Dual Panel1Isra’il akantha bungkana anggur se lebba’ buwana. Sajan sogi sajan bannya’ maddek mezba. Sajan ma’mor, sajan bagus gabayanna gu-tuguna brahalana se esemba.
2Reng-oreng se juba’ atena jareya, sateya kodu nanggung ollena dusana. Allah bakal ngancora ba-mezbana, magujura gu-tuguna brahalana.
3Sakejja’ aggi’ reng-oreng jareya bakal ngoca’a, "Sengko’ ban ba’na ta’ andhi’ rato polana ta’ tako’ ka PANGERAN. Apa gunana andhi’ rato?"
4Reng-oreng jareya raja caca ban agabay janji palsu sarta mabadha parjanjiyan se tadha’ gunana. Hokom elik-balik sampe’ sabarang se ta’ tombu e man-dhimman akantha bu-tombuwan se badha raconna e gal-teggal se la elandhu’.
5Pandhudhu’na kottha Samaria bakal tako’a; reng-oreng jareya ban mam-imamma se aladine sape emmas e Betel rowa bakal sossa’a ban nangesa polana kamolja’anna brahala jareya la mosna.
6Brahala jareya bakal eangko’a ka Asyur menangka tandha pangesto ka rato se agung. Isra’il norodi sajja se andaddiyagiya aba’na olle malo ban eyaseya.
7Samaria bakal ancora ban ratona egiba’a akantha kaju sakerra’ se epaancor e dhalem aeng.
8Wel-kowel e mo’-gumo’ e Betel kennengnganna Isra’il nyemba ka brahalana bakal epaancora. Dhuri ban rebba bakal tombuwa e mezbana. Saellana jareya reng-oreng jareya bakal aera’a ka nong-gunong, "Mara cecce’e sengko’!" ban ka mo’-gumo’, "Mara totobi sengko’!"
9PANGERAN adhabu, "Molae dhari kadaddiyan e Gibeya rowa, oreng Isra’il gi’ ta’ ambu alako dusa, ta’ atoro’ ka Sengko’. Daddi e Gibeya keya reng-oreng jareya bakal kadhatengngana paperrangan.
10Sengko’ nyerranga reng-oreng se dusa jareya, ban ngokoma. Sa-bangsa bakal agabunga ngadhebbana reng-oreng jareya, ban reng-oreng jareya bakal eokoma lantaran dusana se talebat bannya’na.
11Lamba’ Isra’il akantha sape se gi’ ngodha se la olle lateyan se bagus, ban se dujan agebba gandum. Gulgulanna se bagus jareya ta’ parlo epobuwi pangonong bi’ Sengko’. Tape sateya Sengko’ la motossagi Isra’il bi’ Sengko’ epaksa’a alako berra’. Yehuda bi’ Sengko’ esorowa nyalaga, Isra’il esorowa agaru.
12Sengko’ la ngoca’, ‘He, Isra’il! Mara mokka’ tana anyar kaangguy ba’na dibi’, taburi ne-bine kaadilan, pas anye berkat se kalowar dhari kataresna’anna ba’na se gu-onggu ka Sengko’. Sabab sateya la baktone ba’na nyare’e Sengko’, PANGERANna. Sengko’ dhatengnga ngojanana ba’na bi’ Tang berkat.’
13Tape ba’na atengka sabaligga; ba’na namen kajahadan ban molong barang se ta’ adil. Ba’na ngakan buwana hasella kaleceganna." PANGERAN adhabu pole, "He, bangsa Isra’il, sarrena ba’na ngandellagi ta-kareta perrangnga ban bannya’na rit-parjuridda,
14ra’yadda ba’na bakal kadhatengngana paperrangan, ban teng-bintengnga ba’na bakal epaancora kabbi. Kabadha’annna bakal padha’a ban are e bakto Rato Salman maancor kottha Bet-Arbel e dhalem paperrangan, sarta agiles bu-ebu ban na’-ana’na.
15Kantha jareya se bakal kadaddiyana ka ba’na, e, oreng Betel, sabab ba’na la ngalakone kajahadan se raja. E bakto pajjar, e, bakto paperrangan buru molae, ratona ba’na bakal mateya."