Dual Panel1Sateya, he Ayyub, mara edhingngagi pateppa’ apa se ekoca’agiya sengko’ reya.
2Sengko’ sateya la sadhiya acaca’a ka ba’na.
3Sengko’ acaca sajujurra, sengko’ mala’ana sabendherra.
4Erroh Allah nyepta’agi sengko’ reya ban apareng odhi’ ka sengko’ e dunnya.
5Daddi mon bisa, mara ba’na nyaot. Sadhiya’agi se abilla’a ba’na.
6Monggu ka Allah, sengko’ ban ba’na tadha’ bidana padha ekagabay dhari lempong ban tana.
7Daddi ba’na ta’ osa tako’ ka sengko’; sengko’ ta’ amaksod makala’a ba’na.
8Sengko’ la ngedhing oca’na ba’na, sarta la ngarte se ekamaksod atena.
9Ba’na ngoca’, ‘Sengko’ berse, ta’ nerrak larangan. Sengko’ socce, ta’ andhi’ kasala’an.
10Tape Allah re-nyare marga nyala’agi sengko’, sengko’ eanggep moso.
11Tang soko epasange rantay; tang guli terros etalektegi.’
12He Ayyub, pekkeranna ba’na ce’ salana. Sabab Allah araja’an dhari manossa.
13Arapa ba’na me’ ngarane Allah ekoca’ ta’ marduli ka serrona manossa?
14Allah abu-dhabu acem-macem carana, tape tadha’ oreng se agateyagi dhabuna.
15E bakto oreng tedhung ngeddha e baja malem, e dhalem mempe ban pangatonan Allah adhabu ka manossa.
16Allah makon manossa ngedhingngagi dhabuna, manossa epatakerjat ban parengeddan-parengeddanna.
17Maksodda sopaja manossa ambu se alako dusa, ban ta’ terros sombong.
18Manossa jareya epalopot dhari pate; epeyara sopaja ta’ sampe’ ancor.
19Allah maemot oreng kalaban madhateng panyaket, sampe’ badanna arassa sake’.
20Se sake’ ta’ endha’ ngakan, ngota’a nangale kakanan se paleng nyaman.
21Badanna koros kare kole’na, sampe’ etangale’e lang-tolangnga.
22Oreng jareya para’ mateya, dunnyana oreng mate la semma’ ka aba’na.
23Olle daddi settong dhari saebu malaekadda Allah se maenga’ manossa parkara kawajibanna, bakal dhatengnga nolonga aba’na.
24Malaekat jareya bakal adhabuwa kalaban bellas ase, ‘Ocol oreng jareya, ja’ patoron ka dunnyana oreng mate. Areya’ pesse tebbusanna, se mabebasa oreng jareya pole.’
25Badanna bakal kowadda parjuga segger akantha oreng ngodha.
26Mon oreng jareya adu’a, tanto ekaneserre bi’ Allah, oreng jareya tanto moji Allah, atena gumbira, ban Allah tanto mabali kabadha’anna akantha asalla.
27E adha’na oreng bannya’ oreng jareya tanto pas ngoca’, ‘Se jahat bi’ sengko’ eanggep becce’, sengko’ ce’ dusana, tape sengko’ ta’ eokom bi’ Allah.’
28Allah nolong sampe’ sengko’ ta’ maso’ ka dunnyana oreng mate, sarta gi’ odhi’ sampe’ sateya.
29La li-baliyan, Allah alampa’agi se kantha jareya,
30sopaja bisa’a nolong masalamet manossa ban apareng kasennengngan e dhalem odhi’na.
31Daddi mara edhingngagi Ayyub, bukka’ kopengnga, neng-enneng, sateya sengko’ se acaca.
32Tape mon badha se ekoca’agiya ba’na, mara ngoca’; mon ba’na pajat bendher, sengko’ endha’ ngakowa.
33Tape mon enja’, mara neng-enneng, edhingngagi tang caca, sengko’ ngajarragiya hekmat ka ba’na.