Dual Panel1E settong malem, e taon se kapeng settong Belsiyazar jumenneng rato e Babil, sengko’ amempe ban narema pangaton. Mempe jareya bi’ sengko’ ecathet ban reppodan parkara pangaton se etarema sengko’ jareya kantha reya: Angen santa’ dhari man-dhimman madhateng kaleng busbus e tase’ raja.
2(7:1)
3Pas badha rajamena kalowar dhari dhalem aeng, bannya’na pa’-empa’, tong-settongnga ta’ padha.
4Se nomer settong robana akantha macan, tape andhi’ kalembang akantha mano’ garudha. E bakto bi’ sengko’ eabas, o-tao kalembangnga locot; keban jareya taangka’ dhari tana, pas epamanjeng e sokona se dhadhuwa’ akantha manossa, sarta pas eberri’i akkalla manossa.
5Keban se nomer dhuwa’ robana akantha baruwang. Keban jareya manjeng ngangguy soko budhina se dhadhuwa’, ngeba tolangnga roso’ tello kerra’, ekekke’ bi’ gigina. Sengko’ ngedhing badha sowara se ngoca’ ka keban jareya, "Mara kakan daging jareya patobuk!"
6E bakto bi’ sengko’ eabas, kalowar keban se laen. Robana akantha macan toltol, tape e balikadda badha kalembangnga mano’ pa’-empa’, ban cethagga pa’-empa’. Katonna keban jareya andhi’ wibawa.
7E bakto sengko’ mandeng, pas kalowar keban se nomer empa’. Keban jareya ce’ kowadda ban nako’e. Gigina ja-raja ban gali akantha besse; mangsana eremmek ban ekakan bi’ gigina jareya, karena laju enyek-enyek. Keban jareya banneyan dhari ban-keban se laen, iya reya atandhu’ sapolo.
8Sabatara sengko’ mandeng ka dhu’-tandhu’ jareya, o-tao pas tombu tandhu’ laen e antarana. Tandhu’ jareya kene’, tape ngenneng nyoddhul dhu’-tandhu’ se dha’-adha’ laenna sampe’ potthak tatello’. Tandhu’ kene’ jareya badha matana akantha manossa ban badha colo’na se asebbal ce’ gathagga.
9Teppa’na sengko’ ngabas, pas badha ta-tahta se esaba’ e jadhiya. Salerana se odhi’ langgeng alenggi e sala settong dhari tahta jareya. Rasoganna pote akantha kapas, rambudda akantha ewwol se asli. Tahtana nongko’ e dha-rodha apoy, rabbang,
10ban apoy agili dhari tahta jareya. E jadhiya badha oreng abun-ebun se aladine Salerana ban ajuta’an oreng manjeng e ajunanna. Saellana jareya sidang pangadilan jareya emolae, ban tab-ketab pas ebukka’.
11Sabatara sengko’ ngabas, tandhu’ se kene’ gella’ gi’ paggun ngacepper ce’ sombongnga. E bakto sengko’ ngabas, keban se pa’-empa’ jareya epate’e, badanna epelpallagi ka dhalem apoy epatompes.
12Ban-keban laenna ecabut kakowadanna, tape gi’ eedine odhi’ sampe’ batessa bakto se la etantowagi.
13Saabidda pangaton e malem jareya, sengko’ nangale’e se akaton akantha manossa. Oreng jareya nyander ka sengko’ ekalenglenge ondhem, ban nyander ka Salerana se odhi’ langgeng ban epangadhep ka Salerana.
14Oreng jareya laju eparenge kahormadan ban kakobasa’anna rato, sampe’ reng-oreng dhari sakabbinna bangsa, suku bangsa ban basa aladinana Salerana. Kakobasa’anna bakal terrosa salanjangnga, ban karaja’anna bakal tadha’a aherra.
15Tang ate bingong ban ngalengsang polana ton-pangatonan jareya.
16Sengko’ nyander ka sala settong dhari reng-oreng se manjeng e jadhiya ban menta tolong sopaja oreng jareya nerrangngagi. Daddi oreng jareya malae sengko’ apa artena.
17Oca’na, "Rajamena se pa’-empa’ rowa parsemmonna karaja’an se pa’-empa’ se bakal badha’a e bume.
18Ban ommadda Allah Se Mahatenggi bakal narema’a kakobasa’anna rato ban bakal neggu’a kakobasa’an jareya salanjangnga."
19Saellana jareya sengko’ terro taowa jang bannya’an pole parkara keban se nomer empa’, se ta’ padha ban se laenna; keban jareya talebat nako’e, nyangkarem mangsana bi’ cakarra se dhari dimbaga ban nyeppa’ bi’ gigina se dhari besse sarta nyek-ngenyek mangsana jareya.
20Sengko’ terro taowa keya parkara tandhu’ se sapolo meggi’ se badha e cethagga ban dhu’-tandhu’ se kalowar jang budhiyan ban macothot tandhu’ se la badha sabellunna sampe’ tello meggi’. Tandhu’ se kene’ jareya badha matana ban badha colo’na settong ban colo’ jareya asebbal ce’ gathagga. Tandhu’ jareya lebbi nako’e etembang ban dhu’-tandhu’ laenna.
21Teppa’na sengko’ ngabassagi, tandhu’ jareya aperrang bi’ ommadda Allah ban makala ommat jareya.
22Saellana jareya Salerana se odhi’ langgeng rowa laju rabu, pas apareng potosan nolonge ommadda Allah Se Mahatenggi. La napa’ baktona ommadda Allah narema kakobasa’anna karaja’an.
23Reya’ katerrangan se etarema sengko’: "Keban se kapeng empa’ rowa karaja’an se nomer empa’ se bakal jaga’a e bume ban bakal bida’a dhari karaja’an en-laenna. Karaja’an jareya bakal maancora ban nyek-ngenyegga saantero bume.
24Tandhu’ se sapolo jareya rato se sapolo oreng se marenta’a karaja’an gella’. Saellana jareya pas bakal dhatengnga rato laen; rato jareya banneyan ban to-rato se sabellunna sarta bakal makala’a rato se katello gella’.
25Rato jareya bakal ca’-ngoca’a alaban ka Allah Se Mahatenggi sarta nendhes ommadda Allah. Rato jareya bakal aehteyara ngoba’a kom-hokomma ban ta-pestana agamana ommadda Allah, ommadda Allah jareya bakal ekobasa’ana tello taon satengnga abidda.
26Pangadilanna sowarga pas bakal asidhanga, nyabuda kakobasa’anna ban matompessa rato jareya sampe’ tadha’ karena.
27Kobasa ban kaagunganna sakabbinna karaja’an e bume bakal eparengngagiya ka ommadda Allah Se Mahatenggi. Kobasana ommadda Allah jareya bakal tadha’a ambuna ban sakabbinna pangobasa e bume bakal ta’ada ngabdi ka ommadda Allah jareya."
28Gan dhinna’ bai caretana sengko’ reya. Sengko’ ngalengsang parana sampe’ sengko’ pocet, tape tadha’ oreng se ebalai parkara jareya bi’ sengko’.