Dual Panel1Ayyub nerrossagi dhabuna, "Bit asmana Allah se odhi’, se ta’ adil ka sengko’,
2(27:1)
3sengko’ asompa’a: Mon bi’ Allah sengko’ gi’ eparenge nyaba, mon tang nyaba gi’ badha e dhalem tang badan,
4tang bibir ta’ acaca’a lecek, tang jila ta’ co-ngocowa oreng.
5Daddi, sengko’ ta’ endha’ ngakone ja’ ba’na bendher; sampe’ mate sengko’ ngoca’a ja’ sengko’ ta’ sala.
6Sengko’ teptebba ngoca’ ja’ sengko’ reya teppa’, tang pekkeran berse salanjangnga.
7Mandar tang moso eokoma menangka oreng daraka, eajar menangka oreng durjana.
8Apa pangarebban monggu ka oreng daraka e bakto Allah mondhuda nyabana?
9Apa Allah meyarsa’agiya tangessa mon oreng jareya nemmo kasossa’an?
10Masthena oreng jareya ngarep kasennengngan dhari Allah, ban adu’a tadha’ ambuna.
11Bi’ sengko’ ba’na eajarana parkara kobasana Allah, ebala’ana rancanana Se Mahakobasa.
12Tape, ba’na la padha nangale’e dibi’. Daddi arapa ba’na me’ aberri’ babala’an se tadha’ gunana?"
13Zofar ngoca’, "Kantha reya carana Allah Se Mahakobasa ngokom oreng se jahat ban daraka.
14Mon ana’na bannya’, ana’na bakal mateya e paperrangan, ban na’ potona bakal odhi’a kakorangan.
15Karena balana bakal mateya polana wabah panyaket, dha-randhana padha tadha’ se nangese.
16Maske salakana abuk-tombuk ban kalambina ason-soson,
17tape salaka ban kalambi jareya bakal ekaandhi’a reng-oreng se berse atena.
18Bengkona oreng jahat teppo akantha bang-sabang, pera’ bengko sabatara akantha kennengnganna panjaga.
19Oreng jareya marobbu menangka oreng sogi, tape jareya ta’ ekenneng edhukale’e, sabab e bakto jaga dhari tedhungnga, dhi’-andhi’na la tadha’ kabbi.
20Oreng jareya bakal ngadhebbana kabadha’an se talebat nako’e, akantha se kadhatengngan ba’a maleng. Akantha angen e baja malem sampe’ aba’na elang tanoro’ eabber.
21Angen temor dhateng, oreng jareya eangka’, eabber dhari bengkona.
22Oreng jareya eabber ta’ ekaneserre, tapaksa buru nyare pangaoban.
23E bakto gaggar ka tana ekopa’e oreng sabannya’na, neng e man-dhimman eya-seya."