; ja’ nyangka sengko’ kala ka ba’na.
3Tape sengko’ tor-matora ka Se Mahakobasa; abilla’ana tang parkara e ajunanna Allah.
4Sabab ba’na notobi kabudhuwanna dibi’ kalaban nepo, tadha’ bidana ban kon-dhukon palsu.
5Ja’ sakenga ba’na ta’ acaca, olle daddi ba’na eanggep bicaksana.
6Daddi mara edhingngagi sengko’ alabana; mara tetene tang caca reya.
7Apa ba’na olle lecek ka manossa, polana abilla’ana Allah? Apa ba’na olle co-ngoco kaangguy kaparlowanna Salerana?
8Apa ba’na nolongana Allah, abilla’ana, daddi pangacarana?
9Mon Allah mareksa ba’na, ba’ becce’a hasella? Ba’ bisa’a ba’na co-ngoco Salerana akantha se co-ngoco manossa?
10Mon badha se etolonge ba’na maske ba’na ta’ asa’-kasa’, bi’ Allah ba’na tanto eparenge okoman se kejjem.
11Apa atena ba’na ta’ tekerjat ngataowe kaagunganna Guste Allah? Apa atena ba’na ta’ tako’ ngataowe kakowadanna?
12Babala’anna ba’na akantha abu se tadha’ gunana; cacana ba’na padha ban lempong se gampang bella.
13Daddi la neng-enneng, dina sengko’ se acaca’a, sengko’ ta’ parduli maske baramma’a daddina.
14Sengko’ ehlas maske nyaba daddi tarowanna.
15Sengko’ nekat, sabab la ta’ andhi’ pangarebban! Mon Allah mateyana sengko’, sengko’ passra, tape sengko’ gi’ abilla’ana tang aba’ e ajunanna.
16Olle daddi sengko’ salamet polana mabangal sabab oreng se jahat ta’ kera bangal ngadhep ka Allah.
17Sateya edhingngagi pateppa’ tang oca’; tetene tang katerrangan reya.
18Sengko’ la asadhiya aparkara’a, sengko’ yakin sengko’ ta’ ekenneng anggep sala.
19Guste, manabi Junandalem rabu ngarane abdidalem, abdidalem neng-ennengnga anante’a ajal.
20Namong kabbullagi parnyo’onan abdidalem se dhadhuwa’ ka’dhinto, Guste, sopaja abdidalem bangal ngadhep Junandalem pole:
21ngereng ambu, abdidalem ja’ seksa ros-terrosan, ja’ patako’ ka Junandalem salanjangnga.
22Ngereng adhabu, abdidalem nyaoda. Otabana diggal abdidalem se tor-matora, kasokana Junandalem apareng jawaban.
23Saponapa kasala’an sareng dusa abdidalem? Ngereng sebbuddagi kajahadan abdidalem.
24Aponapa abdidalem sareng Junandalem me’ ejauwi? Aponapa abdidalem me’ ekamoso?
25Abdidalem namong dhaun se ngalotor egiba angen, aponapa sareng Junandalem me’ eko’-tako’e? Abdidalem namong darameyan se kerreng, aponapa me’ eserser samane?
26Junandalem nantowagi papasthen se pae’ kaangguy abdidalem, Guste, sareng ngokom kasala’an abdidalem gi’ ngodhana.
27Soko abdidalem etale’e rantay besse; saneyap tengka’ abdidalem etalektegi; kantos ka pa’-dapa’na soko eoladi.
28Kantos abdidalem alpo’ akadi kaju se mopok, tadha’ bidana sareng kaen se teppo ekakan ngetnget.